بالصور.. أطرف مواقف «النشطاء» في المستشفيات.. محمد: «عالجت واحد بيمثل عشان خبط حد بعربيته».. أحمد: «قلت للدكتور حاسس إن الرئة فيها هوا».. وأمل: «مريضة قالتلى هجرب لبوسه مشتغلتش هرجعهالك»

أطلقت صفحة «الكومنت الفصيل» على «فيس بوك»، «إيفنت» جديدا تحت عنوان «مواقف الدكاترة والمستشفيات»، يروي خلاله مستخدمو موقع التواصل الاجتماعى، أطرف المواقف التي واجهتهم مع المستشفيات والأطباء، وكذلك يروي الأطباء مواقفهم مع مرضاهم.
- حاسس الرئة فيها هوا
قال أحمد: «بتشتكي من إيه يا أستاذ؟ قولتله أنا حاسس أن الرئة عندي فيها هوا يادكتور».
- هجرب لبوسه مشتغلتش هرجعها لك وآخد فلوسي
وأضافت أمل: «مرة كنت واقفة في الصيدلية جت واحدة تقولى الواد مبيعملش بيبي بقا له بتاع أسبوع عايزة له حاجة جبت علبة لبوس جلسرين هي شافت العلبة من هنا والست اتخضت.. لا انا عايزة لبوسة واحدة قصيها..يا حاجة مبتتقصش.. انتوا حرامية عايزاني اشتريها كلها عشان تبيعوا إلاهى ما يبارك لكم وفي الآخر قالت انا هاخدها بس هجرب لبوسة الواد عمل بيبي ماشي معملش في ظرف 3 ساعات هرجعها لك واخد فلوسي.
وتابعت أمل: «انا روحت قايلة لها الصيدلية اللى هناك عندها نوع احسن وارخص إنما ده بيشتغل بعد 3 أيام كمان.. على فكرة أن شريط اللبوس اللى عملت عليه الحوار ده كان بجنيه وربع باين.. صيدلة واللى عايزينها».
فين صورة البيبى
وتذكر عمر أحد المواقف، قائلًا: «أنا كنت تعبان وقعدت 9 أيام في المستشفي، ودخلت العناية ولما فوقت لقيت نفسي وسط ناس كلها على سرايرها وعليها الأجهزة، وانا كل اللى عليا اصوت واقولهم طلعوني من هنا والدكاتره تهدي فيا وانا ابدا».
وقالت أرنوبة: «انا شغالة في التحاليل، جاتلى واحدة من كام يوم تعمل اختبار حمل.. قولت لها مبروك انتى حامل وبديها التقرير فرحت اوي وفتحت الفايل وبصت لى وكشرت قالتلي فين صورة البيبي».
- مريض بيتخانق والإبرة في راسه
وروى محمد: «وانا بخيط شاب في الطوارئ وبسأله مين عورك؟ قالى واحد خبطني بسكينة وهجيبوا لك تخيطه يادكتور دلوقتي.. ماخلصتش الكلمة لقينا اللى عورة زق الباب ودخل علينا العمليات الصغري بالمطواة يكمل عليه.. واللى بيتخيط زقني والابرة في راسه والله وطلع مطوته وقعدوا يجرو ورا بعض في الاستقبال.. التمريض قعدوا يصوتوا وانا خدت ساتر لحد ماخلصوا».
- أعمل وظائف كبد ولا كلى
وقال أيمن: «مريضة جيالى عايزة اعمل صورة دم يادكتور.. وظائف كبد لا كلى ولا اقولك كبد.. بص يادكتور انا هعمل اشعة بالصبغة اعمل وظايف ايه».
وأضافت شيماء: «كنت بايتة في المستشفي وانا صغيرة والدكتور سوداني فبيسألني تعرفي السودان فين بقوله اه تحت مصر قالى تحت مصر ازاي يعني دايسنا.. قولتله قصدى في الخريطة يادكتور».
- أنا سليم بس غلطان في الحادثة
وروى محمد: «من كام شهر لقيت حادثة على الطريق كانت بسيطة، لقيت واحد نايم على الأرض والناس ملمومة نحوه.. فنزلت اشوف ماله، وقولت اعمله إسعافات اولية وانقله المستشفي.. أول ماوصلت عند اللمة وبقولهم وسعوا لو سمحتوا انا دكتور ونزلت بقرب منه أشوف النفس.. لقيته بيوشوشني انا سليم اوعى تعمل حاجة انا بمثل عشان خبطت الرجل وانا غلطان.. وانا مقدرتش الحقيقة انفجرت ضحك، وقام زي الحصان وعم الفرح في ارجاء المكان».