بالفيديو..أبو اسماعيل للداخلية : "دول ماتربوش كفاية دول حثالة "

تناقلت مواقع التواصل الاجتماعي فيديو للقيادي السلفي، حازم صلاح أبو إسماعيل، عقب اقتحام مقر حزب الوفد، يسب فيه قيادات وزارة الداخلية اعتراضًا منه على احتجاز 4 من أنصاره.
جاء الفيديو ومدته 5 دقائق و27 ثانية بكلمات واضحة للشيخ حازم صلاح متحدثًا عن الداخلية، حيث قال: «دول ما تربوش كفاية.. دول حثالة.. أنا اللي ما قولتوش قبل كده هقوله دلوقت.. أنا لسه قايل لأحمد جمال في مكتبه انت متواطئ انت وبتاع الأمن الوطني.. ده خائن هو واللي معاه»، وتابع قائلًا لأحد أتباعه «نزلي يابني على كل الصفحات.. أنا عايز الناس كلها من مصر تيجي هنا دلوقت.. مصر كلها تيجي هنا دلوقتي».
وأضاف «أبو إسماعيل» في حديثه لقيادات مديرية أمن الجيزة: «شرطة إيه دي يا خويا.. دي شرطة عايزة تتجلد»، ثم عاد يتحدث إلى أحد قيادات الأمن بالجيزة: «اسم الله عليك يا خويا.. سايبين الشيخ المحلاوي 24 ساعة راجل عنده 90 سنة»، في إشارة إلى احتجاز الشيخ المحلاوي بمسجد القائد إبراهيم بالإسكندرية من قبل.
وتابع «أبو إسماعيل» موجهًا حديثه إلى أحد الأشخاص الذي يبدو من سياق الحديث أنه من قيادات الشرطة قائلًا له: «أنا مش عايز أثور أكتر من كده.. أنا متضايق.. أنا عايز البطاقات ونتكلم بعد كده.. إنما شاب بطاقته معاكو لا يمكن.. دي هزلت» ثم أضاف متابعًا كلامه «ما دام الأمر وصل للجرأة دي والله لأربيهم».
بعد ذلك ارتفع صوت أبو إسماعيل «مفيش حد يمشي»، في حين ظل أنصار «أبو إسماعيل» يرددون: «إيدك جنبك إيدك جنبك» وقال لهم «أبو إسماعيل»: «ما تلمسش حد.. ما تلمسش حد».