طلب «سلفة» من شقيقه.. رفض فقتله ورماه فى "الزبالة"

تجرد قهوجى من مشاعر الرحمة والإنسانية، بعد أن وسوس له الشيطان بقتل أخيه أحمد فؤاد، 38 سنة، سايس سيارات، بعد مرور المتهم بضائقة مالية وطلبه من المجنى عليه إقراضه مبلغ من المال ورفض الأخير، ما أدى إلى مشادة كلامية بينهما، عاير خلالها المجنى عليه، المتهم، مما دفع الأخير لقتله انتقامًا لكرامته.
وقال المتهم سيد فؤاد (48 سنة/ قهوجى) فى اعترافاته أمام نيابة عابدين «ماكنتش عايز اقتله، قتل النفس مش سهل وده مهما حصل أخويا من لحمى ودمى، وطول عمرنا وأحنا حبايب، أنا لحد دلوقتى مش مصدق أنى عملت كده وأنى قتلت أخويا بأيدى ويتمت عياله، بس هو الشيطان منه لله، والظروف المهببة اللى البلد فيها، والحوجة اللى خلت أيدى تتمد بالشر على أخويا».
وأضاف «أنا شغال قهوجى باليومية والدنيا ملطشة معايا، ومراتى وعيالى محتاجين فلوس على طول، وبشتغل بدل الشغلانة اثنين وثلاثة عشان أقدر أكفى بيتى وبرضه مفيش فايدة، الدنيا مولعة والأسعار كل يوم فى زيادة وأنا مش عارف أعمل إيه ولا أجيب منين، استلفت من كل الناس رغم أن نفسى عزيزة أوى وعمرى ما طلبت حاجة من حد، بس الظروف هى اللى أجبرتنى أنى أمد أيدى واستلف من الناس عشان أعرف أصرف على بيتى وأكفيه».
واستطرد المتهم «بقيت عامل زى التور اللى مربوط فى الساقية من صباحية ربنا وأنا بجرى على أكل عيشى وبأحاول أقضى أى مصلحة عشان أجيب من وراها فلوس عشان أروح لعيالى وأفرحهم، بس طلبات العيال ما بتخلصشى ومهما اشتغلت برضه ما بقدرش أقضى طلبات بيتى وأسرتى».
وأكمل: «يوم الواقعة كنت محتاج فلوس عشان مصاريف العيال وروحت استلف من ناس حبايبى اشتكوا لى ضيق الحال، وفيه منهم طالبونى بالفلوس المتاخرة علىَّ، حسيت ساعتها إن الدنيا اسودت فى وشى وأنى قليل الحيلة، فقلت لنفسى أروح لأخويا الصغير استلف منه فلوس، هو برضه أخويا بدل ما الغريب بيكسفنى، وبعد ما روحت له فى الموقف اللى هو شغال فيه طلبت منه يسلفنى 300 جنيه عشان الظروف ملخبطة معايا وبيتى مفيش فيه ولا مليم وقلت له إنى روحت للغريب لكنهم كسفونى، لقيته رفض أنه يسلفنى وقال لى إنه برضه عنده بيت وعيال ومحتاجين للفلوس وأنهم أولى منى بالفلوس دى، وبعد ما اشتكيت له أنى بمر بأزمة مالية وأنى مفيش قدامى غيره، وأنى مش لاقى فلوس أأكل بها عيالى، راح قام وزعق لى وأهاننى وقالى أنت مش راجل، ما تعتمد على نفسك واصرف على بيتك زى ما كل الرجالة بتعمل وبتصرف».
واختتم: «حسيت ساعتها إن فى قلبى وجع ما يتوصفش، وصعبت على نفسى أوى، إزاى أخويا يعمل معايا كده ويهينى بالطريقة دى، إن كان هو مايقفش جنبى فى أزمتى أمال مين اللى يقف، والشيطان دخل لى من هنا وراح وسوس لى بأنى لازم أنتقم منه بعد ما فضحنى وأهاننى قدام الناس فى الموقف، فرحت رايح وجبت سكين ورجعت له تانى وقمت بطعنه 4 طعنات فى صدره وبطنه حتى لفظ أنفاسه الأخيرة وبعدما قتلته قعدت جنبه وصرخت استغيث بالناس وقلت لهم إنه مريض نفسى، وأنه ضرب نفسه بالسكينة عشان ينتحر».
بداية الواقعة بتلقى اللواء عادل الزنكلونى مدير الإدارة العامة لشرطة النجدة بلاغًا من الأهالى بالعثور على جثة شخص بمقلب قمامة بجوار سوق الإثنين بمنطقة عابدين، فانتقل رجال المباحث وعثروا على جثة (أحمد.ف – 38) سايس وبها 4 طعنات بالصدر والبطن وعثر على سلاح أبيض سكين وبه آثار دماء وقفاز.
وبسؤال شقيقه (سيد.ف - 48 سنة)، قهوجى مسجل خطر وسابق اتهامه فى 21 قضية، وكان متواجدًا بمكان العثور على الجثة، وأكد أن شقيقه المتوفى يعانى من مرض نفسى وهو من قام بطعن نفسه بالسكين بقصد الانتحار.
ومن خلال التحريات تبين عدم صحة رواية شقيق المجنى عليه وأنه وراء ارتكاب الواقعة بسبب مروره بضائقة مالية وطلبه من المجنى عليه قرضًا».
تم تحرير محضر بالواقعة وإحالته للنيابة التى أصدرت قرارها بحبس المتهم 4 أيام على ذمة التحقيقات.