محمد صلاح: يا مساء الخير بيتقال عندنا ثلث آثار العالم البعض بيقول إن الثلث في الأقصر لوحدها الآثار كانت على زمن جاي يفهم ويقدر ويفك الطلاسم اللي فك الطلاسم دي كان علماء مصريين وأجانب يجي لها من الكون كله يقف قدام عظمتها مش بس الآثار الفرعونية إنما الرومانية واليونانية والمسيحية والإسلامية ولو وسعنا خيالنا يمكن نرصد خطوات العظماء على التراب اللي بنمشي عليه من غير ما ناخد بالنا خطوات الفراعنة والقياصرة والأباطرة خطوات موسى والمسيح الطفل وأمه مريم ، خطوات الصحابة وأولياء الله الصالحين .. كل زمن من دول كان له بُناته البناءون العظام من أصغر عامل ساهم في رفع حجر من أحجار الأهرامات إلى باني مسجد عمرو بن العاص ، من كاهن حضر مومياء للعالم الآخر إلى مصمم مأذنة احمد أبن طولون تراكمت على أيدهم وفكرهم وحبهم الآثار الشاهدة والحافظة للعصور واللي شكلت في النهاية بوتقة انصهرت فىا عبقريات بشرية فكرها حير ومازال العالم كله .. التراث الثقافي والأثري في مصر مش بس بكترته إنما بتميزة وتفردة عن غيره من ثقافات وآثار الشعوب من أبو الهول لكنيسة القيامة ولوحات ووجوه الفيوم من معبد أبو سمبل للمسرح الروماني من الأهرامات للجامع الأزهر ومن معبد الكرنك وطريق الكباش الى شارع المعز لدين الله الفاطمي ومن ورق البردي لحجر رشيد امتزجت الاثار بالناس وعشنا في فسيفساء في لوحة لا يمكن تتكرر لكن اللوحة دي بقى فىا حاجات تانية فىا سرقة اثار وتجارة محرمة فىا اعتداء من البشر احنا يعني على الاثر من عدم الوعي من الطمع فىا مشاكل الاثريين واوجاعهم الاثار المصرية وضعها ايه النهاردة بنمر عليها ازاي وازاي هنتركها وهي الوديعة عندنا للاجيال الل جاية هنضيف هنحافظ هنطور ولاّ هنهمل ونبهدل هنتثقف أثريا عشان كل جيل مننا حارس والحارس لازم يكون أمين .. الآثار إدارتنا أحلامنا بيها وأحلامنا ليها ثقافتها ومشاكلها سفرها وفُرجتها عوائدنا منها وحقها علينا اثار مصر هيكون لينا عنها النهاردة كلام ....... مسئول فاصل محمد صلاح: كان طبيعي مصر الخمسة الاف او السبعة الاف سنة تسيب الاثار العظيمة دي امال كنا بنعمل ايه في السنين دي كلها لكن الاثار دي لانها اكتشفت على ايدي مغامرين ومكتشفين اجانب اخدوا منها نسبة حسب القانون زمان البعض هرب حاجات وتاجر وكسب الملايين او حولوها لمتاحف بلادهم كانها خسارة فينا يعني طبعا كانت خسارة لينا لكن اليأس خدنا احيانا لدرجة فكر البعض نسيبها في المعارض الحلوة برة اهه متشافة ومتصانة في شوارع ايطاليا وفرنسا وفي متاحف امريكا وايطاليا والمانيا لكن العالم كله اتفق على رد الاثار لبلادها ودا رجع لينا الاف القطع المتهربة ولسه حاجات تانية مهمة ونادرة بنكافح فىا معركة استرداد الاثار ووضع البعثات الأجنبية اخضاع اثارنا حجارة ومومياوات لاحدث ما توصل اليه البحث العلمي المتاحف الترميم الزيارات والزائرين هيكون لينا معاها النهاردة مع الامين العام لمجلس الاعلى للاثار الدكتور زاهي حواس كلام مسئول .. من كلام الدكتور زاهي حواس "الحديث عن التنازل عن استرداد أي اثار تعود ملكيتها لمصر لا اساس له من الصحة ومصر استردت نحو 6 الاف قطعة اثرية خلال السنوات الست الماضية" ، "كنت اشعر بالرهبة قبل دقائق من قدوم اوباما الى اهرامات الجيزة لكن بساطة الرئيس الامريكي جعلتني اشعر انه صديق" "فخور بشباب الأثريين الذين يبهرون العالم بما يكتشفونه بعدما كان الأثريون الأجانب قديما الذين وحدهم يقومون بالحفائر ويقدرون اثارنا ويفهمون كيفية التعامل معها اقدر منا هذه كانت قضيتي ان نكتشف تاريخنا وتراثنا بايدينا وليس بايدي الغير" "ليس من المنطقي ان يعترض احد على مسالة ترميم الاثار اليهودية في مصر لانها في النهاية اثار مصرية مثلها مثل الاثار الإسلامية والقبطية وتمثل جزءا مهما من تاريخ مصر وليس تاريخ اسرائيل" .. وأخيرا قال الدكتور زاهي حواس "لست مع فكرة انشاء وزارة مستقلة للاثار ولكنني متحيز لعدم تبعية المجلس الاعلى للاثار لوزارة بعينها لان العمل بالاثار له طبيعة خاصة تتعارض مع الروتين والإجراءات الحكومية " ... طول ما الاثر فى مشاكل الاثار المصرية الراسخة امامها تحديات العملية اكبر من مجلس ولاّ هيئة ولاّ وزارة واكبر من حد بيحفر بالصدفة او بالقصد ويلقى الكنز تحت بيته الاثار تاريخ شعب وتراث انسانية المخاطر اللي بتواجهها الاثار المصرية الطريقة اللي بتندار بيها العنصر البشري اللي بيتعامل مع البشر اكتشافا وترميما احسن حماية الجيرة والزيارة الاثر جوه الوطن ولا الوطن جوه الاثر الدكتور زاهي حواس الامين العام للمجلس الاعلى للاثار هيكون لينا معاه دلوقت كلام .... مسئول فاصل محمد صلاح: أرحب بالأمين العام لمجلس الأعلى للآثار الدكتور زاهي حواس .. دكتور زاهي انت اكتر الناس بحكم عملك وخبراتك اللي بيسافروا كتير بره وفي نفس الوقت اجانب كتير بتتعامل وتتعاطى معاهم بشكل دائم مستمر منذ سنوات على خلفية واقعة الشهيدة مروة الشربيني عندي سؤال هل الاجانب بيحبوا اثارنا بيحبوا تراثنا بيحبوا الفراعنة والعصور الاسلامية والمسيحية والرومانية وغيرها والاثار اللي موجودة هنا لكن بيكرهونا احنا يعني ؟ الدكتور/ زاهي حواس - الأمين العام للمجلس الأعلى للآثار: لا ..