ميرفت وجدي نجمة Arab Idol عن تخوفها من طرح ألبومها: "مبغنيش مهرجانات وعاوزة أكبر في بلدي"

أعربت المطربة الشابة ميرفت وجديد نجمة Arab Idol عن تخوفها من طرح ألبومها الجديد بسبب الذوق العام في سماع الأغاني خلال الفترة الحالية، مشيرًة إلى أنها عملت على إنتاج الألبوم لنفسها وانتهت من تسجيله ويضم موسيقى وأغاني جديدة.
وأضافت عبر حسابها الخاص على "فيس بوك": "عايزة افضفض كده بكلمتين معلش استحملوهم الكلام ده للناس اللي بتحبني ومتبعاني من ساعة ما ظهرت في Arab Idol أنا مقصرتش في حق موهبتي ولا فني بالعكس أنا اجتهدت في المجال ده كتير بشتغل فيه بقالي 13 سنة بدأت في فنادق باند وبعدين ظهرت في برنامج وبعدين ربنا كرمني عملت ألبوم بنت البلد 2016 بقالي سنتين بشتغل لوحدي خصوصًا بعد ما فسخت التعاقد مع شركة الإنتاج اللي كنت بشتغل معاهم ناس محترمة وليا الشرف اني تعاونت معاهم مقصروش معايا ابدًا حجم الدعاية وتكاليف الألبوم تخطت الملايين المهم إني كملت بعد النجاح ده وبعد ما بقي عندي ناس بتحبني مينفعش اخذلهم انتجت ألبومي ال2 اللي علي وشك انه يكون في الأسواق قريبا جدا لاني في مرحلة التسجيل بإذن الله".
وتابعت: "الألبوم ده بجد بجد انا اتبهدلت فيه مش تعبت بقالي سنتين مجهود شخصي من غير مساعدات بأي شكل من الأشكال وعملت موسيقي مختلفة أول مرة هتسمعوها واخترت أغاني حلوة قوي كل الأسماء الكبيرة اللي فخورة إني اشتغلت معاهم وبشكر صديقي العزيز المنتج ميدو منيب، علي وقفته جنبي الصراحة راجل محترم وفنان وأنا شايفة إنه قريب هيكون من أهم المنتجين اللي في مصر كفاية إنه بيفكر في الشباب اللي لسه طالعين وبيقف جنبهم والكلام ده قولته عنه في سيدتي وفي mbc من يومين هو يستاهل ده لان شهادتي فيه مجروحة".
واستكملت: "مخاوفي بقت ملهاش حدود وخايفة علي الشقا والتعب ده لإن الذوق مبقاش يبشر بالخير الناس بقت بتعمل لناس ملهاش لازمة سعر وبقي ليهم مكان في الوسط وسطنا أنا مش عارفة إزاي والفترة الأخيرة سمعت كذا ألبوم تحفة بدون ذكر أسماء عشان الحساسيات ناس مخدتش حقها علي الرغم من المجهود اللي واضح في شغلهم وأصوات تحفة إلا إنهم موصلوش لربع شهرة حمو بيكا ولا شطة ولا غيرهم لانهم بقوا كتير".
واستطردت: "بجد أنا خايفة انزل ألبومي من الإحباط في الذوق الفني اللي حاصل رسالة صغيرة انتوا كده بتدمرونا احنا وبتقتلوا جوانا روح الإبداع لازم الشعب المصري يرجع تاني لأيام ام كلثوم وعبد الحليم أيام ما كان الفن فن مكانش بيعحبنا أي فنان والسلام من وجهة نظري اللي يمكن تكون مش مهمة عند ناس كتير احنا عندنا فنانين وأصوات لا تقل أهمية عن نجوم زمان يمكن لو كانوا اتولدوا في زمانهم كانوا فرضوا نفسهم عندنا مع حفاظ الألقاب مروة ناجي ريهام عبد الحكيم مي فاروق وغيرهم أصوات جبارة أنا بجد حبيت أكلمكم عن خوفي من إن تعبي يروح هدر لاني مبغنيش مهرجانات".
واختتمت: "كله علي الله أكيد وأنا طول عمري سايبة أموري علي الله بس أنا عايزة أنجح في بلدي أنا اللي الناس متعرفهوش عني إني عراقية الأصل وشاطرة جدًا في الغناء الخليجي وعندي فرص كتير بره لحد النهاردة بعافر لإني عايزة أكبر جوة بلدي الأول وبعدين أحقق اللي أنا عايزاه في الخليج بإذن الله بجد بجد اعتقد كلامي ده عن لساني كل فنانين جيلي وأتوقع أن محدش منهم هيعترض لإنهم بيواجهوا نفس المشكلة".