إمام بالأوقاف يفضح التاريخ السري للشيخ "ميزو"

ذكر الشيخ أحمد البهي، منسق حركة "أئمة بلا قيود" قصته مع الشيخ محمد عبد الله نصر الشهر ب"ميزو" قائلًا: أول مرة قابلته كان بمدينة "كفر الدوار" بالبحيرة عام 2011م عقب الثورة وجاء ليقابلني مع مجموعة من زملائي الأئمة لتحفيزنا للذهاب للتظاهر ضد شيخ الأزهر "المظاهرة دي كان بينظمها أئمة إخوان بالقاهرة بتمويل مالي من الجماعة"، وترك لنا حوالي 100 منشور لتوزيعها على الناس وقال لي: "العدد اللي هتجهزه من أتوبيسات هاحاسبك عليه!"، قلت له: "الأتوبيس تكلفته بتوصل 700 ج لنقلنا للقاهرة"، قال لي: "لو جهزت 10 أتوبيسات كمان، هاديلك فلوسهم!"، "بصراحة تعجبنا من مسألة التمويل وقلنا شغال لحساب مين؟ ولم يذهب منا أحد".
وأضاف: "نصر" قال في قناة دريم: "عمري ما انتميت لحزب أو جماعة مع إنه كان قايل لنا بلسانه إنه عضو في حزب التجمع! وقال أنا إسلامي يساري.. ساعتها استغربنا م التعريف الجديد ده، حاجة كده زي أهلاوي زملكاوي.. مش عيب لما يكون لك توجه سياسي، بس العيب لما تكون كداب".
وتابع "البهي": "في عام 2012م عينت وزارة الأوقاف من نجحوا في المسابقات قبل الثورة والذين تم استبعادهم أمنيًا.. راح عشان يتعين لقى نفسه كان ساقط أصلًا؛ يعنى الأمن لم يرفضه ولم يستبعده، بالتالي ليس من حقه التعيين، فهدد بحرق نفسه في ميدان التحرير وكتب كده على موقع التواصل الاجتماعي "فيس بوك"، وحكى ظروفه المادية شديدة القسوة، وكاد يتسول من القراء، ساعتها كلمته وحاولت أتوسط بينه وبين مسئولين والوساطة لم تنجح وهو لم يحرق نفسه".
وقال: "حكى لي عن فترة تعيينه كإمام بدولة الكويت واللي استمرت لمدة 6 شهور بس "هو اللي حكى لي وماعرفش هل كان كلامه صح أم لا؟، ورجع بعدما اكتشفوا إصابته بڤيروس C وقال لي نصًا: كان الأمير يدخل عليا المسجد فأسلم عليه وأبوسه بين عينيه يديني "نفحة" محترمة.. فالموقف ده يؤكدلنا قد إيه هو لا يفرق معاه سلطة أو معارضة، ظلام أو تنوير.. هو بس بتاع فلوس
ولما رجع من الكويت عاش فترة سوداوية بمعنى الكلمة لظروفه المادية لدرجة إنه قام بفسخ خطوبته لتعثره ماديًا.. بس السؤال دلوقتي: مين حاليًا بيصرف عليه؟ هو أساسًا مابيشتغلش ولا موظف!.. للعلم الزي الأزهري الكامل يتكلف حوالي 1000 ج... ممكن تدخل ع اليوتيوب وتعد حلقاته وتشوف إنه كل حلقة بزي مختلف، وفي عام 2012 تم فصله من حركة "أزهريون بلا حدود" نظرًا لبذاءة لسانه في خطب الجمعة في التحرير"، وتم ضبطه متلبسًا بسرقة مقالات الكاتب محمد الدويك ونسبها لنفسه بفجاجة تحت سلسلة اسمها كبسولات تنويرية، وبعد كده قدم مبررات سخيفة للي حصل".
واستطرد "البهي" قائلًا: "معلوماته عن الدين سطحية لدرجة السذاجة، ولا يعرف إلا أسلوب التلويش والتشويش ع المخالف، مفيش منهجية، مفيش علم، ودايمًا بيقول "نتحاكم للقرآن" مع إن اتسرب له فيديو مؤخرًا بيقول فيه: احنا منقدرش ننتقد القرآن دلوقتي عشان الناس مش هتقبل مننا كده.. ودايمًا بيقول إنَّه لا يخاف الموت ومستعد للسجن والمواجهة وكلام مجعلص كده مع إنَّه في برنامج مقالب اسمه "يا ثورة ما تمت" استخبى تحت الكرسي وقام بالتوقيع على استمارة "تجرد" لما عملوا عليه تمثيلية هجوم مسلح".
وأضاف: "كل اللي ذكرته أقسم بالله على صحته كلمة كلمة، واللي مش واثق منه لم أذكره، زي قصة تسميته ب"ميزو"، وقصة إلحاده منذ عامين.. ميزو لحد النهاردة فاكرني وعارفني كويس وعارف أنا مين، وياما شكر فيا وقال لي: إنت من الناس الكويسة واللي فكرها معتدل، وكان فيه رسايل بيني وبينه على صفحته القديمة اللي لغاها تؤكد هذا الكلام".
وتابع: "كنت في مرة قاعد مع أحد القساوسة في فندق بالقاهرة وبنتفرج على التلفزيون وطلع عليه ميزو، فصديقي القمص قال لي: الشيخ ده معتدل وتنويري، قلت له: تنويري مين يا ابونا؟، وكانت الحلقة دي اللي قال فيها إن ممارسة الجنس دون زواج حلال ما دام الحب موجود بين الطرفين.. ساعتها أبونا بص لي وضحك وقال لي: "الله يخرب بيت البعيد"".
وأوضح "البهي": "من الآخر هو شخص فاضي باحث عن شهرة ومال، واستطاع بالفعل الوصول لبعض ما يريد، ولكن سيذوب بسرعة لأن مؤهلاته لا تسعفه ولن يكون عشر معشار من سبقوه واختفوا سريعًا".