مراتي غبية.. يا حفيظ

مراتك نكدية أنا عارفة.. ومبهدلة في روحها والله العظيم مصدقاك.. وطول النهار عماله تجعر في العيال وأمة لا إله إلا الله سامعه صوتها صوتها واصلنى لحد هنا.. بس أنا حسألك كام سؤال على الماشى.. مش مراتك دى هي نفسها اللى كنت حتموت نفسك علشان تتجوزها فاكر لما كنت بتتخانق مع مامتك علشان مصممة تجوزك بنت أختها ونشفت دماغك يا مراتك يا بلاش ماهى نفس الست إيه اللى جرى يا راجل يا طيب..
طيب فاكر لما كنت بترغى معاها بالساعات في التليفون وتبقى مزقطط إنها بتكلمك والحاج يتخانق معاك على الفاتورة طيب بتاكل سد الحنك ليه أول ما تدخل من باب الشقة وتهز راسك كل ما تكلمك ماهى نفس البنى أدم إيه اللى جرى.. طب بذمتك يا شيخ مش كنت هتموت من الفرحة وانت بترقص معاها يوم الفرح علشان أخيرا ربنا حقق حلمك أومال مش طايق تبص في وشها ليه ماهو نفس الوش.. أنا سمعاك وانت بتقول كنت مجنون لأنها اتغيرت وبانت على حقيقتها بوز النكد بس الحقيقة اإها ما اتغيرتش انت اللى غيرتها قلبتها من البنت الرقيقة العسولة أم دم خفيف لخالتى اطاطا غيرتها بجمودية قلبك وتريقتك عليها والحمل اللى رميته على كتافها بعد ما قولتلها كل الستات بتعمل اكتر منك لما ما سمعتش شكوتها وهانت عليك دموعها.. أقولك جرب تتغير وشوف إيه اللى هيحصل متتريقش على بطنها اللى كبرت دى والده مرتين قيصرى يا مفترى وانت بتاكل محشى الكرنب بتبقى زى خزان المية.. بلاش وانت بتتفرج على التليفزيون تقولها أدى الستات ولا بلاش.. الستات اللى في التليفزيون مش بتناول نفسها كوباية ميه ومراتك ولا الفليبينيه.. وبعدين ما انت كمان كرشت واقرعيت وبقى شكلك عجيب بس هي بتحبك زى ما انت ومش شايفه غيرك..
قولها والله وشك احلو لما زدتى عاوزين نعمل رجيم.. قولها صباح الخير الصبح وتصبحى على خير وفي نص اليوم أخبارك إيه.. بلاش طلبات غلسه الشراب الكحلى زى الشراب الأسود متحبكهاش وتعمل خناقة البس اللى تلاقيه في الدرج لو ولادك بيبيهات شيلهم حتى لو بيعيطوا ولو في مدارس ذاكر لهم وورينى جدعتنك أنك متزعقش لما تلاقى الغباوة معبيه براميل.. طبطب عليها الستات بتحب الطبطبة قولها بحبك هي هبله وبتصدق.. الوردة ب3 جنيه هاتلها وردة مرة في الأسبوع احتمال كبير تجيلها سكتة قلبية وتخلص منها بطريقة مفيهاش شبهات!