محمد موسى يحتفي بالمتحف المصري على طريقته الخاصة.. فيديو

قال الإعلامي محمد موسى في مقدمة مؤثرة بمناسبة افتتاح المتحف المصري الكبير:بُكرة مش مجرد حدث أثري أو افتتاح مكان جديد... بُكرة هو بداية لعصر مختلف، مصر بتفتح بوابة جديدة للمستقبل من قلب التاريخ نفسه.
المتحف المصري الكبير مش حلم عابر، ده إنجاز العالم كله كان منتظره، واتحقق على أرض الحضارة عشان يثبت إن التاريخ عندنا مش حكاية انتهت... لكنه حاضر بيتجدد ومستقبل بيتمدد كل يوم."
وأضاف محمد موسى خلال تقديم برنامج "خط أحمر" على قناة الحدث اليوم، منطقة الأهرامات، اللي كانت من آلاف السنين رمزًا للعظمة، بترجع النهارده تبهر العالم من جديد، مش بس بعظمة آثارها القديمة، لكن بالعلم، والتكنولوجيا، والتصميم الفريد اللي بيجسد قدرة مصر على الجمع بين الأصالة والحداثة."
وتابع: "المتحف المصري الكبير مش بس أكبر متحف في العالم، لكنه شاهد على عبقرية مصر الحديثة، بيضم أكتر من 130 ألف قطعة أثرية، منها الكنوز اللي ما اتعرضتش قبل كده، وعلى رأسها المجموعة الكاملة للملك توت عنخ آمون، اللي بتجتمع لأول مرة من يوم اكتشافها."
وأكد موسى أن ما يحدث اليوم ليس مصادفة، بل ثمرة رؤية قيادة تدرك قيمة التاريخ وتستثمر في قوتها الناعمة التي تميّز مصر عن كل دول العالم، مضيفا:
"ده مشروع ما بيحافظش على التراث بس، ده مشروع بيعيد صياغة صورة مصر قدام العالم، وبيأكد إننا مش بس أصحاب أقدم حضارة، لكن كمان عندنا القدرة نعرضها بأحدث أسلوب وأرقى شكل."
واختتم كلماته قائلًا: مصر النهارده ما بتستعرضش ماضيها، لكنها بتقدم درس جديد في إزاي نحول التاريخ لطاقة حضارية واقتصادية وسياحية، تخلي كل اللي يزور أرضها يقول:
هنا بدأت الحكاية... ولسه بتكمل.. من قلب المتحف المصري الكبير، بتبدأ رحلة جديدة، رحلة وطن بيحكي للعالم إنه ما زال يصنع التاريخ... اسمه مصر، والتاريخ عنده دايمًا عايش."