نور إسماعيل تكتب: بروحي دار (2)

باباهم قفل الباب ووقفهم كلهم قدامه زى العساكر
الاب: اسمعو الكلمتين الى هقولهم دول كويس..عشان مش هكررهم تانى
والى هيغلط فيكم ويعمل حاجة غير الى قولت عليها
هيتعاقب
الام: حتى انا !! ده انا امهم
بتعاملنى معاملة العيال يابو مروان
الاب: اه حتى انتى ...و اسمعونى ومحدش يقاطعنى (بنرفزة)
العمارة دى
صحابها هما الدور الى تحتنا واخدينه كله..راجل ملتحى ومراته ست منتقبة واولاده
وتحتهم راجل وعيلته بيقولو انهم من لبنان ومقيمين هنا معاهم بنتين ..من سنكم (شاور ع رحمة ونادية)
وجمبنا الشقه الى قدامنا راجل مسيحى وعيلته تمام
المعاملات بحدود
صباح الخير صباح النور..وبس
فاهمين
تيجو من مدارسكم مالكمش دعوة بحد
وانتى تيجى من الشغل ..لا تروحى لا علانه ولا فلتكانة
الاولاد مع بعض: حاضر يابابا!
ودلوقتى هتوضبو البيت وانا هاخد مروان نروح نجيب اكل ماشى
قدامكم بالظبط ساعتين تكونو خلصتو !
مبحبش الكركبة
الام: وهى ساعتين هيكفونا برضو (بتقول بضيق من تحكماته)
الاب: اه هيكفو ومش كل كلمة اقعد اعيد وازيد فيها
مش طرطور انا هنا فالبيت
كلمتى واحدة ومسموعة
بدآ التنضيف وبدآ اول يوم ليهم فالبيت والبلد دى ..كانو مخنوقين من رسم باباهم لحياتهم ع كيفه
بعد م كانو مبسوطين فالبلد الى كانو قاعدين فيها ومرتاحين ، فجأة قرر يرجع لبلده واصله :/
طب ليه ؟؟
واشمعنا دلوقت
مع انه شايف فعيونهم كلهم انهم مكانوش موافقين عالقرار ده ..بس هو معاهم زى نظام الجيش!
هو يؤمر
وهما ينفذوا
وعدت عليهم اول ايام وهما فحالهم .. من المدارس للبيت
ومن الشغل للبيت والايام بتعيد نفسها
بس كانو اهل العمارة حابين يتعرفو عليهم برضو .. اصلا هما فالعمارة عيلة واحدة
مسيحى ومسلم ومصرى وغير مصرى سوا
لاحظة من الست الى هى ام مروان ، ست محترمة ولبسها محترم
ومن الشغل للبيت ولا بتروح ولا تيجى
لحد تانى يوم
اتفقو كلهم الستات ..الست ام مينا
والست ام على
والست ام ..لينا وآن
يطلعو بليل يتعرفو عليهم ..
وفعلا تم التعارف وبدأت الدنيا تهون ع مامت مروان ومروان والبنات لما عرفو ناس والناس عرفوهم
بدل م باباهم قاطعهم عن كل الناس
صحيح فالاول باباهم عمل مشكلة لطلعوهم برغم ان محدش فالبيت له ذنب، بس اكتفى انه سود الليلة ع دماغهم
ونبه كالعادة مافيش اسرار تطلع برة
ومافيش اختلاط اوى بينهم
وتعدى الايام ... ويتجمعو كلهم رحمة الى ف تانية ثانوى
ونادية تانية اعدادى
ومروان اولى اعدادى..بعد المذاكرة يحكو ويتكلمو كلهم سوا
ويحكو ع اصحابهم الجداد والى بيحصل معاهم كل يوم
ومامتهم بتسمعهم وبتضحك
م بيصدقو باباهم يخرج عشان يعرفو يتنفسو شوية ، يحكو ويضحكو ويهزرو
براحتهم
من غير م تبقى كل حاجة غلط
من غير زعيق،، من غير مشكلة
من غير ضرب عالهايفة والى تستاهل !
