أزمة وقار!!

أنا تعبان أوي في حياتي وقرفان أوي، وخايف إني أكبر تكون فيّ العيوب دي، أنا مش عاوز أحكم عليها وأقول إنها عيوب هستنى إنتم تحكموا عليّ.. أنا ولد عندي 19 سنة شغال مدرب سباحة معايا مدير الشغل واثق من نفسه أوي وفي كل اجتماع يرخم عليّ بكام كلمة، وبيقول إنه بيهزر، بس أنا مش باعرف أهزر وكمان مش باعرف أضحك في وش حد أنا مش بحبه، واللي مضايقني لما بيتكلم عليّ مش باعرف آخد الموضوع بضحك وببقى مخنوق أوي وكل اجتماع يطلّع فيّ عيب، مرة يقول ليّ إنت شافط الأكسجين من البسين، ومرة يقول إن أنفي طويلة شوية لقيت 3 كباتن ضحكوا عليّ على أساس إن ده هزار أنا اتحرق دمي أوي، وأنا مش هينفع أسيب الشغل؛ لأن دي أول سنة أشتغلها في المجال ده وعاوز أستحمل شوية.
أنا فعلاً شخصية هادية بس لما باهزر مع اللي بحبهم بقلب لهم اليوم وبيكون جامد أوي ومعروف عني كده، لكن مش بحب الهزار اللي بيقلل القيمة أو يكون فيه تريقة أنا مش عارف أتغيّر ولّا إيه؟
وكمان كان فيه حفلة في النادي مع الأولاد اللي بندرّبهم وأنا مش باعرف أعمل أي حاجة في الأفراح والحفلات، لحد ما ولية أمر إديتني بنتين، وقالت لي خد بناتك أرقص معاهم وما عرفتش أرقص معاهم خالص مش عارف أنا بجد رخم ولّا إيه؟! يا ريت تلاقوا لي حل.
o.a.m