"كان صعب عليا أسيب ميجا أف إم خصوصا إنى عاطفية أكثر منى عملية بس مقدرتش أقول لا لراديو 90 90 ..بهذه العبارات تحدثت المذيعة سالي عبد السلام والتي تقدم فقرة مسابقات في برنامج "مساء الخير يارمضان" على سي بي سي تو، في حوارها ل"بوابة الوادي" ، فسألتها: كلميني عن فكرة انتقالك لتقديم برنامج في سي بي سي؟ * إدارة القناة تواصلت معي قبل رمضان بأسبوعين و قالولى عايزينك فى برنامج فى رمضان و رحت وقعدنا والحمد لله اتفقنا من أول مقابلة موضحة ان الموضوع كان صدفة وليس لدي واسطة فى المجال ده ، لو انا شاطرة وهنجح فهنجح بمجهودى وده بقى نادر فى كل المجالات اليومين دول. - هل لديك مشاريع جديدة تفكرين الدخول فيها؟ *أحلم بتقديم برنامج برنامج إجتماعى فى الشرق الأوسط يمتلك طاقة ايجابية والمناقشة تكون بلا خطوط حمرا أو أحكام من الناس . نفسى فى الواقع مش اللى بنشوفه فى التليفزيون عايزة ناس تطلع نتعلم منها يعنى ايه إرادة و إصرار ورضا عشان نعمل حاجة فى دنيتنا . - كلميني عن تجاربك في راديو 90 90؟ *طارق أبو السعود قالى عايزك معايا وهو من أعطاني أول فرصة قدام المايك من4 سنين و هو اللى دايما بيشجعنى وعندما حصلت علي جائزة أحسن مذيعة راديو فى مصر من مؤسسة دير جست بتصويت الجمهور فى أول سنة راديو ليا كان هو اول تهنئة هو وعيلته وصرفلى مكافأة كمان ودايما يشجعنى ويقولى هتبقى من اشطر المذيعين بغض النظر عن خناقتنا فى الشغل وبنختلف كتير . كان صعب عليا أسيب ميجا اف ام خصوصا إنى عاطفية أكثر منى عملية بس مقدرتش اقول لا وكان نفسى أحقق نجاح فى برنامج لوحدى زى ما حققته مع وائل منصور فى "خلى بكرة أحلى "وكنا من أنجح البرامج الحمدلله. - هل كان هناك خطوط حمراء أو تعرضتي لضغوط خلال عملك براديو ميجا أف أم؟ *تعرضت لضغوط خلال فترة حكم الإخوان المسلمين بالذات وافتكر مرة حصل حادثة لشاب فى المعادى طلعوا عليه بلطجية عند نادى المعادى وقتلوه عشان يستولوا على الموتوسيكل بتاعه ! سألت سؤال واحد عالهوا سيدى الرئيس انا مش هكلم المسؤولين انا بخاطبك كأب حضرتك قلت الثورة اللى هيشوف نجاحها ولادنا وولاد ولادنا ورضينا بس لما امل بكرة اللى عايشين عشانوا بيموت فى عز الضهر ومفيش امن وامان يبقى ايه! سيادة الرئيس حضرتك فين!؟ وقامت الدنيا ومقعدتش ولقيت رئيس شبكة راديو النيل عندى فى الاستوديو اول ما قفلت المايك بيقولى قلتى ايه الدنيا اتقلبت ! وكأنى عملت مصيبة ! ورد الفعل انه لو اتكرر الكلام ده هتوقف - تعليقك علي حصولك بجائزة افضل اذاعية وفقا للدير جيست؟ * مصدقتش نفسى أن من أول سنة ربنا حبب فيا خلقه وأن كلها بالتصويت وأن ممكن حد مجتهد من غير واسطة فى بلدنا يحقق نجاح وحب والناس هى اللى تدعموا ويبقى على طبيعته مش فيك وميتلونش والجائزة كانت سنة الثورة وده ضاعف قيمتها عندى وكم الاعلاميين اللى وقعت فى نظر الناس كان يخوف فالحمد لله يا رب افضل كدة ومتغيرش ابدا لان الناس هى اللى بتعمل المشاهيير على كل المستويات بحبهم و دعمهم وفى ناس للاسف بيبقى خسارة فيها ده ! - هل تفكرين في الدخول لعالم التمثيل؟ وهل عرض عليك أعمال دراميه؟ *بالفعل عرض عليا المشاركة في مسلسل " الداعية" مع العدل جروب وكان دور مهم بس مجربتش ونفسي في الأدوار التاريخية لأن والدي يرفض فكرة دخولي لمجال التمثيل ووافق علي عملي كمذيعة بعد "سنتين عياط" وعملت دبلوما فى الجامعة الإمريكية وصدم انى بعملها عشان أبقى محترفة مش هاوية فى الاعلام . - ما رأيك في الخطاب الإعلامي في الوقت الحالي؟ * ممكن أقول" على كل لون يا باطيستا" عدد كبير مزيف وبوشوش و بلا مهنية ولا ضمير والأغلبية ليهم مصالح مش لله بس الناس فاهمة كويس اوى حتى المواطن البسيط محدش يقدر يخدعه نفسى نتكلم عن الواقع اللى عايشينه و بنعيشه و منخافش حتى لو حد هيتاخد كبش فدا زى ما بيقولوا بس هيشتغل بما يرضى الله ويسيب بصمة فى الدنيا ومينفعش اسمى باسامى او احكم على حد بس بقول رأيي فى المطلق وانا مش ملاك وبحلف انا مدخلتش المجال ده غير عشان أساعد على قد ما اقدر واخلى الناس تنسى همومها وتضحك من قلبها وتسيبها على الله وده اللى بعمله ومن 4 سنين ومش عايزة غير دعوة حلوة ليا ولما اجوز واخلف تبقى لولادى واللى يعرفنى او بيسمعنى هيعرف انى مليش فى الانشا ولا تزويق الكلام واللى فى قلبى على لسانى..حاسة انى فى مؤتمر ههههه بحبكوا كلكوا.