يوميات عم بخ الست مفتاح الفرج

أول حاجة أحب أقولها تحياتى لكل إمرأة..تحياتى لكل واحدة مستحملة واحد مصرى.. مستحملة واحد شايل الهم، واحد مبيفكرش غير إزاى يجيب فلوس عشان الأكل والشرب واحد حياته كلها شغل عشان يجيب تمن علاج للولاد أو يجيب قرشين عشان مصاريف المدارس والدروس.. تحياتى لكل إمرأة تبتسم فى وجه زوجها وقت الشدة .. الست مفتاح الفرج الست هى اللى تقدر تخلى الحياة حلوة أو العكس. الست هى اللى تقدر تربيلنا أجيال تطالب بحقوقها.. الست بالنسبة لى مكالمة منها وانا فى الشغل تقوللى ترجع بالسلامة.. الست هى الاحتواء والاحتضان هى الطيبة والحنية هى الرومانسية هى الفضفضة هى الحكاوى والذكريات هى الحب هى الاحترام هى التدين هى اللى تقدر توقف كل واحد عند حده.. المرأة بالنسبة لى مجتمع كامل.. هى حكم المباراة فى المنزل ودايما بتكون عادلة.. هى الطير اللى مبيقفش غير بليل عشان تريح شوية عشان تتواصل اليوم التانى.. المرأة هى التعبانة ومبتشكيش هى السهرانة وبتذاكر المناهج أكتر من ولادها عشان تقدر تتواصل معاهم فى المذاكرة.. هى اللى بتصحى من بدرى عشان تنزل تجيب اللبن والفينو عشان الولاد.. هى الحصالة وقت ما تكون العملية منغنغة شوية.. هى البنك لما تكون الدنيا قحط معايا أصلها بتعرف إزاى تدبر أمورها فبتحوش واللى بتحوشه مش ليها للبيت وللعيال.. المرأة بالنسبة لى فستان جديد رخيص بس عليها غالى لإن هى عارفة قيمة نفسها.. المرأة هى اللى لما تكون مخنوق تطبطب عليك.. ياريت الناس متبصش للمرأة نظرة شهوانية ويبصلها نظرة عقلانية.. ياريت بس يبقى فيه مساواة وهتشوفوا المرأة دورها هيبقى عامل إزاى.. فى بنات ممكن تشوفوها تقولوا عليها مش كويسة أو أو أو.. لكن جربوا تقعدوا تتكلوا معاهم مرة بضمير مرة من غير رغبة.. مرة كإنسانة.. هتلاقوا إن المجتمع ومشاكل البيت والأسرة هى اللى عملت فيها كده.. اللى إتجوزت صغيرة واللى إطلقت بدرى واللى أبوها سابها ومتعرفش عنه حاجة واللى أمها مش مهتمة بها.