طباخ يقتل مساعد صيدلى بسبب «نصف جنيه»

«ماكنتش فى وعيى ساعتها، الدنيا كانت ضيقة أوى فى عينيا ومكنش معايا حق الدواء، ولما عرفت إن سعره زاد اعترضت وقولتله حرام عليكم يعنى الغلبان يموت عشان مش معاه حق العلاج، لكنه لم يراع سنى الكبير وسخر منى وعايرنى بفقرى فضربته على رأسه بحديدة عشان انتقم لكرامتى».
بتلك الكلمات بدأ «أحمد.م» 65 سنة، طباخ، والمتهم بقتل «عمرو.ح» 21 سنة، مساعد صيدلى يسرد للمستشار عبد الرحمن حسام رئيس نيابة بولاق الدكرور تفاصيل قتله للمجنى عليه بعد نشوب مشادة كلامية بينهما بسبب الخلاف على سعر الدواء.
وقال المتهم فى اعترافاته أمام النيابة: أنا طول عمرى وأنا كويس مع الناس كلها وعمرى ما أذيت حد ولا جاء فى بالى إنى ممكن فى يوم من الأيام أيدى تتمد بالأذى لحد مش إنى أقتل بنى آدم، أنا ساعتها مكنتش فى وعيى وماحسيتش بنفسى وأنا بضربه على رأسه بالحديدة بس هو سخر منى بسبب فقرى وقلة حيلتى وده اللى خلانى أخرج عن شعورى وأحاول انتقم لكرامتى ورجولتى.
وأضاف المتهم: كنت تعبانًا وروحت للصيدلية عشان أجيب أرخص مسكن عشان يهدئ من أوجاعى عشان أعرف أكمل شغل عشان خاطر بيتى وعيالى، ولما دخلت الصيدلية طلبت من الدكتور اللى واقف أنه يدينى نوع مسكن على طول كنت بشتريه لما الوجع بيزيد علىّ، وكنت على طول بشتريه بجنيه ولما جيت أحاسبه وأديله الجنيه تفاجأت بأنه بيقولى إن سعر الدواء زاد وبقى بجنيه ونص بدل جنيه فقولتله ليه حرام عليكم أنتوا بتعملوا فى الناس كده ليه، راح الدكتور قالى أنت بتتكلم معايا كده ليه أنا شغال هنا، فقلت له إن الدواء كان عندك قبل الزيادة وأنت اللى بتطبق عليه الزيادة بمزاجك راح خد منى الدواء وقالى ملكش دواء عندى ما دام مش معاك حقه.
وأكمل المتهم: ماحسيتش بنفسى غير وأنا بزعق فيه وبقوله حرام عليكم يعنى الغلبان والفقير يموت فى البلد دى عشان مش معاه حق الدواء، أنتوا مفيش فى قلوبكم رحمة فراح بدأ يتجاهل كلامى ومعملش حساب لسنى وأنى قد أبوه وبدأ يسخر من فقرى فروحت ضاربه بحتة حديدة على رأسه ووقع على الأرض والناس اتلمت ونقلوه على المستشفى.
واختتم المتهم: كل اللى مزعلنى أنى عمرى ما كنت أتخيل أنى أضر أو أذى حد وأنى تسببت فى قتل شاب صغير وحرقت قلب أهله عليه، أنا عندى عيال وعارف قيمة الضنا كويس.
تلقى العقيد طارق حمزة، مفتش مباحث غرب الجيزة بلاغًا يفيد مقتل «عمرو. ح» 21 سنة، مساعد صيدلى ببولاق الدكرور.
وبإجراء التحريات تبين للرائد هانى الحسينى رئيس مباحث بولاق الدكرور أن المجنى عليه أثناء أداء عمله بصيدلية نشبت بينه مشادة كلامية وبين «أحمد. م» طباخ بسبب الخلاف على سعر الدواء، مما دفع الطباخ للاعتداء عليه بحديدة نتج عنه مقتله، وبإعداد كمين للمتهم تمكن النقيبان طارق مدحت وأيمن سكورى من ضبط المتهم، وحرر محضرًا بالواقعة وأخطر اللواء هشام العراقى مدير أمن الجيزة واللواء إبراهيم الديب مدير الإدارة العامة للمباحث وباشرت النيابة التحقيق، وأصدرت قرارها بحبس المتهم 4 أيام على ذمة التحقيقات.