لو أطفالك بيضربوا بعض دايما.. تخلصي من "خناقاتهم" بحل بسيط

تعاني الكثير من الأمهات من "خناقات" أطفالهن على مدار اليوم، مما يؤدي إلى توتر وعصبية الأمهات.
وكشف الدكتور أشرف قاسم، أخصائي طب الأطفال وحديثي الولادة، طريقة التعامل مع "خناقات" أبنائهن.
وقال "قاسم"، خلال منشور عبر صفحته الرسمية على موقع التواصل الاجتماعي "فيس بوك"، "ولادكم بيتخانقوا مع بعض… بيشتموا بعض؟، بيضربوا بعض؟، تتصرفي ازاي معاهم؟".
وتابع: "الأول لازم نعرف هما بيعملوا كده ليه، كل واحد فيهم ببساطة بيحاول يثبت وجوده ليكم و أحقيته فيكم قبل أي حاجة مادية بيتخانق عليها، أيوة كل واحد فيهم بيقولكم شوفوني… إسمعوني … أنا أهو".
طريقة التعامل الصحيحة مع "خناقات" الأبناء
وأوضح طريقة التعامل في هذه المواقف، قائلًا: "هتتصرفي إزاي طيب؟، ما تثيروش الغيرة بينهم بالمقارنات مين أشطر من مين و مين أجمل من مين، بلاش الحب المشروط، إنتم بتحبوهم مهما كانت درجاتهم في المدرسة بغلاستهم بشقاوتهم".
وأضاف: "الطرف اللي هتعاقبوه حتى لو فعلاً غلطان مش هتتخيلوا كمية الحقد اللي هايحس بيها، وكل اللي هايترسخ في دماغه إنكم بتحبوا أخوه أو أخته أكتر منه، عشان كده عاقبتوه و لذلك مش هايبطل يكرر اللي بيعمله علشان بس تتعاملوا معاه بطريقة مختلفة، وفي الوقت دا بس هايحس إنكم بدأتم تشوفوه و تحسوا بيه و هايتغير".
واستكمل: "حطوا نفسكم مكانهم … فكروا بمنطقهم الطفولي مش بمنطقكم إنتم اللي إتكون وإتطور بعد سنين وسنين من التجارب والفشل والنجاح و الخبرة، خليكم وسيط خير بينهم وخليهم يتناقشوا في اللي عملوه مع بعض و يتحاسبوا و يتصافوا والغلطان يعوض الطرف التاني بالطريقة اللي ترضيه، إنتم دوركم فقط إدارة الحوار و المحافظة على هدوئهم، بلاش تسمعوا شكاويهم من بعض و تبنوا عليها قرارات بالعقاب، هتعودوهم يبقوا فتانين وأندال في حق بعض، اللي عنده شكوى لنفسه يتفضل حبيبي و كفاءة و هساعده …غير كده هايتعاقب".
أهمية اللعب المشترك بين الأبناء
واستطرد: "خليهم يلعبوا لعب مشتركة، مكعبات، بازل، شطرنج، دومينو، هايختلفوا كتير وهايتعلموا من الإختلاف بطريقة عملية، الخناق والإختلاف بين الإخوات حاجة طبيعية جدًا، بس إحنا بتصرفاتنا الغلط ومن غير ما ناخد بالنا بنزود الفجوة بينهم، وممكن نوصل إننا نكرههم في بعض، إنتم بالنسبة ليهم همزة الوصل اللي بتوصل و بتوثق أواصر الحب و الثقة بينهم، و دا مش ضمان إنهم مش هايختلفوا لما يكبروا، لأ هايختلفوا و هايتخانقوا بس عمرهم ما هيأذوا بعض و لا يخونوا بعض و هايفضلوا دائما على قلب رجل واحد".