كوكب نافوخى بنت عم كوشو

« هوليند كوشو» صديقتى اليابانية... بتدرس لغة عربية بقالها سبع سنين... وصديقة ليا عالفايسبوك من زمان....كانت فى زيارة لمصر للمرة الأولى فى حياتها....وقررت تجيلى فى المطرية زيارة ..... وده الديالوج اللى دار
- حمدالله ع السلامة... منورة شارع الخارجة يا غالية
• إزيك هيثم.. واضح إن عندكم كرنفال شعبى النهارده
- كرنفال !!! اشمعنا يا حجة ؟
• أصل وانا جايه لاقيت زحمة غريبة وسرب تكاتك وكلهم مشغلين أغانى شبه بعض، وكلهم كانوا بيطلعوا دماغهم بره التوكتوك لما بيشوفونى وبيقولولى كلمة وحدة (آيه يا حتة) فأنا قولت أكيد دى تحية الكرنفال مثلا
- اممممممم ده كرنفال عندنا بنعملو كل يوم يا هوليند.... اسمه كرنفال حمدى الوزير... وكرنفال هشام الحرامى بقى بيكون خميس وجمعة ... احنا شعب سعيد جداً أهوليند.
• واو.. بس ليه الموضوع مايتنظمش عن كده شويه... احنا عندنا نظام ومرور وتطور تكنولوجى اكتر من كده بكتير حتى فى الكرنفالات.
- دى حقيقة... بس احنا كمان متطورين عنكم بكتير فى حجات تانية
• متطورين !!! عننا !!!!! إزاى ؟؟؟؟
- بصى يا هوليند يا بنت عّم كوشو.. أنا بيعجبنى فيكى ثقافتك ونظرتك العميقة للأمور... مبدئيًا مافيش شك إنكم متطورين جدًا فى التكنولوجى والنظام المجتمعى عندكم.. بس إحنا بقى سابقينكم بكتير أوى فى التطور الإنسانى، إنتو لا تعترفون بدين أو إله أو ثواب أو عقاب أو جنة أو نار، إيه قيمة ان الإنسان يعيش فى تقدم تكنولوجى لمدة خمسين ستين سنة وبعد كده يكتشف إنه كان أجهل خلق الله بخالقهم، بالعكس ده تأخر وسطحية وجودية.
• بص يا هيثم، هو لو فعلا فى إله وثواب وعقاب زى ما بتقول كده يبقى إنت عندك حق فى كل كلامك.
- أنا سعيد جدًا بإجابتك ال.........ثوانى........إنتا ياض يابن اللذينا يا كلب ياللى بتعمل حمام فى الشارع... إنتا مش شايف فى ناس واقفة....!