ياسمين مجدي تكتب: أمل رغم كل ألم

دايما جوا كل واحد فينا كلام صعب يتحكي..يوجعك لو فكرت تحكيه و يكسرك كل ما تفتكره..حاولت تنساه..حاولت حتي تخفيه..بس معرفتش ولا قدرت..عشان الكلام ده رغم قسوته بقي جزء منك.. علي قد وجعه مقويك..و علي قد صعوبته هتفضل قادر تكمل بيه..من غيره هتبقي بني أدم تاني..بني أدم من غير حكايه..حتي لو كانت صعب تتحكي.. حكاية كل ألم مريت بيه..كل وجع تجاهلته و برضو كملت..كل امتحان كنت خايف منه و عديته..كل خطوة خطيتها برجل بتترعش بس برضو ماشي و مكمل طريقك..كل لحظة ضعف نجحت انك تخفيها و تبينها قوة..كل ضحكة طلعت منك بعد عناء.. كل بسمة طلعت و هي مدارية دمعة.. كل فرحة جواك بتعافر رغم الوجع ال بيحاوطها.. بتعافر تطلع للنور رغم ولادتها في الضلمة.. كل ده جزء منك.. مهما كان صعب و حمله اتقل..كل ده هو "انت" بروحك ال بتعافر جواك عشان تعدي و تكمل.. لو بطلت تحاول و تعافر.. ممكن تموت! مفيش بني أدم ملوش حكاية أو حتي حدوتة صغيرة.. الناس أسرار و كل يوم واحد فينا بينجح انه يخفي السر ده بس كل مرة بطريقة مختلفة.. لمجرد ان ال جواك من كلام للأسف مكتوم.. نفسك تتكلم و تحكي بس مش قادر حتي تنطق.. مش لازم الكلام الجواك يكون قصة حب فاشلة زي ما كتير بيفتكروا..في حاجات كتير ممكن تكسر البني أدم اكتر من فشل قصة حب ..في كسرة في شغلك..في أمان مش لاقيه في بيتك..في فراق ابوك و أمك ال نفسك بس تلمحهم.. في وجع صديق..وجع أهل..وجع أخ /أخت..الدنيا ملاينة وجع علي قفا مين يشيل..ال مجربش وجع كل دول و فاكر ان نهاية قصة حب فاشلة هي أصل أي وجع يبقي ميعرفش يعني ايه وجع..! بس وسط كل ده دايما في نور.. نور مش دايما بنشوفه.. بس اكيد لمحناه.. نور بيطمنك و بيقولك "كمل" متيأيسش.. لسة حدوتك مخلصتش.. انت لسة تقدر تكمل.. طول ما لمعة عينيك مانطفتش..و طول ما تتر النهاية لسة منزلش.. النور ده هو "الأمل" ال بيخليك مكمل.. مكمل مهما كان قدامك الطريق مكسور.. أمل ان بكرة قلبك هيضحك.. مهما كان بايت بيبكي.. أمل أن الوجع مسيره يخلص.. مهما كان اختفاؤه مستحيل.. أملك في بكرة حتي لو مكمله بنزيف وجعك.. هتقدر تتطبطب عليه بضحكتك و تطيب خاطره بإيمانك.. مهما كان
الأنتظار صعب .. و مهما كان الصبر قاتل.. مهما كانت حكياتك صعب تتحكي.. مهما كانت محبوسة ورا كلام مكتوم.. أملك يقدر يخليك تعدي كل دول.. بأيديك تقدر تشقلب حروف وجعك من ألم جواك لأمل مكمل بيه.. طول ما انت بتعافر.. بتعافر و انت متشعبط في بصيص النور.. بتعافر بالأمل رغم كل ألم جواك .. يبقي آكيد هتقدر..! حدوتك ال متسببة في ألم جواك هي سبب وجودك بالشكل ال انت فيه.. بيك و انت اقوي و أصلب.. بيك و انت قادر تستحمل ..اي صعب عشان عديت بأصعب من كدة كتير.. انت بس ال بأيديك تغير الألم ال جواك ده لأمل! !..حدوتك لسة مخلصتش.. وتتر النهاية لسة منزلش..متيأسش