مروان: هما كلهم كانو عايزين يصاحبونى عشان جديد
نادية: انا كمان عملو معايا كده وقعدوا يسألونى انتى منين ، وليه جيتى هنا
بس احلى حاجة ان مدرستى بنات بس
بخاف من المدارس المشتركة دى
مروان: هما هنا عكس كل الناس..الابتدائى واعدادى منفصلة
والثانوى
مشتركة
رحمة: ايوا ..عندنا الولاد كتير اوى
بخاف اطلع الفسحة من فصلى بفضل قاعدة لحد م تخلص مع ولاء وسارة اصحابى
بنات عساسيل اوى
نادية: انا اكتر بنات بحبهم خالص وبرتاح معاهم ،منة وهبة
وفرحت لما عرفت انهم ساكنين قريب عشان نروح ونيجى سوا
مروان: انا بقى عرفت الفصل كله ههههههههههه
نادية: م انتو ولاد كله بيعرف كله
مروان: بس ف ولد جدع اوى معايا فالفصل
عمل موقف حلو معايا انهاردة
رحمة: حصل ايه ؟
مروان: كنت بجيب اكل من الكانتين فالفسحة ، وقاعد فحالى جه
واد تجين وغلس واصلا كلهم بيكرهوه
غلس عليا
نادية: غلس عليك ازاى
مروان: قعد يقول انت قوم من هنا ده مكانى ، وعيل رخم
قولتله محدش بيحجز اماكن هنا
راح شدنى من القميص بتاعى
الام: (من المطبخ) ضربك يامروان ؟؟
مروان: هو كان جاى يضربنى روحت انا ضربته فسنه خليتها تنزل دم
وبصراحة ضربته وكنت خايف يخرشمنى اصله يفصل منى 4
رحمة: يا مروان ضربته ليه ، اهو هيستقصدك بعد كده
مروان: هو رايح يضربنى روحت انا بصراحة شنكلته من تحت رجله وقع
ده وقع
وقام عليا زى الطور وانا شغال اصد فيه ..لاقيت واد زميلى فالفصل ماليش علاقة بيه
جه وضربه معايا
وانا شوفته اتشجعت ضربناه سوا
بس جه المشرف من بعيد راحو العيال نبهونا وبطلنا ضرب فبعض لحسن ناخد انذار ويقولو لاولياء امورنا
ومشيت روحت سلمت عليه ولاقيت هدومه باظت من التراب
قعد يعدلها
واتصاحبنا
نادية: خليك معاه ده ..وسيبك من التانى
وخليك فحالك عشان بابا لو عرف بالضرب والخناقات دى هيضربك ويروحلك المدرسة
مروان: لا مانا مش هقوله
سمعو صوت الباب بيتفتح ..ومرة واحدة اتخرسو وكشروا
الاب: مش قاعدين ع مذاكرتكم ليه ؟؟
مروان: م احنا خلصنا
الاب: اتعشيتو ؟
الام: انا بحضر اهو
الاب: طب كلو ويلا نامو عندكم مدارس
رحمة: لسه بدرى
الاب: انا قولت تنامو !
رحمة: (ببرطمة) يعنى منقعدش سوا ياساتر يارب
الاب: بتقولى ايه يابت تعالى
رحمة: (جاية خايفه) مقولتش حاجة
الاب: طب غورى
اكلو ودخلو ينامو حتى لو مافيش نوم
بس ده امر...وواجب التنفيذ!
================
شهر كمان عدى
وكانو قاعدين بيتغدوا ..
نادية: منة بتقولى هاتى رقم تليفون بيتكم قولتلها لسه بابا مركبهوش
مروان: وانا كمان باسم ومالك عايزينه
الام: م تركبه يابو مروان ينفعنا ، انا اكلم اهلى
وانت تكلمهم فالبلد
الاب: (احمرت عنيه) انا قولت قبل كده لا ..ومحدش يفتح موضوع احنا ناقشيناه قبل كده
الام: ليه بس..مسيرنا نحتاجه
الاب: اولا انا مش عايز اكلم حد ولا حد يكلمنا، وبعدين عندك بنات ياهانم
مبتسمعيش عن المعاكسات
والى بيعملو الشباب والبنات بتمشى وراهم والفضايح بعد كده
الام: بناتك متربيين الحمدلله
الاب: وانا قولت مالوش لازمة ومتقعديش تراجعينى فكل كلمة (خبط المعلقة فالطبق بعنف صوتها رعبهم)
نادية: بس احنا محتاجينه وعايزينه
الاب: (قام ناحية نادية ومسكها من دراعها جامد) انا مش قولت خلاص
بتتكلمى ليه
نادية: (عيونها فيها دموع) انا..انا
الاب: ماهو انا اصلى كلامى مبيتسمعش ، كلامى بتضربو بيه عرض الحائط
ماااااشى ..
مشى جاب الحزام
ونادية خايفه وحضنتها رحمة ..
الام: خلاص طيب.. مكانتش تقصد يابو مروان
بالله عليك
زق الام وشد نادية من دراعها من عالاكل ..
الام: طب مش عالاكل طيب
الاب: لما اقول كلمة تتسمع فاهمة ..
فاهمة
فاهمة
بدآ يضرب فيها بقسوة ورا بعض مأخدتش نفسها حتى وهى بتعيط وبتستنجد باخواتها بس هما مش قادرين يخلصوها منه ليحصلوها ولانه منبه محدش يتدخل وحد منهم بيتعاقب !
محدش كان ليه نفس ياكل بعد الى حصل وعياط نادية جوه فالاوضة
الاب: هوس!! اقطمى
مسمعش نفسك
والله لو سمعتك بتعيطى لاكمل عليكى
دخل مروان ورحمة حضنوها ..
الام: (زعلانة ومكشرة) تعالى يارحمة شيلى الاكل
رحمة: حاضر ياماما (بتطبطب ع نادية) يار يموت
والله كرهته
مروان: انا لما اكبر... هخدكم بعيد
ومش هخليه يضربكم تانى
حضنو بعض وعيطو سوا...
يتبع..