الكلام دا مش مظبوط يعني اقولك حاجة انا كل الناس اللي اعرفهم يعني في عشق ليس فقط لمصر الفرعونية عشق لنا كمصرين لكن طبعا اللي حصل للمرحومة مروة حصل من فرد مش معناه ان كل الالمان بيكرهونا اطلاقا زي عندنا في بعض الناس اللي هما بيعملوا حاجات ارهابية مش معناها ان مصر كلها ارهابية انا مش عايز ناخد هذا الموقف ضد الشعب الالماني اطلاقا ولازم نعرف ان الالمان شعب بيحب مصر جدا بيعشوا المصريين ويعشقوا الحضارة الفرعونية لكن اللي تم من الاخ اللي حصل في المحكمة دا انا بعتبره حادثة غريبة على الالمان زي ما بيحصل عندنا في بعض الاحيان لما انا بشوف حاجة بتحصل ارهابية لا اتصور ان دا ممكن يحصل للشعب المصري اطلاقا لان الشعب المصري طول عمره شعب كريم جميل محمد صلاح: على خلفية انت بتشتغل شغلانة مليانة كلام عن المهربين والنصابين عن العاشقين للاثار واللي ما بيفهموش فىا عن الهواة والمغامرين ممكن حد يشوف انه خبير الاثار دا راجل عبقري زي ما ناس كتير معتبرة عبقري للاثار المصرية لكن فى ناس تانية ممكن تشوفك حاجة تانية يعني مش عايز اقولها ايه سر العمل في الاثار ايه اللغز للي بيشتغل في الاثار د/ زاهي حواس: احنا بنعمل في الماضي بنعمل في سبيل ان احنا نظهر الحضارة العظيمة وجمال الحضارة العظيمة في بعض بيبقى عنده عشق للاثار انا شخصيا بعتقد ان انا عاشق للاثار الفرعونية والعشق دا ممكن تشوفه لو انا بتكلم عن الاثار تحس بالموضوع دا السبب المباشر اللي بتعتقد ان احنا بنختلف عن الناس محمد صلاح: دكتور زاهي حواس رجع من يومين تلاتة من امريكا وكان بيحضر معرض للملك توت عنخ امون الدكتور زاهي حواس طبعا " كلّيم" بيتكلم في موضوعات متعددة خصوصا الموضوعات المتعلقة بالاثار تلت اربع ايام لان انا حضرت افتتاح المعرض وفاعلياته اكتر من 10 خطب كل مرة كان بيتكلم كلام غير التاني النهاردة اكيد هتتكلم كلام عاشر بقى مش كده انت مهارة الكلام دي جبتها منين ؟ د/ زاهي حواس: والله حاجة من عند ربنا انت لما تتكلم في امريكا لازم يبقى فى ادوات عندك عشان تبهر هذا الشعب شعب صعب جدا انك انت تبهره لكن احنا عندنا ادوات الحضارة الفرعونية الفرعون الذهبي توت عنخ امون عليه اقبال شديد جدا طلعنا الاشعة المقطعية بتاعته وطلع انه مات عنده 19 سنة ومات ازاي حصل له حادثة قبل ما يموت في رجله لكن الحادثة دي على فكرة لما لقينا في رجله الشمال قطع موجود واعتقدنا ان القطع دا حادثة حصلت له طبقا لكلام علماء الاشعة المقطعية قبل ما يموت يوم الناس قالوا الحادثة دي لا يمكن ان هي تكفي لموته الحاجة الجميلة ان احنا طلعنا ادلة جديدة بتبين ليه توت عنخ امون عثر فىا على 133 عصاية كان بيمشي على العصاية وفى منظر جميل جدا لو انا خدتك المتحف المصري تشوفه هو وزوجته وهو ماسك عصاية ..مسك العصاية دا يدل 100% ان كان عنده اصابة في قدمه ياليمين يالشمال ودي من الحاجات الحقيقة اللي بنبحث عنها دلوقت عشان نبين ايه بالظبط هل توت عنخ امون مات ميتة طبيعية ولا اتقتل محمد صلاح: الاثار مهنة تظل بتعمل في محال البحث التنقيب والحفر والبحث عن الاثار المدفونة لكن عندنا الاثار الموجودة برة من كام يوم انت كتبت مقال في صحيفة الاهرام رديت على مواطن مصري اتكلم على اثار موجودة في احد المتاحف البريطانية وانه عندهم استعداد يرجعوها مصر وانك مقصر في استلام هذه لااثار انت رديت وعرفنا انك انت مش مقصر ولا حاجة لكن يظل الدكتور زاهي مسالة وجود الاثار في الخارج لغز المفروض ان اليونسكو قرر اعادة كل الاثار الى بلادها فى مشكلة تتعلق بالاثار المسروقة ولاّ المشكلة تتعلق بالاثار اللي تم بيعها وفقا للقانون ؟ د/ زاهي حواس: انا عايز اقولك حاجة يعني عشان افسر الكلام لازم تعرف حاجة مهمة جدا ان اثارنا انت تباع رسميا يعني بتجيب كونتينر بتحط فى اثار وتروح المتحف المصري ، المتحف المصري يقول قطعة كذا وقطعة كذا ويديك ختم ويطلع الاثار برة القانون كان بيسمح حتى عام 83 كان هناك تجار اسمه تاجر اثار وكان المتحف المصري في صالة مبيعات بتبيع الاثار المقررة فاذا كل الاثار اللي موجودة في الخارج مش اثار مسروقة لكن انت لما فى اثار مسروقة وعندك دليل ان الاثار مسروقة بتقدر ترجعها واحنا رجعنا اكتر من 5500 قطعة اثرية عندنا 6 قطع اثرية كانوا زمان من شهر رحت متحف ترينو بشوف دايما تمثال رمسيس التاني في الصور لكن اشوفه حقيقي جميل جمال لا تتخيله اضفت تمثال رمسيس التاني للستة الاثار الفريدة اللي بتمنى ودتها واقولك خبر مهم جدا باذن الله في اكتوبر القادم احنا بنجمع ادلة دلوقت يعني قوية جدا عشان من خلالها بنثبت لمتحف برلين ان راس نفرتيتي اتسرقت من مصر يعني عايز اقولك انك تقدر ترجع اثار لو انت عندك الدليل ان الاثار دي طلعت بطرق غير قانونية محمد صلاح: لكن اللي اتباع متقدرش ترجعه ؟ د/ زاهي حواس: مش عايزين نرجعه يعني انت عندك الاثار كتير جدا مكررة انا عايز ارجع الحاجات الفريدة الحاجات اللي مالهاش مثيل اللي هي تمثال رمسيس راس نفرتيتي موميا جميلة موميا ملكية زي موميا رمسيس الاول من متحف مايكل في اتلانتا يعني الحاجات دي الحاجات الفريدة اللي انا برجعها يعني انا دلوقت عندي قضية ضخمة جدا بيني وبين مدير متحف في سانت لويس قناع مسروق وعندي الدليل انه مسروق وهو مش عايز يرجعه انا بقى لو رفعت قضية عليه هدفع فلوس لا تتصورها لكن تبنيت حملة والحملة بدات تنجح وباذن الله القناع قريب جدا هيرجع لمصر محمد صلاح: انت ازاي ممكن تثبت ان الاثار دي مسروقة هل عندنا قايمة بالاثار المصرية الموجودة في الخارج سواء المسروق منها ؟ د/ زاهي حواس: اطلاقا لا عندك لِستة بالاثار المصرية في الخارج ولا عندك لِستة في مصر بتبين الاثار اللي اتسرقت ايه احنا بدانا لاول مرة من خمس سنوات مشروع اسمه المشروع القومي لتسجيل الاثار المصرية متحف المصري الاثار اللي فى غير مسجلة مفيش قاعدة بيانات بتبين تحرك الاثر محمد صلاح: امال انت بقالك كام سنة ؟ د/ زاهي حواس: ما انا بقولك احنا بدانا من خمس سنين محمد صلاح: يعني قبلك ما اتسجلتش الاثار ؟ د/ زاهي حواس: ما انا برضه مش عايز اتكلم على حد قبلي ولاّ بعدي محمد صلاح: دي مسالة مذهلة ان مصر يكون فىا هذا الكنز دا اللي عندهم بترول عارفين عندهم ايه في باطن الارض ؟ د/ زاهي حواس: مكانش فى تسجيل اثار احنا بدانا لاول مرة مشروع علمي متكامل اسمه المشروع القومي لتسجيل الاثار وبدانا عمل قاعدة بيانات لاول مرة في المتحف المصري عشان نطبقها عالمتاحف كلها محمد صلاح: وصلت فىا لحد ايه د/ زاهي حواس: احنا وصلنا في تسجيل المتحف المصري 45% من الاثار تم تسجيلها بالكامل المقابر اللي موجودة في قبة الهوا المقابر اللي موجودة في البرالغربي بالاقصر تم تسجيلها بدانا بالمقابر في اسكندرية في الجيزة سقارة عندنا بقى على مجموعة معابد موجودة في مناطق كتيرة جدا وانا اعتقد بعد خمس سنوات باذن الله اقدر اقولك ان اثار مصر الموجودة في المتاحف والمناطق لااثرية كلها هتكون مسجلة لكن عندنا مشكلة اكبر المخازن احنا عندنا الاف المخازن ..المخازن مهلهلة واحنا الحمد لله بنينا 36 مخزن متحفي محترم في كل محافظات مصر بننقل اثارنا بقى دلوقت محمد صلاح: فىم امان بقى يا دكتور ؟ د/ زاهي حواس: اولا تم بناءها عن طريق القوات المسلحة الخطة الوطنية على مستوى عالي جدا حراسة الكترونية معمل لترميم معمل للتصوير الاثار لاول مرة بتحطها في مكان محترم بطريقة محترمة وتسجل على مستوى عالي وعندنا اكتر من 50% من مخازننا لسه بننقلها ساعات بنفتح مخزن ما اتفتحش من 50 سنة نلاقي فى اثار اتفتت او اثار مسروقة احنا واخدين عهد على نفسنا أي حاجة مسروقة لازم نعلن عن هذا الموضوع ييعني دلوقت اقولك في موضوع انت هتسالني فى انت بتقرا كل يوم او يومين ظبط اثار مسروقة في المطار الفلاني من 10 سنين مكانش عندك غير وحدة ضبطيات للاثار غير في مطار القاهرة النهاردة عندي 29 وحدة ضبطيات في كل المراكز البري والبحري والجوي بدا النهاردة ان هما يفتشوا شنطتك لو مسافر ميناء دمياط بنفتش وبنلاقي الاثار فانا عايز اقول ان دي يعني انا لما بشوف الضبطيات دي كلها بابقى سعيد لان زمان مكانتش معروفة كانت اثارنا كلها بتصدر وتهرب للخارج واحنا في الداخل لا نعرف عنها شيء محمد صلاح: دكتور زاهي في قضية التهريب فى ناس بتتكلم من تحت لتحت ونقول الاثار اللي موجودة بره اهي متصانة ومعروضة بشكل جيد ودعاية لمصر انت رايك ايه في القصة د/ زاهي حواس: الكلام دا طبعا كان مظبوط زمان لكن دلوقت احنا بنبني 19 مخزن متحفي متحف على مستوى عالي شوف في اسكندرية كان فى بناء متحف المجوهرات فاتح بعد العيد حاجة غير عادية المتحف الاسلامي شوف بقى المتحف الاسلامي زمان تدخله ضلمة متحسش بالاثار الجميلة اللي فى احنا اخترنا عرض 2000 قطعة اثرية بعد العيد سترى متحف اسلامي على اعلى مستوى انا مسكت هذا الموضوع من 7 سنين وتعبنا تعب المتحف الاسلامي كان زي الراجل العجوز يا استاذ محمد تيجي تعالج الكبد يطلع لك القلب ، القلب تلاقي في المخ لان دا متحف فوقيه دار الكتب واحنا مشتركين في basement واحد في بدروم واحد فبالتالي كان مشاكل ضخمة لكن بص للمتحف القبطي وجماله المتحف بعض دلوقت والمتحف القديم والاثار المعروضة بطريقة رائعة فاللي عايز اقولهولك متاحفنا بقت بتصون الاثار فمش معناها ان انت شحّت ابنك لحد تسيبه تقوله لا خد ولادي كلها خد اثارنا عندكوا انا ضد هذا الموضوع كل اثارنا لابد ان تعرض في مصر وفي نفس الوقت المتاحف بقت كويسة واقول لصديقي انيس منصور الكاتب الكبير اقوله يا استاذ انيس عشان خاطري متقولش الكلام دا لان هو صاحب هذه الدعوة محمد صلاح: دكتور زاهي انا عارف رايك اصلا في مسالة عرض التماثيل من ايام موضوع رمسيس وهنتكلم عنه مكانها في المتاحف مش في الميادين لكن لينا في باريس وفي ايطاليا وفي اسطنبول وفي امريكا في نيويورك مسلات محطوطة احنا معندناش غير مسلة واحدة في المطرية شفتها رحتها ؟ د/ زاهي حواس: اولا المسلة دي اللي في المطرية دي في مكانها الحقيقي .. المطرية دي زمان كانت عاصمة من عواصم مصر القديمة محمد صلاح: اه دا كان زمان شفت البيوت حواليها جت قد ايه د/ زاهي حواس: طب اعمل ايه ما هو المنطقة دي منها لكن اتعمل مشروع دلوقت هيخلص بعد شهرين بنحيطها بسور بنعمل لها تنظيم متحفي كويس جدا بحيث تبعدها عن الاحياء وبنعمل منطقة المطرية كلها مبنية فوق مدينة قديمة لو هديت بيتك حفرت تحتيه بتلاقي مقابر انا لسه فيلا من سنتين كانت بتتهد لقينا تحتها مقبرة كاملة لم تفتح من قبل بعتولي وفتحنا المقبرة ودخلنا جواها لقيناها لم تسرق من قبل دي كانت تحت فيلا ...فتحت الفلل والبيوت الموجودة في المطرية اثار ..