سؤال التعبير بامتحان «عربي 2 ثانوي» بالشرقية: تخيل أنك تري الحياة بثلاثة عيون.. وطلاب: العين التالتة هتخلينى أشوف اللى مشوفتوش

تداول نشطاء على موقع التواصل الاجتماعي "الفيس بوك"، ورقة امتحان اللغة العربية للصف الثاني الثانوي بمحافظة الشرقية، مما أثار سخرية كبيرة بين الطلاب من سؤال التعبير بالامتحان.
وتضمن الامتحان في السؤال الإجباري للتعبير، كتابة 8 أسطر عن "تخيل إنك خُلقت بثلاثة عيون.. أكتب تقريراً عن الحياة عندما تراها بعيون ثلاثة"، مما أثار السخرية بين الطلاب".
وقال أحد الطلاب المعلقين: "ده على اساس أن العين التالتة هتخلينى اشوف اللى مشوفتوش بالاتنين؟ ده ايه الجنان ده؟".
فما علقت طالبة أخرى: "هو ده بقى حال تعليمنا بالضبط.. حاجات ملهاش أي منطق، والمفروض انهم بيطوروا التعليم".
واتفق طالبان أخران على تدهور التعليم، قائلين: "المدرس زى ما يكون عايز يخلص من الامتحان وخلاص، أهوه فعلا أي حاجة.. والطالب دايما هو اللى بيدفع الثمن".
وتساءلت طالبة: "مرة يجيبولنا حاجات في السياسة، ومرة حاجات خيالية، هما عايزين يعملوا فينا أيه أكتر من كده.. الطالب هيكره يتعلم عشان يرتاح من التأليف".
ورصدت طالبة أخرى كل ما يحدث داخل المدارس، قائلة: "كل ما يحدث مهازل، بدءً من اللجان اللى بتتاخر عشان الامتحان طلع جوه الظرف مش بتاعهم، أو أن الظرف مفهوش الامتحانات أساسا، أو أن الامتحان يمجد في حاجة في البلد، أو أنه هزلى بالشكل ده، وكل ده الوزارة بتطلع تقوله كل يوم، ومنسمعش حاجة غير أنهم أحيلوا للتحقيق وبس".
وعلى الرغم من اتفاق الجميع حول عدم صلاحية هذا السؤال داخل الامتحان، إلا أن بعض الطلاب اعترضوا على تحميل الأمر لوزير التعليم، أو المنظومة التعليمية بصفة عامة، قائلين "اللى يتحاسب على كده المدرس اللى حط الامتحان، لكن أيه علاقة ده بتطوير التعليم، وأن الوزير مش شايف شغله، على أساس أن الوزير لازم يراجع ورا كل واحد شويه، ويشوف امتحانات كل المدراس بكل مراحلها، الناس بقت بتنتقد من أجل الانتقاد وخلاص".