سماح أنور: غلطة عمري عدم اعترافي بإبني وادعائي بأنى تبنيته

كشفت الفنانة سماح أنور، أنها لم تندم في حياتها على أي غلطة قامت بها إلا غلطة واحدة تتمثل في عدم اعترافها بإبنها في البداية وادعائها بأنه ابنها بالتبنى، حيث قالت: "اعترفت بابنى ادهم وكان عمره 5 سنين، بعدما قولت انى متبنياه، وكانت غلطة عمرى ووجع عمرى ان معترفتش بى عملت كدة فى ابنى اكراما لوالدى وولدتى لكن المفروض كان يبقى فى حدود، وبعد وفاتهم اكتشفت انهم صحابى وان معنديش اصحاب غيرهم".
وأَضافت خلال لقائها فى برنامج "فحص شامل" على قناة الحياة قائلة: ادهم بيندهنى ماما وهو اصلا مكنش عارف انى بقول عليه انه ابنى بالتبنى، وبدأت انتبه ان فى ناس هيقولوا له دى امك متبنياك وده ابنى".
وتابعت قائلة: زواجى كان عن حب من طيار واستمر الزواج لمدة 6 سنين، وبعدها حدث طلاق ثم توفى، واتعرفت عليه فى الطيارة لما كنت مسافرة وحصل تليفونات بيننا وكانت أزمته انى بمثل، ولما عرف ان مفيش مشكلة ان اترك التمثيل، طلب منى الزواج ووافقت لكن اهلى رفضوا ان ابطل شغل وقالولى انى نجمه ومينفعش اعتزل، ولما صممت طلبوا منى اخفاء امر زواجى، وهم كانوا شايفين ان العلاقة دى هتنتهى ودايما كانوا يقولولى كدة، وفعلا انتهت قبل وفاته وحدث طلاق".
واوضحت قائلة: "انا كنت مستعدة ان اضحى بالفن عشان زوجى وقولت له لو عايزنى اسيب البيت ومصر خالص مستعده، لان كان فى حب وابنى ادهم، لكن زوجى فى الفترة دى ابتعد والحكاية باظت ومفيش امكانية انى اصلحها وخصوصا ان حكاية اخفاء الزواج جرحته وكان معاه حق".
واشارت قائلة: "انجابى ابنى ادهم محدش كان يعرف الا سمير صبرى وهالة صدقى، وللاسف ابنى ميعرفش اهله ابدا من جده وجدته لولده وهما محاولوش يتعرفوا عليه ومحاولتش اقتحم شىء مجاش".
وأضافت: "أول اعتراف لي بإبني كان في برنامج مع محمود سعد، ولما عرف سعد إن أدهم ابنى وليست متبنياه جاء له هلع وقالى مش معقول ومن اليوم ده ارتحت جدا، وادهم لم يعاتبنى لكن اعتذرت له وحكيت له بالتفصيل وهو سامحنى من اول لحظة واكثر مرة حضنى عشان اعيط من ذنبى".