"عمره ما جيه مكشر أو حزين" ... رانيا فريد شوقي تحكي شجاعة فاروق الفيشاوي أمام المرض

مازال الحزن يسيطر علي بعض الفنانين في الوسط الفني متأثرين برحيل النجم الكبير فاروق الفيشاوي ، والذي ترك لنا تاريخا يحترم ومثالا للشجاعة والاصرار، وعبر صفحتها علي موقع التواصل الاجتماعي "فيس بوك" قامت الفنانة رانيا فريد شوقي بنشر مواقف للنجم فاروق الفيشاوي قبل وفاته تؤكد شجاعته .
وقالت رانيا فريد شوقي، عبر صفحتها : " فاروق الفيشاوي أعلن في مهرجان الإسكندرية أنه مريض بالسرطان و قال انا هتعامل علي انه صداع و حقيقي ده اللي حصل كنا بنعمل بروفات مسرحية الملك لير عمره ما جه مكشر او حزين بالعكس دايما بيضحك و يهزر مع كل الناس من الصغير للكبير".
وتابعت: " كان دايما يقولي يا بنت الملك و يعد يحكي لي حكايات هو و بابا و لانه انسان اوي، هو عارف ان سيرة ابويا بتسعدني فبيتعمد يحكي عشان يسعد قلبي و هو كمان من حبه لبابا بيبقي سعيد انه بيتكلم عنه و يترحم عليه و قالي تعالي اوريكي انا عامل ايه في اوضتي في المسرح لقيته معلق صورة ابويا و فنانين من الزمن الجميل و ابتدينا عرض المسرحية و الله العظيم عمره ما حاسيسنا انه مريض او تعبان بالعكس كان دايما بيهزر و يضحك و يستمتع بالتمثيل لدرجة اننا نسينا انه مريض".
وأضافت رانيا : " حتي لما اعتذر عن السفر مع المسرحية للسعودية ما قالش انه تعبان و لما رجعنا من السفر عرفنا انه دخل المستشفي في حاله حرجة كنا هنتجنن عايزين نطمن عليه لكن للاسف ممنوع الزيارة و عرفنا الخبر المؤلم كان نفسي اشوفه".
وعبرت رانيا عن حبها لشجاعة فاروق: " بس عارف يا روقا انا اتعلمت منك القوة و حب الحياة و ان مع المرض مش لازم اكون ضعيف و افضل اعافر واقف علي رجلي لاخر لحظة استمتع بالحاجة اللي بحبها و هي التمثيل و اشوف حب الناس ليا تصقفهم الحار ليك كل يوم اكيد ده كان بيسعدك و انا شفت ده في ضحكتك و عيونك اللي كانت بدمع اثناء التحيه يااااه ايه جمالك ده لا اشتكيت و لا كنت حتي بتتكلم عن مرضك كأنه مش موجود و كنت راضي باللي ربنا كتبهولك يا تعيش يا تموت و انت اختارت تعيش و تتبسط و تبسط اللي حواليك لاخر لحظة ضحكتك مابتفرقنيش الله يرحمك و يجعل مثواك الجنة و يجعل صبرك و رضاك و جدعنتك و الخير اللي كنت بتعمله و كل انسان انت اسعدته و جبرت بخاطره في ميزان حسناتك ياااااارب هتوحشنا اوووووي" .