والدة أحد شهداء بورسعيد: "النهارده ممكن أزور ابني وأنا مرتاحة"

أعربت كريمة السيد، والدة الشهيد أحمد أفندي -17 عاما- أحد شهداء مذبحة بورسعيد، عن سعادتها بحكم اليوم، بإحالة 21 متهما لفضيلة المفتي.
وقالت كريمة ل"الوطن": "النهارده بس أنا أقدر أروح أزور ابني في قبره وأنا مرتاحة لإني حاسة إن حقه رجع، وكنت واثقة إن عدل ربنا هينتصر في الآخر، وماكنتش مصدقة اللي كانوا بيقولولي إن مافيش حاجة هتحصل وإني استعوض ربنا في ابني وإنه حقه هيروح هدر".
وتابعت والدة الشهيد: "أنا مش خايفة على حق ابني وكل اللي زيه طالما وراهم شباب الأولتراس الجدعان، اللي مش عايزين لا شهرة ولا غيره، وكل اللي همهم حق إخواتهم، ويا ريت كل اللي يتكلم عنهم، يتكلم بكل خير لأنهم شباب متعلمون ومثقفون وعارفين حقوقهم".
وأضافت والدة الشهيد: "الشباب دول ماسابونيش لحظة، كانوا دائما بيسألوا عني وبيودوني، وبيحسسوني إنهم ولادي، وإن ابني لسه عايش، وبدل ما كان عندي ابن بقى عندي آلاف يعوضوني عن فراقه.