خالتي أطاطا

مراتك نكدية أنا عارفة.. ومبهدلة في روحها والله العظيم مصدقاك.. وطول النهار عماله تجعر في العيال وأمة لا إله إلا الله سامعه صوتها صوتها واصلنى لحد هنا... بس أنا حسألك كام سؤال على الماشى.. مش مراتك دى هي نفسها اللى كنت حتموت نفسك علشان تتجوزها فاكر لما كنت بتتخانق مع مامتك علشان مصممة تجوزك بنت اختها ونشفت دماغك يا مراتك يا بلاش ماهى نفس الست إيه اللى جرى يا راجل يا طيب.. طيب فاكر لما كنت بترغى معاها بالساعات في التليفون وتبقى مزقطط إنها بتكلمك والحاج يتخانق معاك على الفاتورة طيب بتاكل سد الحنك ليه أول ما تدخل من باب الشقة وتهز راسك كل ما تكلمك ماهى نفس البنى آدم إيه اللى جرى.. طب بذمتك يا شيخ مش كنت هتموت من الفرحة وانت بترقص معاها يوم الفرح علشان أخيرا ربنا حقق حلمك أومال مش طايق تبص في وشها ليه ماهو نفس الوش...أنا سمعاك وأنت بتقول كنت مجنون لأنها اتغيرت وبانت على حقيقتها بوز النكد بس الحقيقه إنها ما اتغيرتش إنت اللى غيرتها ، قلبتها من البنت الرقيقه العسولة أم دم خفيف لخالتى أطاطا غيرتها بجمودية قلبك وتريقتك عليها والحمل اللى رميته على كتافها بعد ما قولتلها كل الستات بتعمل أكتر منك لما ما سمعتش شكوتها وهانت عليك دموعها... أقولك جرب تتغير وشوف إيه اللى هيحصل متتريقش على بطنها اللى كبرت دى والدة مرتين قيصرى يا مفترى وأنت بتاكل محشى الكرنب بتبقى زى خزان الميه.. بلاش وأنت بتتفرج على التليفزيون تقولها آدى الستات ولا بلاش.. الستات اللى في التليفزيون مش بتناول نفسها كوباية ميه ومراتك ولا الفليبينية.. وبعدين ما أنت كمان كرشت وأقرعيت وبقى شكلك عجيب بس هي بتحبك زى ما أنت ومش شايفه غيرك..
قولها والله وشك أحلى لما زدتى عاوزها نعمل رجيم.. قولها صباح الخير الصبح وتصبحى على خير وفي نص اليوم أخبارك إيه.. بلاش طلبات غسل الشراب الكحلى زى الشراب الأسود متحبكهاش وتعمل خناقة إلبس اللى تلاقيه في الدرج لو العيال بيعيطوا شيلهم ولو في مدارس ذاكر لهم وورينى جدعتنك ، متزعقش لما تلاقى الغباوة معبية براميل.. طبطب عليها .. الستات بتحب الطبطبة قولها بحبك هي هبله وبتصدق .. الورده ب3 جنيه هاتلها وردة مرة في الأسبوع احتمال كبير تجيلها سكتة قلبية وتخلص منها بطريقة مفيهاش شبهات!