محمد رمضان يكشف تفاصيل إشادة عمر الشريف به

كشف الفنان محمد رمضان، أنه لفت نظر الفنان العالمى عمر الشريف، بعدما قام بتمثيل ثلاث مشاهد أمامه، حيث قال: "روحت قبل تصوير المسلسل بثلاث ساعات، وكنت بقدم دور ابن البواب وروحت قعدت على الدكة الساعة 6 الصبح واعطتنى البنت بتاعت الملابس، كل ما يخص الشخصية".
وأضاف خلال لقائه فى برنامج "كل يوم" على قناة ON قائلا: "لبست التىشيرت وبصيت على اللبس لقيته جديد جدا ومش منطقى لانه شبه الشخصية، فقلعت التيشيرت ومسحت به الارض، وبقى متبهدل شوية عشان الناس تقتنع انه لبس ابن البواب، ولبسته وقعدت على الدكة وبدأت اشرب سيجارة، وكل ده كنت بعمله وانا ببص فى زجاج السيارة اللى ادامى".
وتابع قائلا: "لقيت الباب الزجاجى اتفتح والزجاج اللى كنت بضبط فية نفسى اتفتح ونزل منه استاذ عمر الشريف وكان نفسى الارض وقتها تنشق وتبلعنى وقالى انت مين، رميت السجارة وقتها طبعا، وقالى مين قالك تقلع الفانلة وتعصرها وتمسحها فى الارض، قولت له انا بعمل شخصية ابن بواب واللبس شكله جديد".
واشار قائلا: "استاذ عمر قال للمخرجة ده ولد مجنون مقرب وشه من الزجاج وبقوله امشى لكن اتضح ان فعلا الزجاج من الخارج لا يظهر من بداخله، لكن انا مبسوط باللى عمله".
واوضح قائلا: "فوجئت بان استاذ عمر كان بيشوف المشهد بينى ولطفى لبيب وكان بيتفرج عليا، وقال عليا يستحيل يكون ممثل اكيد ابن البواب فعلا ولو شخصيته برة التمثيل مختلفة يبقى احسن ممثل فى مصر".