الأسطورة بتقول الستات نكدية..وطبعا مش محتاجة لا نباهة ولا فتاكة علشان نعرف إن اللي ورا الإشاعة المغرضة دي راجل ..ولإن احنا اللي عقلنا دايما كبير وبنعدي ونسامح ونستحمل خفة دمهم مفكرناش في مرة نرد أو نكذب الإشاعة المفترية دي ،بس خلاص جه الوقت بئه بصراحة اللي لازم نرد فيه..اه لأحسن انتوا كده صدقتوا نفسكوا ولازم حد يردلكوا عقلكوا بتقولوا علينا اننا بنختلق المشاكل ونكبرها ونعمل من الحبة قبة لحد ماتنتهي بدراما صح ؟؟ طيب فكرت للحظة إن الست ممكن تكون نكدية لانها عايش مع كائن منكد عليها ؟؟؟ ها هجت في بالك؟فكرت فيها ولا انت فاكر إنها كائن اشتعال ذاتي وسيادتك برئ من تهمة كونك الكبريت اللي مولعلها في حياتها؟؟
طيب بالراحة كده علشان اشرحلك الفرق بينك وبينها...انت بتنسي كل حاجة وهي اللي بتفكرك بكل حاجة ،انت اللي بتنسي الشرابات فين والقميص اللي قطعت زراره رميت زراره فين .. والجزمة البني اللي جبتها من 4 سنين حاططها تحت انهي سرير..صح؟ استني رايح فين انا لسه مكملتش ...انت بتنسي عيد ميلاها وعيد ميلادك وعيد ميلاد حماتك وعيد ميلاد الست والدتك..بتنسي تجيب الولاد من المدرسة..بتنسي اصلا ان عندك ولاد!!
هي بئه..فاكرة كل تفصيلة في حياتك وفي حياتها ،من أول القميص اللي كنت لابسه اول مرة اتقابلتوا لحد شرابك اللي رميته جنب الدولاب وانت داخل تنام ،هتفكرك بكريم شعرك اللي خلصته ولازم تجيب غيره...هتفكرك بمكالمات التليفون اللي مفرض تعملها ومكالمات التليفون اللي المفروض تطنشها ..هتفكرك بفاتورة الكهربا مش علشان تنكد عليك مثلا زي ماسيادتك فاكر لكن علشان متتكومش علي الشهر اللي بعده. قولي انت بئه فكرت مرة تفكرها بأي حاجة تخصها ؟ فكرتها بميعاد دوا او بالشامبو بتاعها اللي خلص ، سألتك مرة فستاني الاسود أبو فيونكتين فين وعرفت ترد عليها ؟؟ اوعي تتحجج بشغلك وإنك دايما مشغول ..ماهو حتي لو هي ست بيت ومبتشتغلش فوراها شغل 24 ساعة مبيرحمش و مبتاخدش منه حتي يوم اجازة ،واوعي تتحجج بالدنيا اللي بئت صعبة والساقية اللي مربوط فيها..والأسعار اللي بتولع والدولار اللي بيتنطط و..و... انت مش لوحدك..هي مربوطة اكتر منك في الساقية دي والعمليات الحسابية والأكروبات الإقتصادية اللي بتعملها كل شهر علشان الشهر يكمل في ظل كل الأزمات اللي بتتكلم عليها دي ميعملهاش لاخبير اقتصادي ولا حتي بهلوان الحركات الخطرة في السيرك
الست كائن حساس جدا..هتحس انك بكدبك مهما داريت وهتعرف ان في سر مخبيه ولو عملت فيها رأفت الهجان..عندها حاسة سادسة مجنناها مخلياها تتنبأ بالفازة اللي هتقع من ايد الواد وبدور البرد اللي هيجي للبنت قبل الإمتحان وبتتنبأ بالخناقة الجاية قبل ماتحصل، بتعرف وانت نازل إن كنت هترجع متأخر ولا لاء حتي لو انت نفسك متعرفش انت راجع امتي...سمعاك بتضحك وبتتريق وبتقول دي ست ولا سوبر وومان!!
انت اللي مش عايز تفهم وتقدر إن لولا المنح الربانية دي مكنتش بئت أمك اللي هتجري عليها وقت المصايب وتعيط في حضنها ..ولا كانت هتبقي اختك اللي وقت ماتعمل مصيبة هتجري عليها علشان تداري عليك ولا كانت هتبقي حبيبتك اللي بتسهرك الليالي وتنسيك اسمك..النكدية دي ساعات بتتخانق علشان عايزة تطمن علي غلاوتها في حياتك ومش هتقدر تعدي اليوم من غير ماتصالحها ،النكدية دي يمكن بتتخانق علشان تسمع صوتك بعد ضبطت نفسك علي الوضع الصامت اللي بيشتغل تلقائي أول مابتدخل البيت،النكدية دي احتمال كبير تكون بئت نكدية لإنها عايشة مع كائن نكدي بس مش اخد باله والأسطورة بتقول ان وراء كل ست نكدية ..راجل منكد عليها!
