"لأمنك وسلامتك.. الحرم الجامعي مراقب بالكاميرات" لافتة تثير سخرية طلاب عين شمس: "بيتجسسوا علينا مش بيحمونا"

تعليق طالبة: هو كده لأمننا وسلامتنا بيحسبوها إزاي.. واضح انها للمراقبة مش للأمن
طلاب الإخوان: "هما فاكرين أننا هنخاف مفيش حاجة ترجعنا عن اللى بداناه"
طلاب مؤيدون: "الإخوان كل يوم بيولعوا في حاجة.. لازم كده عشان يعرفوا انه هيتقبض عليهم"
"لأمنك وسلامتك.. الحرم الجامعي مراقب بالكاميرات"، لافتة وضعت داخل الحرم الجامعي بعين شمس، وذلك بعد الأحداث التي تشهدها الجامعات يوميا، واشتعال الموقف بالحرق أو منع الطلاب والطالبات من الدخول للامتحانات، لكنها أثارت سخرية الطلاب بعد أن تداولها على مواقع التواصل الاجتماعي "الفيسبوك وتويتر".
قالت أحدى الطالبات "هما لما بيتجسسوا علينا مش بيحمونا يبقى ده لأمننا وسلامتنا.. وقرار دخول الشرطة للجامعة برضه لأمننا وسلامتنا.. هما بيحسبوها إزاي".
وشاركها الرأي أحد الطلاب بكلية الطب، قائلاً "رغم اختلافي على ما يفعله طلاب الإخوان داخل الجامعات.. لكن لا يعطى الحق للجامعة أن تضع لنا الكاميرات.. واضحة أنها للمراقبة.. مش للأمن".
وعلق طالب أخر بكلية هندسة ساخراً "يا جماعة انتوا زعلانين ليه.. مش يكونوا معرفنا أحسن ما يبقى من ورانا!!".
وأوضح طلاب آخرين، من حركة "طلاب ضد الانقلاب" المحسوبة على جماعة الإخوان المسلمين، أن ما حدث لا يؤثر على ثورتهم المستمرة، قائلين "هما فاكرين اننا هنخاف.. هما كده اللى خايفين.. ومفيش حاجة هترجعنا عن اللى بدأناه".
وعلى الرغم من موجه السخرية والرفض، إلا أن هناك طلاب آخرين أيدوا ما فعلته إدارة الجامعة من وضع الكاميرات، قائلين "الجامعة لازم تعمل كده.. بعد ما كل يوم نلاقي طلبة الإخوان ولعوا في مدرج وحرقوا كلية ومنعوا الامتحانات، لازم كل شيء يبقى مراقب عشان لو حصل كارثة يعرفوا يقبضوا على اللى عملها".
وأضافت طالبة أخرى "صح كده أنهم يوضحوا كمان الموضوع.. عشان لو حد عايز يعمل حاجة يبقى عارف انه متراقب وبسهولة هيتقبض عليه، هما عايزين يخربوا الجامعات، فلازم يكون في حزم وشدة".