صاحبة القضية: زوجى بيسخر منى وبيقولِّى الشغالة بتهتم بنفسها عنك

دعوى خلع غريبة، أقامتها زوجة شابة ضد زوجها لأنه أعجب بساق الخادمة.
الزوجه «ج.ع» 33 عامًا اتهمت زوجها «ش.ى» 38 عامًا، فى دعوى خلع أمام محكمة الأسرة، بأنه أهانها وجرح مشاعرها وأساء لأنوثتها، بعد أن أبدى إعجابه ب«رجل الخادمة وحلاوتها» أمامها، بحسب دعواها.
وقالت الزوجة «جوزى راجل عينه زايغة، مش مقدر إنى عينى طالعه فى الشغل وتربية الأولاد وخدمته ليل نهار، وهو رايق وفاضى وبيقارن بينى وبين الشغالة وبيعاكسها قدامى كمان، وبيتعمد دائما إهانتى وجرح مشاعرى».
وأضافت «يعنى هو الحق عليا إنى باساعده، هو مش حاسس بالغلا اللى احنا عايشين فيه، ده لولا مرتبى مع مرتبه ما كنش عرف يعيشنا ولا يربى الأولاد، واحدة غيرى كانت قعدت فى البيت وريحت نفسها من الشغل وتعبه وخليته يشتغل شغلانتين وثلاثة عشان يقدر يكفى طلبات بيته وأولاده، يبقى فى الآخر ده جزائى إنه يتريق علىَّ فى الرايحة والجاية».
وأكملت «أنا واحدة شقيانة فى الشغل ويا دوب بأروَّح عشان ألحق أعمل لقمة له وللأولاد وبعدين أقعد أذاكر لهم دروسهم بدل ما يخدوا دروس خصوصية، يعنى باحاول بأى شكل أنى أوفر له وأساعده وأقف جنبه، ما أنا ممكن أرمى الحمل كله عليه وأقعد فى البيت وأهتم بنفسى، ولكن ساعتها مش هيقدر يصرف على البيت وهنتحوج للغريب وهاحرم ولادى».
واستطردت «بدل ما يقّدر اللى بعمله عشان المركب تمشى بيتريق علىَّ أكثر من مرة، ولكننى كنت باعمل نفسى مرة مش واخدة بالى ومرة باخد الموضوع بهزار، لكن كنت باتضايق بينى وبين نفسى، طيب ما أنا ممكن أعايره بحاجات كتير لكنى ما بحبش أضايقه أو أضغط عليه، لكن هو عمره ما قدر وأصبح بخيل جدًا فى مشاعره معايا وكأننا عجزنا وبقى عندنا 100 سنة».
واختتمت «فى يوم الإجازة بجيب واحدة بتيجى تساعدنى فى تنظيف الشقة، وأكثر من مرة باقوله وقتها ينزل فى أى مكان، ولكنه كان بيتحجج بأنه مرهق طول الأسبوع وبيحب يريح فى يوم الإجازة بتاعته وأنا مينفعش اجيبها إلا فى يوم الإجازة عشان بأبقى مشغولة طول الأسبوع فى الشغل، ففوجئت به وهى شغالة بيسخر منى وبيقولى إن رجلين الشغالة أحلى من رجلى، وأنها بتهتم بنفسها عنى، وقتها قررت أننى مش هاقدر أعيش مع زوج بيتعمد إهانتى وبيسىء لأنوثتى، وقررت أرفع ضده دعوى خلع عشان أخلص من العيشة معاه».