احدث أغانى الثورة ... مطلوب دكر

مطلوب زعيم.. لشعب طول عمره عظيم.. لشعب كان فاعل زمان لكنه هان حتي انه صار في ايدين كبار وايدين صغار مفعول به بيقسموه ويفرقوه ويقطعوا ف عين اللي جابوا واللي جاب ابوه.. عشان يموت او ينتهي.
مطلوب زعيم.. لشعب حكامه خانوه وتوهوه وغيبوه واللي انتبه منه غموله عينه وكمموه وسلموه ف المعتقل لكلاب جعانة يقطعوه.. لكنه رغم القهر قام ث‍أر وزام وفي اسبوعين زلزل حصون الجلادين هد النظام فوق راس جميع المفسدين.
مطلوب زعيم.. يحمي الحقوق.. يعدل ما بين الناس تمام زي الفاروق.. ويكون حنيّن علي الفقير.. وعلي اللي فاسد يفتري.. يهدم علي دماغه الشقوق ويعلقه في المشنقة او يرفعه علي راس خازوق..
مطلوب زعيم.. ما يقولش علي الخواف حكيم.. ويكون كمان سمعه سليم يسمع لنبضة قلبنا.. ويكون مكانه في وسطنا.. مايعيش أبداً في القصور والبعض منا للاسف ساكنين قبور.. يشرب وياكل أكلنا ويعيش كواحد مننا.. يسمع لنا ويشور وياخد رأينا وقت الخطر نتلم حوليه كلنا ونضحي وياه بعمرنا..
مطلوب زعيم.. علي المسئولية يكون امين.. ويكون جرئ ويكون شجاع.. مش إمعه وحتة بتاع.. يعرف يقول للظلم لأ ويموت ولا يفرط في حق..
مطلوب زعيم.. يفضل بحزمه بالقانون.. او نعزله.. لو للامانة يوم يخون.. لا يشترط الشكل ايه.. لا يشترط السن ايه.. لا يشترط الملة ايه.. شرطه الوحيد يكون بشر... بالاختصار مطلوب دكر