مدين ل "الفجر الفني": هذا رأيي في الذكاء الاصطناعي.. محمد فؤاد أول من أنتج لي.. وهذه أعمالي القادمة (حوار)

جذب انتباه الجمهور إليه بنجاح ألحانه فقد قام بتلحين العديد من الأغاني لكثير من الفنانين مثل (عمرو دياب، تامر حسني، تامر عاشور، رامي صبري، أنغام، أصالة) وغيرهم، وقد بدأ ظهوره الفني منذ أن كان طفلًا حيث ظهر في مسلسل (أم كلثوم)، فبعد تحقيقه نجاحًا كبيرًا بأغنية "فاكر نفسك هدية" ل الفنان رامي صبري، كان ل "الفجر الفني" نصيبًا من الحوار مع الملحن "مدين" عن كثير من الأشياء الهامة.

وإليكم نص الحوار:-
1- ما هي كواليس عملك مع رامي صبري في آخر ألبوم ؟
رامي صبري فنان كبير وبحب الشغل معاه، مبسوط طبعًا برد فعل الناس على الأغاني الأخيرة، وأغنية "عنها المركب" قعدت معانا سنتين أو سنة وشوية لحد ما نشوف لها شكل معين، وفي النهاية طلعت بالشكل الحلو ده.

2- أي من النجوم تحب تكرر تجربة العمل معه؟

من غير ما يكون رد دبلوماسي والله أنا فعلًا حابب أكرر التجربة تاني وتالت ورابع مع كل الناس اللي اشتغلت معاهم.
3-قدمت مع تامر عاشور أغاني كتيرة جدًا ناجحة فما أكثر أغنية لحنتها له قريبة لك؟

تامر عاشور ده حبيب قلبي وعشرة العمر وكمان تامر بالذات أنا كل الاغاني اللي عاملها معاه أنا بحبها لأن كل الأغاني تقريبًا بكون عاملها ليا أنا الأول.

4-ما السر وراء عدم تقديمك ألبومات غنائية خاصة بك؟

أنا مُقصر في حق نفسي في تقديم الأغاني يمكن عشان ربنا كرمني كملحن بنجاح كويس الحمد لله، ف مبقتش عايز أعمل نجاح أقل من النجاح اللي حققته كملحن وده اللي بيخليني متردد شوية.

5-كيف رأيت نجاح أغنية العمر تتر مسلسل لا تطفئ الشمس بصوت أصالة، وأنها لازالت مستمرة في تحقيق النجاح؟

أعمالي مع أصالة الحمد لله كلها حققت نجاح كبير جدًا بعيدًا والأغنية حققت نجاح كبير جدًا وقتها ولحد دلوقتي فعلًا لما حد بيسمعها كأنه بيكون أول مرة يسمعها.
6- ما هو سر الكيمياء بينك وبين الشاعر تامر حسين ؟

يمكن شغلي مع تامر حسين له شكل مختلف وله كيميا مختلفة لأن هو صاحبي من سنين كتيرة وعشرة عمر كبيرة، فالكيمياء الحلوة دي لما تترجم لشغل أكيد الحمد لله هتوصل للناس.

7- ما أكثر كومنت ممكن أن يثير عصبيتك على السوشيال ميديا؟
أكثر كومنت ممكن يعصبني هو الكومنت السلبي أن حد ينتقد حد بسلبية رهيبة جدًا أو هجوم شرس، أصل مين اللي اداله الحق أنه ينتقد بهذه الطريقة.
8-حدثنا عن كواليس العمل مع تامر حسني وهل نسمع عن عمل جديد من الحانك بصوته قريبا؟

والله تامر حسني من الفنانين اللي بموت فيهم وبحبهم جدًا بس عندنا دائمًا مشكلة في شغلنا مع بعض، زي مثلًا أني أبعتله الأغنية فيرد عليا بعدها بشهور كتير ف أكون أنا أفتكرت أنه مش عايزاها، فتروح لفنان تاني هي دي نقطة اللغبطة بينا.
9-هل من الممكن أن نشاهد مدين، قريبا في التمثيل ؟

تجربة التمثيل أنا نفسي أقدم حاجة تكون بردو على قد مستوي النجاح اللي الحمد لله ربنا بيكرمني بيه في مجال التلحين.

10-مَن مِن الفنانين تريد العمل معهم، ولم يسبق وتعاونت معهم من قبل؟

حسين الجسمي ونانسي عجرم ومحمد منير، ومحمد فؤاد رغم أننا صحاب وعشرة عمر كتير جدًا مع بعض يمكن هو أول شخص قابلته ف المجال لما كبرت بعد مرحلة الطفولة.

11-ما رأيك في استخدام تقنية الذكاء الإصطناعي في تقديم الأغاني، وهل ترى أن هذه التقنية يمكن أن تحل محل الفنان؟
أنا شايف أن الفترة اللي إحنا فيها في تخبط كثير جدًا وفي عدم وعي لأن حاجة لسه ظاهرة جديد، فهتبدأ تبان كل فترة لحد ما يكون في قواعد تحكم التكنولوجيا، أري أنه لا يوجد شئ يلغي الفنان ولكن هو الأهم أن نحافظ على حقوق الملكية الخاصة بالفنان سواء كان معنا أم متوفي.
13-مَن مِن الفنانين لو طلب منك لحنا سترفض التعاون معه؟

أنا برفض أعمل ألوان معينة زي المهرجانات، لكن الفنانين نفسهم كل واحد له احترامه وتقديره.

14-ما هي اعمالك القادمة ومع مَن؟

أعمالي القادمة مع حماقي، ورامي صبري، وأصالة، وتامر عاشور، وبوسي عاملها لون جديد ومختلف عليها، ويوجد تنوع في الأعمال ما بين (الدراما، المقسوم، اللايت) وفي مفاجات كتير بإذن الله قادمة.