رسالة قوية من نجلة سعيد صالح للدفاع عن "محمد رمضان"

وجهت نجلة الفنان الراحل سعيد صالح، رسالة خاصة للدفاع عن الفنان محمد رمضان.
وكتبت على صفحتها الشخصية عبر موقع التواصل الاجتماعي "الفيسبوك": "محمد رمضان وحش وبلطجي وبيعلم الشباب البلطجة وحيبوظ أجيال ويتسبب في ضياع وانهيار المجتمع، لكن لما أنور وجدي خرج من السجن فى أمير الانتقام ولف على الفيلم كله قتلهم واحد واحد عشان بياخد حقه كان عادي، لما عادل إمام انتقم لصاحبه و قتل بنفسه كام واحد فى سلام يا صاحبي كان عادي، لما سعيد صالح أخد مرات اخوه و شغلها في الكباريهات فى المشبوه كان عادي، لما أحمد السقا الظابط يسيب القانون و ينتقم لمراته في خطوط حمرا عادي، لما ميرفت أمين تقدم دور زي دورها في "ثرثرة فوق النيل" ماتبقاش بتبوظ بنات جيلها وتبقى عادي، عادي إنك تعمل حركات فى حواجبك و تحلق جزء زي رامي عياش، عادي انك تحلق كابوريا زي أحمد زكي، عادي انك تنتحر في الجيم عشان يطلعلك عضلات "عمرو دياب"، لكن حد يحلق زي محمد رمضان يا ليلة سوخة، من أحلى المسلسلات اللى اتعملت فى تاريخ الدراما مسلسل "أفراح القبة" و كل الناس أجمعت على ده مع إن بطلة "أفراح القبة" هي وعيلتها الدعارة عندهم عادي".
وتابعت قائلة: "كل اللي فات ده عادي، إنما محمد رمضان مايفتحش بقه بكلمة، انتوا عايزين كل الأفلام جميلة وحلوة وكل الممثلين مؤدبين و كيوت و بيزرروا القمصان لحد زورهم".
وأختتمت رسالتها قائلة: "على فكرة بمزاجكوا أو غصب عنكوا محمد رمضان، عنده جمهور كبير أوي أوي و ليه اللي بيستنوا أعماله كل سنة، يا جماعة والله الموضوع بسيط اللي مش عاجبه محمد رمضان مايتفرجش، أقول قولي هذا واستغفر الله لي ولكم".