محمد نجاتي يقرر مقاضاة زوج منة عرفة.. لهذا السبب

أعلن الفنان محمد نجاتي، عن مقاضاته للفنان محمود المهدي زوج الفنانة منة عرفة بسبب الزج باسمه بأنه سبب الانفصال بينه وبين زوجته.
أضاف نجاتي، خلال التصريحات الصحفية، أنه سيتقدم بشكوى للنقابة ويترك الأمر لهم في التعامل فيما قالته منة عرفة بأنها مضت عقود بمنع اللمس، وإثارة زوجها الجدل بتصريحه حول أنه تسبب في انفصالهما بسبب مشهد جس النبض.
تابع نجاتي، "بتقول مضيت عقد بمنع اللمس هو احنا بنصور فيلم إيه! قلت لها احترم كلامك لكن مفيش حاجة اسمها أنك ماضية أن محدش يجس نبضك، لكن محدش يشيلك ده شيء يرجع لك وبالفعل لم نصور مشهد الشيل".
وكانت أعلنت الفنانة منة عرفة، عودتها لزوجها الفنان محمود المهدي بعد انفصال لمدة يومين، من خلال حسابها الشخصي بموقع تبادل الصور والفيديوهات "انستجرام".
كتبت منة، "من أصعب اللحظات اللي ممكن تعدي على أي ست، لحظة الانفصال وخراب البيت، الطلاق بيهتز له عرش الرحمن، لكن أنتم يمكن عشان بتسمعوا عن بيوت بتتخرب كل دقيقة؛ فبقى أبغض الحلال عليها، رهان بتعملوه مع بعض على إننا مش هنكمل، أو مادة خام للشماتة فينا"
أضافت، "خراب البيت عمره ما كان حاجة سهلة على الست أو على الرجل أو على أهالينا، في عز ضعفي وحزني وكسرتي، اللي ربنا ما يكتبه على أي ست، ما رحمتونيش، ولا قدَّرتوا إني في موقف لا أُحسد عليه، وشمتانين فينا، قد إيه أنتم ناس ما تعرفوش ربنا، ولا في قلوبكم رحمة".
تابعت منة، "اتمنوا الخير لبعض يا جماعة، بلاش نشمت في بعض، لكن دي غلطي أنا، إني شاركتكوا حياتي الشخصية، الإنسان بيغلط عشان يتعلم، وأنا اتعلمت، ربنا يعينكوا على نفسيتكم الجحيم دي، وعسى أن تكرهوا شيئا وهو خير لكم".
واختتمت حديثها قائلةً: "يمكن الخلاف اللي حصل؛ كشف لنا ناس كتير حوالينا، كانوا بيمثلوا إنهم فرحانين لينا، بس الحقيقي إنهم كانوا مستنيين أول مشكلة؛ عشان يشمتوا في كسرتي وخراب بيتي، بس والله ربنا مش هينولهالكوا، وربنا يخلي أهلي وزوجي، والناس اللي بتتمنى لي الخير، ووقفت جمبي، وكلمة أخيرة للسادة الصحفيين، أرجوكم كفاية بقى، ارحمونا، حرام عليكم.

أخبار الفنمحمد نجاتيمحمود المهديمنة عرفة