الطيار الموقوف بسبب محمد رمضان: "الفنان شوه سمعتي وتاريخي"

كشف الكابتن طيار أشرف أبو اليسر، الطيار الموقوف بسبب الفنان محمد رمضان، تفاصيل الواقعة، قائلًا: "أنا مكنش في دماغي أظهر على الميديا وأشتكي لاني أتوجعت أكتر من اللازم والموضع أخد أكتر من حدة".
وأضاف أبو اليسر، خلال برنامج "مصر في القلب"، المذاع على فضائية المحور، اليوم الخميس،: "الموضوع في البداية كنا في رحلة من القاهرة للرياض داخل طائرة خاصة، وكان معانا محمد رمضان وأخوه ومسئول من شركة روتانا والمصور الخاص به، الكرسي اللي قعد عليه محمد رمضان هو كرسي مساعد الطيار وهو لا يُشكل أي خطورة على سلامة الركاب ولا يوجد من خلاله تحكم في الطائرة لأنني من أتحكم في الطائرة"، متابعًا: "المساعد الخاص راح الحمام في آخر الطائرة ومحمد رمضان حضر لالتقاط صورة داخل قمرة القيادة".
وأضاف: "رمضان دخل والكرسي كان فاضي وقعد وقالي بعد إذنك هاخد لقطة للذكرى أفرجها لأبني فوافقت لأنه أدبًأ مني مينفعش أقوله قوم، لكن طلبت منه ميحطش أيده على الكنترول ووضع يده فقط على المقود.. قولتله مفيش مشكلة لأنني من أتحكم في قيادة الطائرة، فطلبت منه بعد التقاط الصورة إنها تكون لنفسه وليس للإعلان والنشر في صفحته.. فقالي لا خالص".
وتابع: "اتفاجئت لقيت في نفس اليوم بليل، مساعدي بيكلمني بيقولي الصورة اللي صورها محمد رمضان طلعت فيديو ونزلها على صفحته، لأنا أول ما شوفت الصورة عرفت أخرتها أيه، هذا تصرف غير مسئول منه"، مستطردًا: "محمد رمضان كنا راجعين في نفس الطايرة، ودخلته وكلمته قولتله اللي انتا عملته ده هيقفل بيوت ناس كتير وهتخرب بيوتهم مش بيوتي أنا لوحدي، ناس كتيرة تأذيت من الفيديو.. قالي أنا هشيلها، قولتله تشيلها إزاي دي عليها ملايين المشاهدات.. قالي أنا ليا علاقتي واتصالاتي بسادة وزراء وهحل المشكلة، قولتله اللي أنت بتقوله ده على عيني وعلى رأسي لكنه لن يجدي نفعًا لأن هناك قانون يحكم وينظم عملية الطيران".
وأكد: "محمد رمضان شوه صورتي وشكلي ومنظري وسمعتي وتاريخي في الطيران، ويصعب عليا بدل ما أخرج متكرم، أخرج بإيقاف عن الطيران مدى الحياة وسحب الرخصة مني"، وأقسم بالله اللي بيقول أني قولت للمساعد بتاعي قوم عشان محمد رمضان يقعد، أقسم بالله ما حصل والمساعد اسمه إيهاب حافظ وممكن الناس تسأله، والكلام اللي في الفيديو صوت المصور بتاع محمد رمضان وليس صوتي، لأن مفيش طيار بيقول لفظ سايق أثناء قيادة الطائرة".
وأوضح: "لازم الناس تبقى عارفة أن الطائرة لما تبقى رايحة أي رحلة، بنبقى في فضاء جوي مراقب، بمعنى ان الطيارة لو هتخرج عن مسارها 10 سنتي هتلاقي ألف واحد في الرادار بيوقلك بتعمل أيه".