طالب أكتوبر يقتل شقيقه بعد خناقة على «الشبشب»

جريمة بشعة أحداثها معقدة ومتشابكة التفاصيل شهدتها مدينة «السادس من أكتوبر»، بعد قيام طالب بقتل شقيقه، إثر مشادة كلامية اندلعت بينهما بسبب رش القاتل مياه على «شبشب» القتيل، ما دعا الأخير للتعدى عليه بالضرب، ودفع القاتل إلى التخلص منه بواسطة «سكين المطبخ».
وأمام المستشار عمرو مخلوف، رئيس نيابة أول أكتوبر، بدأ المتهم «عبد الرحمن. ع»، 17 عامًا، طالب، الإدلاء باعترافاته قائلاً: «مكنتش عايز اقتله لأنه فى الأول والآخر ده شقيقى، لكنه كان يضرب أمى، ويتعمد إهانتها، ويأخذ منها أموال علاجها لإنفاقها على مزاجه».
وأضاف «عبد الرحمن»: «والدتى ست مسنة ومريضة، ومحدش بيساعدها فى شغل البيت، ومعاش والدى قليل مبيكفيش العيش الحاف حتى، والأسعار كل يوم فى زيادة، وكل حاجة مولعة، عشان كده بحاول بجانب دراستى أنى اشتغل علشان أساعد والدتى وأجيب لها العلاج، لكن أخويا المخدرات لحست دماغه، ولا بيحس بأى حاجة.. وكنا كلنا عايشين له خدامين، حتى والدتى العجوزة، وهو ولا بيقدر ولا بيحس».
وأضاف المتهم راويًا ما حدث يوم الواقعة: «بعدما رجعت من المدرسة، لقيت أمى بتنظف البيت، وهى تعبانة جدًا ومش قادرة تتحرك.. صعبت علىَّ فقررت مساعدتها وأشيل عنها شوية، وكان أخويا نايم، أخذت منها المقشة وبدأت أنظف البيت، وأثناء التنظيف رميت مياه على الشبشب بتاع أخويا وهو برة الشقة، لأفاجئ به ينهال علىَّ بالضرب بطريقة عنيفة جدًا، وبيشتمنى بأفظع الشتائم».
وتابع: «حاولت أشرح له أنى ماقصدش أن شبشبه يتوسخ أو تيجى عليه طينة، راح شتمنى أنا وأمى ولما قولت له إن هو مش حاسس بحاجة ولا بظروفنا، ولا كأنه عايش معانا فى البيت ضربنى تانى، ومع محاولات والدتى للدفاع عنى دفعها بعنف ووقعها على الأرض، وتدخل الجيران وحاولوا يبعدوه عنى وعن أمى، وبعد ما نجحوا وهدأت الأمور رجعت تانى علشان أكمل تنظيف البيت».
واستكمل حديثه: «وأنا عند مدخل البيت سمعت صوت صراخ أمى فطلعت أجرى لقيت أخويا بيضربها وموقعها على الأرض، وبيضربها برجله، عشان عايز ياخذ منها فلوس علاجها يصرفها على الستات اللى يعرفهم والمخدرات»، واختتم: «لم أشعر بنفسى إلا وأنا بجرى على المطبخ، وبجيب منه سكينة وبضرب بها شقيقى فى صدره علشان أبعده عن أمى وأرحمها من ضربه، لأفاجئ به جثة هامدة على الأرض، وغرقان فى دمه.. حاولت إسعافه واتصلت بالوحدة الصحية فى أكتوبر، لكن كان خلاص فارق الحياة، منه لله ضيع نفسه وضيعنى معه، هاسيب أمى لمين وهى فى أشد الحاجة لحد يرعاها يشوف طلباتها؟».
وكان اللواء خالد شلبى، مدير مباحث الجيزة تلقى إخطارًا من الوحدة الصحية بمنطقة «ابنى بيتك» الخامسة بأكتوبر، بوصول «عزت. ع. م»، 22 عامًا، نقاش، جثة هامدة متأثرًا بإصابته بجرح نافذ بالصدر.
وكشفت تحريات العقيد رشدى همام، مفتش مباحث قطاع أكتوبر، أن مشادة كلامية نشبت بين المجنى عليه وشقيقه «عبد الرحمن»، 17 عامًا، طالب، تطورت إلى مشاجرة، تعدى خلالها الأخير على المجنى عليه بسكين مُحدثًا إصابته التى أودت بحياته.
وتمكن الرائد إسلام المهداوى، رئيس مباحث قسم ثالث أكتوبر، من ضبط المتهم والأداة المُستخدمة فى الجريمة، وأقر بجريمته. تحرر المحضر اللازم بالحادث، وأحاله اللواء هشام العراقى، مساعد وزير الداخلية لأمن الجيزة، إلى النيابة العامة للتحقيق.