نقابة المحامين لها ارض بيعملوا عمارة لقينا تحتها مقبرة رائعة جميلة جدا اديناهم 50 مليون جنيه وخدنا الارض فبقولك انت عندك مشاكل مصر كلها مقام فوقها اثار محمد صلاح: ليه المجلس الاعلى للاثار معملش مثلا اعلان يطالب فى الناس اللي بتعثر على الاثار انها تسلمها وتاخد مكافاة ؟ د/ زاهي حواس: عاملين ولاول مرة بقى انت لو عثرت على الاثار ممكن تخبيها او تبعتها الاثار يبعتولك 50 جنيه احنا دلوقت بنبعت مكافات وبندي وبقول من خلال البرنامج بتاعك من خلال كلام مسئول بقول ان أي مواطن بيعثر على أي اثار بنديله مكافأة ومكافآت مجزية محمد صلاح: عندنا كنوز كتيرة دكتور زاهي من بينهم طبعا الاهرامات ابو الهول ونستعيد جولتك مع الرئيس الامريكي اوباما عندنا مشهد ليك مع الرئيس الامريكي في المنطقة نشوفه مع بعض د/ زاهي حواس: نشوفه محمد صلاح: نشوف الدكتور زاهي مع الرئيس الامريكي اوباما فاصل محمد صلاح: مشهد جميل يدعو للفخر ولكن الذي لا يدعو على الفخر على الاطلاق يا دكتور زاهي منظر البيوت البلكونات خلاص دي زحفت بينشروا الغسيل دلوقت فوق ابو الهول د/ زاهي حواس: كلامك مظبوط انتخابات 84 عملت مصيبة في نزلة السمان البيوت كانت على بعد 15متر من تمثال ابو الهول لكن عايز اقولك حاجة الحقيقة انا عايز اوجه الشكر للرئيس محمد حسني مبارك سنة 88 جه منطقة الهرم وكان محافظ الجيزة الاستاذ عمر عبد الرحمن قاله ايه البيوت الدنيا مقلوبة كده ليه والكلمة دي كانت لها مفعول مهم جدا ان صدر قرار محافظ الجيزة بمنع البناء تماما لانه الهرم بقى كان مدينة في الغرب مدينة في الشرق انا كنت مسميه هجوم التتار لان الهرم اتخنق وعشان كده صدر لقرار سنة 88 بمنع أي نوع من اعمال البناء او التنكيس ودا قرار مهم جدا لو القرار دا كان مكانش اتعمل سنة 88 كنت هتلاقي البيوت على بعد 5 متر من ابو الهول فاحنا عملنا السور اللي اتعمل دلوقت دا عشان يحمي المنطقة الاثرية وعايز اقولك انه بعد شهرين تلاتة بالكتير هتلاقي ان الهرم دا الباعة الجائلين والجمالة والخيالة هيبقوا في المنطقة الصحراوية محمد صلاح: عامل انت خطة وعامل سور حوالين المنطقة الاثرية في الهرم ؟ د/ زاهي حواس: 17 كيلو السور دا عشان نحمي المنطقة الاثرية ونقدر بقى ما يبقاش داخل الموقع الاثري غير بس عشان تحس بعظمة الهرم بدل ماحد يقولك اركب جمل اركب حصان بهدلة محمد صلاح: لكن اللي حصل مالوش علاج يعني ايه الحل في منطقة نزلة السمان ؟ د/ زاهي حواس: حل منطقة نزلة السمان مشروع في رايي زي نقل معابد ابو سمبل لابد لحملة دولية عن طريق اليونسكو الحملة الدولية دي عشان طبعا الاهالي موجودين عشان تنقل الناس لازم توديهم مكان زي القرنة لكن القرنة مشروع صغير ..نزلة السمان قد القرنة ميت مرة محمد صلاح: ما احنا اللي سبناها تكتر وتكبر د/ زاهي حواس: ايوة دي كلها عوامل زمن متقدرش تحدد واحد معين لازم تعرف ان الناس دول اللي عند نزلة السمان كانوا بيملكوا الهرم كان دخول الهرم التذاكر عن طريقهم كان بتاعهم لما جت الثورة وتم عمل التذاكر اللي حصل دلوقت من انقاذ لمنطقة الهرم شئ جميل محمد صلاح: انت مستسلم ولاّ بتكافح وبتناضل وكل يوم بتقابل المحافظين والاحياء عشان تحل المشكلة دي د/ زاهي حواس: بجد تم حسمها بقرار الرئيس اللي اتعمل سنة 88 ممنوع حد يبني تاني فلازم تحافظ على اللي موجود بقى فبنينا السور عشان مندخلش الجمالة والخيالة ، الجمالة والخيالة معترضين دلوقت لان احنا في الصحرا هيبقى الكبير زي الصغير بالدور لو عملت خطا ضد سايح هيتعرف مين اللي عمله طبعا بعض الناس ما يهمهمش هذا الانضباط لكن احنا يهمنا ان الهرم دا لما تدخل كسايح كمصري لما تبص له تحس بالرهبة وتحس بالعظمة لان فى عشق محمد صلاح: كان يا دكتور زاهي من ميدان سفنكس من جامعة الدول العربية د/ زاهي حواس: يتشاف من ميدان التحرير للاسف هجوم التتار اخفى الهرم تماما وتلاقي فجاة راكب عربية تلاقي فجاة الهرم بقى قدامك وانا الحاجات دي مخلياني اعرف ان الكنز اللي عندنا الحمد لله احنا قادرين نحافظ على المنطقة الصحراوية جنوب الهرم كان اتعمل الطريق الدائري وصدر قرار بايقاف الطريق الدائري رغم ان دا لمصلحة المواطن لكن اهم حاجة الاثار دا تاريخ وحضارة مهمة جدا ولازم نحافظ عليها واحنا بنحافظ عليها محمد صلاح: احنا محتاجين قانون جديد للاثار فى مشروع قانون متقدم لمجلس الشعب لكن عمّال يتقدم من دورة لدورة د/ زاهي حواس: بعد ما طلعنا القانون دا كل الناس دخلت بالقوانين يقولك دا احنا دخلنا قبل الحكومة لا اطلاقا احنا كحكومة بنعمل القانون دا من سنة 2002 خلص في 4 سنين في 2006 وبعتناه مجلس الدولة وكل الجهات وبعتناه مجلس الشعب كان نفسنا الحقيقة انه يتم الموافقة عليه في هذه الدورة لكن لاسباب كثيرة اعتقد خاصة معرفش فى قوانين دخلت كتير ارجو باذن الله في نوفمبر القادم يتم الموافقة على هذا القانون ليه..؟ اللي هيسرق اثار هياخد 25 سنة اللي يتعدى عالااثار 5 سنين اللي يتعدى عالاثار دلوقت بياخد براءة بياخد مكافاة نمرة تلاتة هيبقى عندنا نماذج الاثار ما يعملهاش محمد صلاح: النماذج والقطع المقلدة ؟ د/ زاهي حواس: ممكن نعمل دخل قومي للبلد على مستوى عالي محمد صلاح: طب اللي في منطقة الهرم ؟ د/ زاهي حواس: تاخد تصريح مننا مهم قوي التصريح حتى بدون ما يدفع فلوس عشان الجودة الصين بتغزو العالم فعملوا المقلدات ونماذج الاثار فاحنا هنعطى تصاريح للقطاع الخاص المصري بالمجان لكن نراقب الجودة لكن بالنسبة للاجانب لابد حتى بنعمل علامة تجارية الهرم بنسجله علامة تجارية غير موافقة المجلس الاعلى للاثار ودا هيزيد من الدخل القومي على مستوى عالي جدا وايضا اوقفنا نسبة ال50% بالنسبة للبعثات الاجنبية محمد صلاح: دا بشان الحجارة والمومياوات والاثار لكن العنصر البشري في القانون وضعه ايه وضع الاثريين ايه د/ زاهي حواس: الاثريين انا عايز اقولك في المدة اللي فاتت دي احنا قلنا دايما احنا لازم نرمم الاثري قبل مانرمم الاثار محمد صلاح: حلو التعبير د/ زاهي حواس: فعملنا الاتي هينتهي السنة الجاية في الفسطاط للعاملين في الاثار اصبح الاثري لاول مرة مميز بياخد 40% بالاضافة الى ال300% حوافز وجهود بالاضافة الى ان لو انت اشتغلت مع بعثة اجنبية عشان تبقى مميز تاخد 1500 جنيه زيادة لو سافرت بره مع معرض اثار ترجع معاك ب60 الف جنيه وعملنا نظام للتامين الصحي الحاجة الوحيدة اللي هو موضوع النقابة وانا بتمنى من خلال برنامج بتاع حضرتك وهذا الموضوع مهم جدا محمد صلاح: مع موضوع النقابة ازاي ؟ د/ زاهي حواس: طبعا اؤيد هذا تماما أي فئة في الدولة بتحتاج الى نقابة ترعاها محمد صلاح: بس حد في موقعك مش بس يؤيد يعني يؤيد ويعمل حاجة ؟ د/ زاهي حواس: ما هو اللي انا بعمله دلوقت ان احنا بنعمل قانون عشان ندخله مجلس الشعب احنا محتاجين من دخل الاثار ناخد حتى نص في المية لكن هناك عوائق ادارية في الدولة بتمنع انك انت تاخد من موارد الدولة فلوس عشان تدعم بيها صندوق او تدعم بيها حاجة لكن متقدرش تعمل نقابة للاثريين بدون تدعيم التدعيم لازم ييجي من الاثار فلازم فبنطالب بحكاية نص في المية دا لو تم الموافقة عليه في القانون الجديد ممكن ان احنا نعمل نقابة الاثريين باذن الله لكن الانجازات اللي تمت للاثريين في المدة اللي فاتت اعتقد ان هي انجازات محترمة باذن الله بناخد موافقة دلوقت علشان نعين 10 الاف واحد من اللي هما بالاجر اليومي او بالعقود والبعض كان فى 15 واحد كان عامل لسه قدام نقابة الصحفيين الاستاذ محمد عبد القدوس عملوا عبارة عن اضراب او حاجة بيقولوا ان هما عاوزين يتثبتوا لكن احنا بنعمل اجراءاتنا وباذن الله قريب جدا هيجيلنا الموافقة على تعيين 10 الاف واحد وهيتم التعيين بالاقدمية المطلقة محمد صلاح: يعني مطمن على اوضاع الاثريين ؟ د/ زاهي حواس: 100% انا عايز اقولك النهاردة يعني احنا كان لسه عندا اجتماع للاثريين بنعمل الملتقى العلمي كل سنة اسلامي وقبطي ومصري بقولهم وضع الاثري الان في أي مكان من حق أي شاب صغير يقول انا اثري لانه اصبح للاثري وحامي هذا التراث وضع مهم جدا في الدولة محمد صلاح: حسيت انك متحمس جدا لما جيت سيرة الاثريين ؟ د/ زاهي حواس: لان انا اثري انا ابن الاثار انا ماجيتش من الجامعة ركبت في الاثار ..لا.. انا اشتغلت مفتش اثار وعندي 19 سنة مشيت على رجليا 15 كيلو محمد صلاح: خليك معانا لسه الكلام مخلصش فاصل محمد صلاح: مطمن الدكتور زاهي على حاضر مستقبل الاثريين ..دكتور زاهي عندنا مجموعة من الاثريين اتكلموا معانا تسمع قالوا ايه ؟ د/ زاهي حواس: ياريت محمد صلاح: نشوف الجماعة الاثريين دول قالوا ايه فاصل اثري1: احنا عملنا وقفة احتجاجية بخصوص موضوع النقابة والتثبيت الخاص بالاثريين المؤقتين والعاملين المؤقتين بالمجلس الاعلى للاثار كان يوم 15/6/2008 قدام سور نقابة الصحفيين طبعا احنا عاملين الوقفة دي لغرض معين فى ناس منا بقالها 12 سنة و13 سنة الى الان لم يتم تثبيتها بالاضافة الى ان موضوع النقابة بقاله مدة طويلة اكتر من 13 و14 سنة بيتقال عليه كلام كتير ولغاية دلوقت ما تمش فى أي حاجة اثري2: احنا مفتشين اثار مؤقتين بعد اخر زياد تمت 8 جنيه يوميا ويتراوح اجرنا من 250 الى 300 جنيه وعمرها ما كانت الف ونص زي ما اتقال او كانت اكثر من ذلك اثري3: انا مفتش اثار في الجمالية باجي من فيصل انا متجوز ومخلف اقول لو انا ركبت المترو والميكروباصات زي ما بنركب ب2.30 على ما بوصل ونفس الكلام وانا راجع للبيت دا كمان مش هاتكلم ان انا هاكل وهاشرب وبحتاج أي حاجة في خلال اليوم وانا في الشغل هالاقي ان انا بصرف 150 جنيه مواصلات بس ادي من 250 او 300 جنيه زائد ان انا متجوز ومخلف بدفع ايجار شقة 150 جنيه تاني ادي 300 جنيه اثري4: انا شغال في هيئة الاثار ولسه لحد دلوقت ما اتثبتش واحنا شغالين وشغل متواصل ما بننفصلش يعني مفيش انفصال او مفيش انقطاع في نهاية السنة المالية زي الهيئات التانية ما بتعمل فمعنى كده ان الشغل محتاج لنا اثري5: انا بقول للدكتور زاهي انا دلوقت واقف على باب مكتبك انا عامل عندك في المجلس الاعلى للاثار بعمل منذ 9 سنوات اجري لا يزيد عن 300 جنيه بقوم بنفس عمل المفتش المثبت وللاسف انا مش واخد حقوقي اثري6: النقابة مسالة النقابة ..النقابة دي مطلب بيحلم بيه كل اثري يمكن منذ التمانينات الدكتور عبد الحليم محمود من التمانينات كان بيطالب بموضوع النقابة دا وكل مسئول بيتولى المجلس الاعلى الامانة العامة للمجلس بيقول انا بتمنى انه يكون فى نقابة للاثريين لما هما يتمنوا احنا نعمل ايه فاصل محمد صلاح: امّال فين بقى ال1500 وال1400والحاجات دي؟ د/ زاهي حواس: لا لا اسمع اولا اللي بيتكلم دا الاجر نظير عمل دا في الدولة اجر نظير عمل المفروض بتشغله وتمشيه هو بيقعد فعندي مشاكل مش من الاثار دي سياسة دولة انا مقدرش اديله اكتر من 300 جنيه ازاي يعني هو لو بياخد اكتر من 300 جنيه نظير عمل دا يحمد ربنا لان انت المفروض اجر نظير عمل محدد لهذا العمل الاستاذ اللي بيشتغل في الجمالية بقاله 8 سنين وبيقولك انا باخد 300 جنيه والمواصلات انا بعمل 150 جنيه طب ما يتنقل لحتة قريبة لبيته محمد صلاح: طب ما تنقله انت ؟ د/ زاهي حواس: ما يطلب النقل ما عنده رئيس القطاع محمد صلاح: يعني لو فى طلبات نقل بتمشي ؟ د/ زاهي حواس: طبعا فورا ..حتة ال1500 جنيه انا بقولك لو انت راجل مجتهد ومميز وبتتعلم وعاوز تبقى بتاع اثار تاخد ال1500 جنيه لكن بتاع الجمالية اللي بيركب المواصلات دا100% معندوش صلة بالاثار ودماغه مش في الاثار لان لو هو في الاثار لازم يعشق الاثار ويحبها لكن انا بقولك حاجة كل الشكاوي اللي انت سمعتها دي شكاوي عادية جدا لان انا مقدرش اعيّنك نمرة واحد لان اللي بيعين الدولة ..وقلتلك انا بدور وبجيب 10 الاف درجة وربنا يسهل والدولة توافق ونعينهم ونمرة اتنين انا انا بقولك حكاية ال300% وال400% بياخدها الاثري المثبت احنا دلوقت ادينا ال40% لكل الناس محمد صلاح: بالعقود كمان؟ د/ زاهي حواس: بالعقود ال40% للناس كلها نقابة الاثريين قلتها مشاكلها ما هو قبلي الدكتور عبد الحليم نور الدين قعد رئيس للاثار 8 سنين محمد صلاح: ما هو الراجل قالك بيبقى بيتمنى وكده ؟ د/ زاهي حواس: هذا الموضوع صح هذا الموضوع يا استاذ محمد ليس في ايد امين العام للمجلس الاعلى للاثار هذا الموضوع في ايد الدولة لابد ان تقتنع الدولة بوجود نقابة محمد صلاح: حاول تقنع الدولة د/ زاهي حواس: والله انما اتكلمت في هذا الموضوع لكن انا بعتقد ان الحلم الخاص بنقابة الاثريين هيبدا قريب جدا يتحقق باذن الله محمد صلاح: واضح ان فى مشكلة مالية هو دخلنا من الاثار قد ايه يعني وبعدين انت ما بتاخدش الدخل دا ؟ د/ زاهي حواس: كل الدخل دا الدولة بتديه للاثار الدولة ما بتاخدش ولا مليم لازم تعرف ان احنا عندنا خطة وعندنا مهمة ان تحمي الاثار .. الاثار بتقع الاثار دي اثار قديمة احنا بنصرف دلوقت مليار جنيه سنويا محمد صلاح: على الصيانة والترميم ؟ د/ زاهي حواس: عندنا 19 متحف بنعمله مواقع اسلامية اسلامي ويهودي وقبطي وحديث عندنا حماية الاثار والمخازن يعني الحقيقة فلوس ضخمة بيتم صرفها على ترميم الاثار والفلوس دي كلها اللي من المعارض الاثرية معرض توت عنخ امون اللي انت شفته بجد بيصرف 125 مليون دولار الفلوس دي مع دخل التذكرة اللي بيدفعها السايح دي اللي بناخدها علشان نصرف على ترميم وصيانة والكشف عن الاثار محمد صلاح: يعني فكرة ان الاثار دي بتدخل دخل قومي كبير للبلد فكرة وهمية ولا ايه ؟ د/ زاهي حواس: انت دلوقت عشان تجيب للشعب والدولة القانون الجديد هيجيب للشعب والدولة محمد صلاح: ازاي ؟ د/ زاهي حواس: النماذج الاثرية يوم ما يبقى عندك انت الحق الوحيد في عمل النماذج الاثرية هتبيع بملايين محمد صلاح: ايوة بس فى اكل عيش للناس اللي شغالة في الحكاية دي ما انت هتاخدهم منهم ولاّ ايه ؟ د/ زاهي حواس: انا مش هاخدهم منهم انا بتكلم على الصين .. الصين بتصدر للعرب محمد صلاح: يعني الكلام دا هيتطبق على الصين ؟ د/ زاهي حواس: طبعا وهيبقى لو انتجت أي تمثال من المتحف المصري وعملت عليه ختم محدش يقدر يقلده الا انت وبعته في العالم كله وبقى عندك طريقة انك انت تعمل مصنع ضخم وتصدر لامريكا ولاوربا واستراليا والعالم كله دا هيعمل فلوس لا تتصورها العلامة التجارية وتسجيل الاهرامات وابو الهول والاثار المهمة جدا هتبقى محدش يقدر يعمل بقى لاس فيجاس الاقصر فندق الاقصر محدش يقدر يعمل الاثار المقلدة في أي مكان في الدنيا لازم ياخد تصريح منك لو هياخد تصريح مني لازم انا اخد منه مقابل انت عندك اهم اثار الدنيا لان عندك ايه الهرم الناس بتتكلم ازاي اتبنى مين اللي بناه ابو الهول بيخفي اسرارنا وحضارتنا توت عنخ امون الملك الذهبي اول مقبرة في الدنيا بتكتشف كاملة والموياوات وسحرها فعندك ال4 حاجات دول اللي بتدي الاهتمام الضخم جدا في العالم كله محمد صلاح: بمناسبة توت عنخ امون ايه سر البعثات الاجنبية ومعظمها مش كها بشكل شخصي يعني اللي اكتشفها اجانب وبعثات اجنبية احنا معندناش جيل من الاثريين يغزو الصحرا ويبحث ويدور لحد دلوقت فى بعثات اجنبية بتيجي حوالين الاهرام وتدور وتكتشف د/ زاهي حواس: شوف الكلام دا فعلا كان موجود لكن انت لو جيت امبارح وشفت الملتقى السادس للاثريين كل سنة عندنا على الاقل 20 بعثة مصرية بتعلن عن اكتشافاتها احنا لاول مرة من 20 ، 30 سنة كله جوني سميث وجون اللي اكتشف والبعثة الانجليزية والالمانية و..و..و.. وكل الاكتشافات وادي الملوك تصور فى اكتر من 43 مقبرة تم كشفها باجانب مفيش ولا بعثة مصرية احنا بدأنا نحفر في وادي الملوك ببعثة مصرية متكاملة برئاستي مجموعة من الشباب على مستوى عالي جدا النفق بتاع سيت الاول اللي قالوا فى مقابر عبد الرسول بنشتغل فى بقالنا سنة ونص يعني احنا لاول مرة اقدر اقول وقلت امبارح في ملتقى الاثريين قلت لهم اول مرة تقدروا تقولوا ان احنا علماء في اثارنا لان 20 اثري شاب صغير احنا دربنا الناس علمناهم ازاي يحفر ازاي ويكتشف ازاي ويرمم اوزاي لو اتعلمت هتقدر تنافس محمد صلاح: ليه فى ناس كتير بيعتبروك ديكتاتور وانك بتدير الاثار وفقا لخبراتك صحيح وعلاقاتك بالمكتشفين وبالباحثين وكذلك بالاثريين المصريين لكن دماغك ناشفة ؟ د/ زاهي حواس: انا لم يحدث اني اخدت قرار في حياتي شوف هناك لجنة اسمها اللجنة الدائمة للاثار المصرية والقبطية واللجنة الدائمة للاثار المصرية اللجان دي هي اللي بتقرر كل واحد لما ييجي بقى واحد من اصدقاء الاله ست اله الشر وانت عارف ليك صحاب 100% منهم الاصدقاء دول بتاع الاله ست اله الشر دول مدمرين بيدمروا أي شئ كويس انا لسه بقول الناس دي بتبين لنا مصر ان مصر سودة مصر جميلة انا لسه واقف قدام الهرم المدرج وكتبت مقالة قلت انا شفت ملحمة مصرية من مجموعة من الشباب المصري بيرمم الهرم المدرج ضربت تعظيم سلام قلت فى حاجات جميلة في بلدنا ما هو انت مش ممكن تعمل حاجة والناس كلها تسقف لك لما عملنا بعثة مصرية وفحصنا توت عنخ امون شتموني رغم ان اللي فحص واحنا كما خدامين عندهم لما 3 والتلاتة لهم مصالح شخصية مش عايز اتكلم واقولك هما مين يعني اللي حصل فى مصالح شخصية لما يبقى فى مصلحة شخصية لازم يهاجموك لكن عايز اقولك حاجة انا عمري في الناحية العلمية او أي حد بيتقدم بطلب في اللجنة الدايمة باقول رايي وفي النهاية بناخد الاراء الصح انه ييجي بقى واحد من برة يهاجمك دا حاجة طبيعية لازم ترد وتدافع يعني عايز اقولك حاجة الحمد لله ان احنا لازال مرة بينا للعالم كله ان اثارنا في ايدينا كمصريين محمد صلاح: انت بتعتبر ان اللي بيهاجموك او ينتقدوك زملاء الاله ست اله الشر د/ زاهي حواس: لا انا بقول ايه محمد صلاح: عندنا مداخلة كده تيجي تشوفها د/ زاهي حواس: اتفضل محمد صلاح: نشوف الدكتور عبد الحليم فاصل عبد الحليم نور الدين - الأستاذ بكلية الآثار: اذا اردت ان اتحدث عن ملاحظات اخرى يمكن ان تعتبر كسلبيات الملاحظة الاولى ان الامر امر المناطق الاثرية غير المالوفة غير التقليدية سقارة والجيزةوالاقصرواسوان لكن هناك مئات المواقع الاثرية في الواحات المصرية وفي دلتا مصر بحاجة الى مزيد من جهد الدكتور زاهي في هذا المجال اعرف طبعا ان هناك رؤساء قطاعات وان هناك مديرين مناطق وان هناك مفتشين لابد ان نتابعهم لكن احنا اسلوب العمل في مصر يتطلب انه يقوم بالزيارات لبعض المواقع غير التقليدية والتي تمثل اهمية تاريخية الامر الاخر رغم كل الجهد الذي يبذله مع العاملين في المجلس الاعلى للاثار وفي مجال التدريب لكن اظن ان التدريب بحاجة الى مزيد من الجهد بحاجة الى خطة اكثر اتساعا بحاجة اذا امكن ذلك بحاجة الى ايفاد من الخارج وهو ولن لو امكن مزيد من الايفاد في هذه الحالة سوف يحقق نتائج افضل وهناك ايضا نقطة اخرى كلنا نحاول ان نلتقي مسئولين وبالمستويات المختلفة لكن اتمنى ان الدكتور زاهي يلتقي بالمسئولين ان يلتقي بهم في المناطق لكي يعرف المشاكل على الطبيعة اعرف ان هذا جهدا خارقا انه يزور مثلا منطقة المنيا ويلتقي بالعاملين في المنيا لكن انا بتصور ان هذا امر مفيد جدا وخصوصا ان هو يملك علاقة طيبة جدا مع العاملين في الاثار فما بالنا لو ان هذه العلاقة انتقلت الى المواقع الاثرية لكن تظل الايجابيات اكثر بكثير من السلبيات وكل من يحب اثار مصر لابد ان يضع هذه الاثار فوق كل اعتبار قد اختلف في الاسلوب في المنهج في الراي مع الدكتور زاهي في بعض الحالات لكن ارى انه احدث توازنا خصوصا في السنوات الاخيرة من فترته احدث توازنا جيدا تخطو بخطى ثابتة فيما يتعلق بافتتاح مناطق بتطوير متاحف الى اخره وفي النهاية اثار مصر لابد ان تكون في عيوننا ولابد ان تكون فوق رؤسنا ولا بد ان نحتضنها لكي نحافظ عليها كل الوقت لان المجلس الاعلى للاثار لن يكون وحده القادر على حماية اثار مصر احنا بنتمنى جميعا من القانون اللي عمل مؤخرا جرى اعداده منذ سنوات طويلة جدا انه يرى النور حتى يمكن ان يسهم في الحفاظ على اثار مصر على المستوى الدولي وعلى المستوى المحلي يقدر تقديرا شديدا ونتمنى ان العمل الاثري للدكتور زاهي ولاسرة المجلس الاعلى للاثار كلها من اعلى الى ادنى مستوى كل التوفيق من اجل حماية اثار مصر فاصل محمد صلاح: هو دكتور زاهي تقريبا عنده تعليق؟ د/ زاهي حواس: هو الدكتور عبد الحليم قعد 8 سنين في الاثار يعني انا مابزورش بالعكس تعالى بص لحجم الانجازات اللي بتتم في مصر دلوقت لم يحدث هذا من قبل شوف بقى التدريب لاول مرة عندك 500 اثري بيتدرب على مستوى عالي جدا في الحفائر والترميم والمتاحف في الفترة اللي قعدها الدكتور عبد الحليم انا عايز يديني كام واحد سافروا برة عشان يتدربوا على فكرة انا مش زعلان من كلامه انا سعيد لان انا برضه بقول انا مش هشتغل لوحدي لازم ولازم الكل يشتغل معانا ولازم العمل الاثري دا يتم دلوقت انا كل ما الاقي حد كويس لكن محبش حد يتكلم كتير يعني احنا بنشتغل ونتعب وتم عمل كتير جدا من الدولة ساعدتنا والاثريين خدوا حقوق جميلة جدا لكن متقدرش تقول ما انت ما بتروحش المكان الفلاني ما هو انت عندك رؤساء قطاعات بيروحوا وبيسافروا وبيشتغلوا ..