«يوسف» متزوج ولديه طفلان عمره 28 سنة، متعلم وحاصل على الدبلوم، من مركز «يوسف الصديق»، عمل فى الصيد، وعندما أصاب المهنة الشلل، تحول إلى الزراعة وقام بمساعدة والده فى أرضه، وبعد أن أصاب العطش الأهالى والأرض، شد رحاله إلى الإسكندرية تارة، وإلى القاهرة تارة أخرى، مرة يعمل فى «البناء»، وتارة يعمل كخفير بمبالغ زهيدة. * ماذا تعرف عن الرئيس المخلوع حسنى مبارك؟ - «إحنا مانعرفش حاجة لا عن مبارك ولا عن تاريخه».. لأنه عمره ما زار القرى الفقيرة المحرومة من كل شىء.. حتى لما كان بيقولوا إن «الريس» بيزور الفيوم.. كنا نراه فى التليفزيون فقط.. وبالنسبة للمركز هنا، «كل واحد ملهى فى لقمة العيش أو فى المرض اللى صابه بسبب المياه الملوثة.. ولو حبينا نتكلم فى السياسة، يقولوا لنا بلاش لأن الحيطان ليها ودان». * ما تقييمك لسنوات حكمه؟ - كانت من أسوأ الفترات.. مبارك قدر إنه ينفذ حكم الإعدام فى الناس بالبطالة والفقر والتلوث والغلاء، أنا كنت زمان باحجز كشف دكتور لوالدى -المريض بالكلى بسبب المياه الملوثة- ب«جنيه وربع»، الآن كل المستشفيات اتخصخصت، والكشف أصبح ب300 جنيه. فى مركزنا «مفيش مياه»، وبنشترى «جراكن» مياه من المحافظة حتى نعرف نعيش.. الله يرحم «عبدالناصر».. بسببه «خدنا حتة أرض لكن للأسف مش عارفين نزرعها عشان مفيش مياه». * هل ترى أن مبارك مسئول عن التطور فى مصر؟ - تطور إيه.. «مبارك ماكانش فى دماغه أى تطور» كان همه إن جمال أو علاء يكون رئيس بعده.. الحمد لله، الواحد عاش حتى رأى نتخابات رئاسة، الواحد يختار فيها الرئيس بحريته. * وهل ترى أن مبارك مسئول عن الانهيار فى مصر؟ - طبعا.. أول ما مسك البلد «الحال باظ.. مفيش حاجة نافعة»، عندنا فى البلد ناس «مش لاقية اللقمة».. هذا غير إنه مسئول عن الشباب «اللى زى الورد اللى استشهدوا فى ميدان التحرير».. دلوقتى الشاب بينتهى لما يكون عنده 30 سنة.. لا عنده شقة ولا شغل ولا عارف يتجوز. * كيف ترى مصر بعد تنحى مبارك؟ - مصر فى فوضى «مفيش حاجة مستقرة»، البلطجية انتشروا فى البلد، ونسمع كل يوم إن واحد اتخطف، وواحدة قتلوها، «أنا بقيت خايف على ولادى وابوبا وامى ومراتى».. وباحاول قدر الإمكان أكون موجود معهم رغم عدم وجود عمل هنا. * هل تعتقد أن الرئيس القادم سيكون لديه السلطة فى تغيير الحكم على مبارك؟ - أعتقد أن الرئيس القادم لو إنسان ومؤمن بالثورة.. مستحيل يغير الحكم على مبارك أو يكون ليه دخل فيه.. أما لو كان من أتباعه.. مش بعيد نجد مبارك خارج السجن، و«واحد زى مبارك لازم ينال عقابه.. والمشكلة مش فيه وبس.. لكن فى الناس اللى حواليه.. فيه 1000 حسنى مبارك فى البلد». * ما هو رد فعلك فى حالة أفرج الرئيس القادم عن «المخلوع»؟ - «ماينفعش طبعا.. على الأقل يعمل حساب لأهالى الشهداء اللى ضحوا بحياتهم عشان الثورة تنجح». * ما هو الحكم الذى تتوقع صدوره على مبارك؟ - «أنا نفسى يتسجن وبس.. مش عاوزه يخرج من السجن.. لأنه لو خرج أو صدر حكم إعدام عليه هيرتاح.. وواحد زيه ماينفعش يرتاح.. لازم يتعذب». أخبار متعلقة: «ولابد عن يوم محتوم تترد فيه المظالم» 1- أحمد سليمان: براءة فى «القتل» وأحكام مخففة عن «الفساد» 2- شيخ مراكبية أسوان: «سوزان» سبب الخراب.. وأتمنى إعدامها فى ميدان عام 3- سارة: البراءة ممكنة.. والشعب هيثور وبعدين ينسى 4- العربى : «اتبهدلنا».. وأرفض إعدامه «لأننا موحدين بالله» 5- عم إبراهيم: كلهم يستاهلوا الإعدام علشان الغلابة اللى قتلوهم 7- «شيماء»: القضاء سيترك «الظالم» يموت «موتة ربنا» 8- عبدالله القهوجى: أتمنى العفو عنه احتراماً لسنه ومرضه 9- عم محمود: راجل عجوز وإعدامه لن يفيدنا.. المهم إعدام أولاده وحاشيته 10- وائل مسعد: أقصى عقوبة.. يعيش له يومين فى العشوائيات 11- الدرديرى: كنت باحبه حتى سنة 2000.. «ومش هياخد يوم حبس» 12- حسام: بالعقل كده ما ينفعش الراجل ده ياخد براءة 13- جميل الدرينى: أعطاه الله إنذارا بوفاة حفيده لكنه لم يتعظ 14- الحاج فرغلى: سيماطلون فى تنفيذ الحكم.. حتى يأتى أمر الله
