أوعى تكون فلول

حرصاً منا على استمرار روح الثورة المصرية العظيمة وبمناسبة عيد الأضحى المبارك أود أن أشير إلى أنه:
يجب أن يكون خروف العيد من ضمن خرفان الجماعة الثورية «اللي هم إحنا»
التأكد من عدم انتمائه لأية أيديولوجية غريبة (مثل الاشتراكيين الثوريين والحزب الشيوعى والتيار الشعبى أو حركة 6 أبريل - الجبهة التانية طبعا –أو اللى بيسمو نفسهم الأولتراس دول).

وطبعا ده لأن الخرفان بتاعت الناس دي ما شاركتش في الثورة، وأيديولوجيتها مش أفرنجى بلدى زى اللحمة بتاعتنا.

كما أن تلك الخرفان يوجد بها أمراض معدية مثل ما يسمونه بالتحرر والمساوة بين الخروف والنعجة وده طبعا مش مظبوط خالص ويدخل الشيطان بينهما.

وعلشان تربية الخرفان دى مش تربية مظبوطة مش عايزين نخوض فى أعراض الخرفان ولا داعى نمسك صور لفضائح الخرفان فى الزريبة ونشهر بيها ما دام عندنا خرفان التى حرصنا على تربيتها تربية سليمة ومطابقة للمواصفات اللى على مزاجنا إذًا هى أولى بالشراء وحتى ينتفع المربون بتوعنا عشان يبقا زيتنا فى دقيقنا ليه ندخل خرفان غريبة بيوتنا وإحنا ستاتنا ما بتتكشفش على خرفان غريبة، كما أود ان أوضح أن مليونية الخرفان الجاية يجب أن يشارك فيها الجميع من أجل توضيح صورة الخرفان الصحيحة أمام العالم كله حتى يعلموا أننا حريصون كل الحرص على تنمية البنية التحتية للبلد.

أبنائى أريد أن أوضح أن هذا ليس اضطهادا لفصيل خرفان معين لكنه حرص على التمتع بصحة جيدة فى هذا العيد وابقى خليهم بقا يورنا.