تعال بقى ايه الاماكن انا الفيوم رحتها 3 مرات المنيا سوهاج الاقصراسوان ابو سمبل اسكندرية مرسى مطروح سيوة دمنهور رشيد دمياط في كل مكان يمكن فى اماكن مافىاش العمل الاثري يحتاجها لكن اماكن بسيطة جدا لكن انا مقدرش اعمل كل حاجة لكن عايز اقولك بقى حجم الانجاوزات انا هابعتلك بكرة تشوف تسجيلا ماذا تم في الاثار محمد صلاح: يمكن يا دكتور زاهي برضه انطباعات البعض ان نقول ايه Showey شوية بقى الحاجات اللي فىا Discovery Channel وفىا وكالات اجنبية والروبوت اللي مشي جوه الهرم ؟ د/ زاهي حواس: استاذ محمد كان زمان دا بيعمله الاجانب لما ربنا يجيب لك واحد مصري يتكلم والناس في الخارج تسمعه هتزعل انا مرة شفت من 20 سنة واحد امريكاني دخل مقبرة نفرتاري ومدير الاثار ماسك فانونس واقف وفاتح بقه والاجنبي قاعد يتكلم زعلت جدا فانا مش عايز اتكلم عن نفسي واقول احنا عملنا للبلد دعاية ضخمة في العالم واصبح اسم مصر في الاثار بيرن في كل بيت واثارنا بتعرض في الخارج بطريقة محترمة واصبح المشروعات العملاقة بيقوم بيها مصريين محمد صلاح: الاسبوع اللي فات كان معانا محافظ كفر الشيخ اللواء احمد زكي عابدين وجبنا سيرة الاثار تحب تشوف قال ايه د/ زاهي حواس: ياريت فاصل محمد صلاح: عندك 365 بعدد ايام السنة مسجد اثري مساجد في فوة في مدينة فوة وصرف عليها الدكتور زاهي حواس تقريبا 40 مليون جنيه تقريبا لاعادة تطويرها اللواء/ احمد زكي عابدين- محافظ كفر الشيخ: فين دا ولا مليم ولا يعرفها ولا شافها محمد صلاح: ازاي ؟ اللواء/ احمد زكي عابدين: ولا اصلا راح كفر الشيخ طب اساله كده راح كفر الشيخ ولا شافها وقبل كده كنت محافظ بني سويف ولا راح بني سويف ولا شافها هو مركز في الاقصر في اسوان والهرم ..شوف يا محمد كفر الشيخ محافظة اثرية انت قلت اهه 365 مسجد أي مسجد روح اتفرج عليه محمد صلاح: وفنار البرلس القديم ؟ اللواء/ احمد زكي عابدين: عندنا في دسوق اثار فرعونية كويس عندنا في كفرى الشيخ المدينة اثار اسلامية عندنا كنيسة سخا المسيحية دي اقدم كنيسة مسيحية العائلة المقدسة جت فىا وفىا حجر موجود عليه طبعة قدم السيد المسيح عندنا كنائس عندنا اثار فرعونية عندنا اثار اسلامية القصة ايه نحن بعيدين تماما عن اهتمام السياحة والاثار انت متقدرش تقرب ناحية المناطق الاثرية لو جيت تقرب تحبس لان الجهة الوحيدة المنوط بها المجلس الاعلى للاثار بنبعت جوابات نقول الحقنا الاثار بتتسرق عندنا متحف اثار في كفر الشيخ مبني انا رحت لقيته مبني عايز يتشطب اديلي سنة بقولهم شطبوه عشان تلموا فى الاثار بتاعتنا اللي بتتسرق وتحطوها في المتحف لا حياة لمن تنادي فاصل محمد صلاح: ادي الجمل وادي الجمال د/ زاهي حواس: انا اولا كفر الشيخ مش بيقولك 365 حتى ما اذكرش تاريخ كفر الشيخ اولا مفيش عنده اكتر من 22 او 23 اثر بالمصادفة انا لما قالوا لي لما ظهر في البرنامج بتاع حضرتك والناس كلها انتقدته انه ازاي يتكلم بالطريقة دي انا مسئول في الدولة وهو مسئول في الدولة المفروض يبقى الكلام على مستوى الحوار هو اللي حصل مرة في بني سويف كلمني وكتب ان الاثار بايظة عنده كلمته قلت له الاثار بايظة عندك فى ايه انا من بلد اسمها وقلت له حاضر وكلمت القوات المسلحة كان التاخير في التنفيذ وعملنا السور كتب في الجرنان ان هو عنفني ..تخيل.. وطبعا انا مش عايز اقولك ان هو مش عارف ان كفر الشيخ اولا فىا مساجد اثرية احنا مسجد العامر البرلسي صارفين عليه مليون و620 الف عندك قبة جزر مليون ضريح وقبة المرشدي 95 الف مسجد العمري..فوة عاملين سور المهم بقى هو بيتكلم عن المتحف اللي موجود المتحف دا اتعمل قبل انا ما اجي سيادته استعمله صالة افراح وانا اديت تنبيه لقطاع المشروعات لازم يتعمل وعملنا من حوالي اسبوعين باب الحديد عشان نمنع المواطنين اللي المحافظة بتصرح لهم وانا عايز اقول حاجة لسيادة المحافظ بدل ما يتكلم عن الاثار هو لو بعتلي في أي حاجة دا انا اعملها فورا انا لسه ليه قرايب في حتة اسمها كوم الدهب يقولك المشاكل والدنيا وهو ما بيروحش ولا بيسال يعني قصدي المفروض المسئول يدور على بيته الاول ينظمه الحمد لله بيتنا في الاثار منظم تعاملنا على مستوى عالي وهو بالرغم من الكلام اللي بيقوله والاستفزاز وكل الناس كلموني ان هو بيتكلم بطريقة فىا تجريح ليا على المستوى الشخصي عايز اقوله هو لو بعتلي جوابات خاصة باي حاجة .. ابعتله الورقة دي واقوله هو مش عارف ماذا يجري في محافظة كفر الشيخ محمد صلاح: يعني المستقبل بعد ما نتخطى القصة دي المستقبل الآثار في كفر الشيخ هيبقى ايه ؟ د/ زاهي حواس: أنا بقوبك مستقبل الاثار اهه لو بعت له الطلب دا حيعرف أولا لازم يذاكر الآثار الموجودة 22 أثر كل أثر بيتم فى ترميم على مستوى عالي وفى المصاريف اللي تمت احد النهاردة لا تقل عن 60 مليون جنية تم صرفها على ترميم الآثار في كفر الشيخ محمد صلاح: أخبار رمسيس أيه؟ د/ زاهي حواس: كان نفسي امبارح تيجي تشوف الدكتور فاروق حسني وإحنا بنزور المتحف الكبير أنتهى مركز الترميم حيتم البدء في المشروع ،هتتعمل الأساسات وهيتحط التمثال في مكانه بيقود فراعنة مصر بدل ما كان مُهان في ميدان رمسيس محمد صلاح: فتشنا ونقبنا عن الآثار والأثريين عن المصريين وعن الفراعنة اللي رحلوا زمان قال الأمين العام للمجلس الأعلى للآثار الدكتور زاهي حواس كلامه كان كلام جميل كلام معقول بس أكيد كلام ..... مسئول خلص الكلام .. سلام نلتقي في الحلقة المقبلة
