صابر: صاحبى كان عايز يفتح «سايبر ».. قتلته

المتهم: أراد منافستى فى «أكل عيشى » وكسر زجاج محلى ودافعت عن قوت عيالى
المال فى زمن الضنك صار سببًا فى معظم الجرائم، وتجاوز الغرباء إلى أصدقاء الجيرة والعمر.
«صابر.ع»، 34 سنة، وشهرته سامبو صاحب محل سايبر، قاتل «محمد. ش» 24 سنة، صاحب محل بلاى ستيشن، قال فى اعترافاته أمام النيابة «معرفش أنا عملت كده إزاى، ده أحنا طول عمرنا وأحنا جيران وأكثر من الأخوات، كانت أمه بالنسبة لى زى أمى بالضبط، وأخواته هم أخواتى، بس منه لله الشيطان والظروف والفقر اللى خلونى أعمل كده، بس أنا والله ما كنش قصدى وما كنتش عايز ألمسه حتى، بس هو اللى بدأ وأنا كنت بأدافع عن نفسى».
وأضاف «عندى محل خدمات كمبيوتر وسايبر، وكنت بترزق منه، وبصرف بفلوسه على نفسى وعلى أهلى، والحياة طبعًا بقت صعبة والشغل مابقاش زى الأول، وهو كان عنده جنبى محل بلاى استيشن، وكان شغال وزى الفل والدنيا كانت ماشية معاه حلو جدًا، بس فى الفترة الأخيرة الدنيا غلست معاه شوية، ومش عليه هو بس على الناس كلها، فالمحل بتاعه مابقاش زى الأول وكان دائمًا بيقعد يشتكى ويقولى إن المحل مش جايب همه».
واستطرد المتهم «كنت دائمًا أواسيه وأقوله معلش بكرة الدنيا هتظبط وهترجع زى الأول وأحسن، وكنت ساعات كثيرة بساعده باللى أقدر عليه، عشان هو أخويا ولازم أقف فى ظهره، لأننا طول عمرنا وأحنا بنقف جنب بعض، وفى يوم الحادثة فوجئت به وأحنا قاعدين بنفطر مع بعض بأنه عايز يغير نشاط المحل بتاعه من بلاى استيشن إلى سايبر زيى، عشان بيقولى إن الشغل مابقاش جايب همه خلاص ومابقاش بيجيب له فلوس وإن مجال خدمات الكمبيوتر بيكسب وخصوصًا كتابة الرسائل العلمية والتصوير، فأنا قلت له بس أنت فاتح جنبى والشغل معايا برضه مابقاش زى الأول، وبقى قليل، وإن أنت لو غيرت نشاط المحل لسايبر كده أحنا هنقطع على بعض، وأنه بكده هيضرنى فى أكل عيشى وعيش عيالى».
واختتم «اتكلمت معاه بكل هدوء، لكنى فوجئت به بيزعق ويشتم ويقولى إنه بيشحت وأنه هايفتح سايبر غصب عنى وأنى ماليش دخل فى الموضوع، وفجأة اتحول إلى شخص تانى معرفوش وكأنه نسى أنى أخوه وصديق عمره وكنت أنا الوحيد اللى بقف جنبه فى أزماته، ولقيته راح على المحل بتاعى وفضل يكسر فى الزجاج وأجهزة الكمبيوتر والناس اتلمت علينا وحاولوا أنهم يخرجوه ويهدوه، وأنا مصاب بالذهول من رده وفعله المفاجئ وبعدين راح جاب سكينة من عنده فى المحل وضربنى بها فى رأسى، وكان عمال يضرب بيها بشكل عشوائى، خفت وقتها على نفسى ورحت ماسكها من أيده وهو بيحاول يخدها منى، فجت فى بطنه وراح وقع على الأرض غرقان فى دمه».
وتم تحويل المصاب إلى مستشفى قصر العينى بالقاهرة، وتوفى متأثرًا بإصابته، وتم التحفظ على الجثة بمشرحة المستشفى تحت تصرف النيابة.
وتم تحرير محضر بالواقعة لدى المقدم أحمد سامى رئيس مباحث قسم أول شبرا الخيمة، وأخطرت النيابة التى أصدرت قرارها بحبس المتهم 4 أيام على ذمة التحقيق.