رسالة نارية من وكيل باسم مرسي للاعب (صورة)

وجه كريم حلمي وكيل أعمال نجم الزمالك ومنتخب مصر باسم مرسي، رسالة إلى اللاعب، وذلك عبر حسابه الشخصي عبر "فيس بوك".

وجاءت الرسالة على النحو التالي:

"من تقريبا سنتين أو ثلاثة مواسم كرويه اذا صح الامر ..
كتبت تعليقي علي الصوره دي .. و اللي تقريبا بسبب تعليقي اللي كان من وجهة نظر #اصحاب_باسم و الشخص الغير أمين اللي جبته عشان يشتغل معايا و علمته الشغل و بعدين طلب يبقي شريك !!! أو يقلب ألاعيبه علياء و دوره جاي و هتكلم عليه بس عشان مش وقته حاليا .. خلينا في باسم
تعليقي كان ان في فرق بين #حازم_امام و #ابراهيم_سعيد و #ابو_تريكه و ان كل شخص بيختار الطريق و الأسلوب اللي عايزه عشان يكسب الناس و الخ و كان كلامي موضعي جدا من وجهه نظري و ماكنش مهاجمه و في ناس هتقول طيب هو انت ليه بما انك كنت وكيله مكلمتوش بينك و بينه المفاجاة بقي ان باسم في الوقت دا ماكنش بيرد عليا أصلا و بعد انتقاله للزمالك اتغير معايا تماما زي اي لاعب مصري عينه تيجي في الفلاش ..... مع انه قبل انتقاله للزمالك كان عايش معايا في البيت عايش بمعني عايش ما علينا .. و بعد التعليق دا باسم زعل جدا مع انه أصلا ماكنش و لا بيرد عليا و لا أنا عارف أوصله ؟؟؟
حاليا مصر كلها كارها #باسم_مرسي و اللي بجد الناس مش فاهماه ان باسم شخص طيب جدا جدا و غلبان جدا بس حاوليه ناس مش طبيعه خالص و لان باسم طيب و هما مش طيبين خدعوه بمفاهيم بالنسبالهم فيها لباسم الخير و الشهرة و الشو و الخ و باسم بطبعة طيب فصدق ..
أنا من 3 مواسم كرويه قلت تعليقي و بعد ال 3 مواسم الناس كلها بتقول نفس كلامي مش بكتب التعليق دا عشان الناس تقول و الله #كريم_حلمي كان عنده حق بس عشان ( حكم الناس علي الناس ) و استغلال الناس للناس و الظلم الغير مبرر ..
نصيحتي لباسم هي هي من 3 مواسم و مش هتتغير انت لاعب كويس و انت مركز و بعيد عن الناس اللي حواليك و هما اتنين المريض النفسي و الكذاب و الطماع اللي كان شغال معايا .... و التاني الجاهل و هو بالنسبالي السبب الرئيسي في ضياع باسم لانه بالمعني الحرفي شخص سئ جدا و جاهل و غبي حتي BS 17 كانت فكرتي بعد ما اجيب لباسم عرض من أوربا و هو راح قل لباسم نستغل كريم و بعد كده خلاص
باسم مرسي كان مشروع لاعب كبير جدا و طموحاتي مع باسم ماكنش ليها حدود و الحمد لله كنت اقدر زي ما قدمت باسم في أول موسم مع الزمالك كنت ممكن اعمل آكتر باْذن الله ..
في مواقف كتير بيني و بين باسم و مواقف حلوه و صعبه و كتير ..
أفتكر موقف زي ان باسم كبرني جدا مع وكلاء مصر كلهم ، كلهم كلموه عشان سيبني و يشتغل معاهم و رفض و أفتكر ان اداني نسبتي بتاعت اول موسم بس زي ما كنا متفقين بالظبط
بس برضو أفتكر ان لما سافرت فرنسا عشان اجيب لباسم عرض فوجئت ان باسم مع مدحت شلبي في التليفزيون زي اي شخص عادي و لا حتي قالي !!! و لما سافرت إطاليا و جبت عرض لباسم صاحب باسم نصحه ازاي تروح فريق صغير في الدوري الايطالي .. مع ان الفريق كان serie A والوكيل الايطالي منتظر رد مني عشان يبعت العرض و باسم قالي لا لا لا ..
عموما أنا بتمني ان باسم يفوق قبل ما يخسر اكتر من كدا.. و بتمني الاعلام يساند باسم لعل و عسي ..."