محمد يونس ل"الفجر الفني": ساحرة الجنوب نقلة مهمة في حياتي

أكد الفنان محمد يونس، أن دور "جمال" في مسلسل "ساحرة الجنوب" يعد نقلة فنية في مشواره الفني، وأنه يعتبر أول بطولة حقيقية مع حورية فرغلي، وأن كواليس العمل كانت مليئة بالحب، وكشف كواليس ساحرة الجنوب"، وتعاقده على الجزء الثالث في حوار خاص ل"الفجر الفني".

كيف كانت بداية مشوارك الفني؟
"بدأت من خلال فرقة مسرح، وكان رئيس الفرقة أشرف عزب وبدأنا نعمل مسرحيات في قصور الثقافة وكانت أول حاجة أعملها فيديو مع أستاذ محمد صبحي في "يوميات ونيس"، كنت بجسد دور مهندس ديكور وطلعت في بعض مشاهد صغيرة في عدد من الأفلام زي رحلة حب وشجيع السينما وكلم ماما وأسماء وريكلام وفيلم شبابي مهم جدًا، كنا بنحاول نعمل فن يليق بالأسرة سواء أمي أو بنتي وكنا عايزين نبعد عن جميع أنواع الإسفاف لاعينك تتأذي ولا تسمع تتأذي، وليا مسلسل "ليلى مراد"، جسدت دور محمد عبد الوهاب في مرحلة شبابه وسجن النسا، وريش نغام، ورشحني أكرم فريد لساحرة الجنوب.

لماذ وافقت على دور "جمال" فى ساحرة الجنوب؟
الدور فرصة عمري وحلم حياتي إني أعمل دور زي ده دور محترم بطولة مخرج مهم زي أكرم فريد، وشركة منتجة MBC، و نجوم كبيرة زي حورية فرغلي، صلاح عبد الله، ياسر جلال، كلهم ناس مهمة جدًا ومتواضعين جدًا وكانت كواليسه محترمة ونضيفة وكلها حب.

ماهى استعدادتك للدور واللهجة الصعيدية؟
لما كلمني مصحح اللهجة قالي عايز تتكلم صعيدي ولا تبقى صعيدي فعلًا أكدتله إني عايز أبقى صعيدي فعلًا وبقينا نشتغل على الوقفات وشكلت نسخة كاملة من السيناريو وقعدت أحفظ اللهجة قبل الدور خالص وبعد ما حصلت على التقدير النهائي بعد كده بدأت أشتغل على الدور، والدور صعب مش سهل الدور يعتبر السهل الممتنع وأكرم فريد اشتغل على دوري وعلينا كلنا.

كيف كانت الكواليس بينك وبين حورية فرغلي في المسلسل؟
حورية متعاونة متواضعة جدًا ومتبخلش بأي حاجة إنسانة محترمة بنقعد نذاكر مع بعض بنقعد نراجع طول الوقت، وحورية ممثلة كويسة، ومش مستغرب إنها عملت الدور بالشكل الرائع ده ولما جالها دور يوضح إمكانيتها وافقت.

هل هناك نماذج صعيدية مثل أحلام وجمال في الصعيد؟
في نماذج صعيدية وقابلت شخصيات حاجات زي كده في الصعيد الحب في أي وقت وأي مكان، إحنا اللي بنغمض عنينا عنه وجمال منسيش حبه لروح ده حب عمره كله وهيساندها في محنتها لأخر لحظة.

ماهو أصعب وأفضل موقف أثناء تصوير "ساحرة الجنوب"؟
أصعب موقف بدأنا في شتا وانتهينا من تصويره في صيف ولبس الشتا بنلبسه في صيف لما كنا بنصور في الآثار أنا وياسر جلال وحورية كانت الشمس أشعتها بتتعامد علينا فبتبقى صعبة علينا جدًا وأحلى المواقف كلنا كنا بنحب بعض اللوكيشن والأجواء كانت مليئة بالحب والاحترام.

هل ستشارك في الجزء الثالث من "ساحرة الجنوب"؟
تعاقدت على الجزء التالت، وهنبدأ بدء تصويره بعد موسم رمضان.

ماهى الشخصيات التي تتمنى العمل معها مرة أخرى؟
أتمنى العمل مع أكرم فريد، وكاملة أبو ذكري، تاني لأنهم من المخرجين المبدعين ونفسي أشتغل مع كل مخرج بيخرج الإمكانيات ومبدع، ونفسي أشتغل مع حورية فرغلي، وهند صبري، ونيللي كريم، وصلاح عبد الله، وسوسن بدر، وياسر جلال، محترم جدًا ومهذب ومتعاون، أما عن الفنانين التي لم تجمعني بهم أعمال نفسي أشتغل مع يحيى الفخراني راجل محترم وفنان راقي جدًا ونفسي أشتغل مع كل نجوم مصر.

ماهو أقرب دور لشخصية "محمد يونس"؟
أقرب دور مني شخصيتي في سجن النسا وساحرة الجنوب، وأتمنى الفترة الجاية أنوع ويكون مختلف عن "محمد"، مش مستعجل إني أعمل حاجة مختلفة لأن في النهاية معظم المخرجين بيحطوا كل فنان في قالب ولكن في مخرجين بيشوفوا المسلسل من أكتر من زاوية.

هل توافق على بطولة فيلم يوجد به مشاهد الابتذال؟
أنا عامل عهد على نفسي إني أعمل كل حاجة محترمة ميخجلش منها مراتي وبنتي لو يتوافر ده في العمل هشتغل وأتمنى إنى أقدر أحافظ على كده.

مارأيك في المسرح الآن؟
المسرح الآن يتم إثرائه بالنجوم ودي حاجة كويسة جدًا، ولكن في تجارب شبابية هايلة وقدمت المسرح بشكل مختلف عى تجربة جميلة جدًا عرض روح لفاطمة محمد علي، ومجموعة كبيرة من الشباب هايل وحاجة محترمة جدًا، وعلى القهوة لمحمد عادل، و1980 وأنت طالع، الشباب بيعملوا مسرح هايل وجمهور رهيب وأتمنى أن أبقى في تجربة مسرحية قريب.

ماهو أصعب وأفضل موقف في 2015 وماذا تتمنى في 2016؟
أصعب موقف في 2015 وقوع اللبن المغلي على رجل بنتي فيروز وصحتني وأنا نايم بتصرخ الحمد لله على كل شئ وأفضل موقف اشتراكي في ساحرة الجنوب أول بطولة حقيقية بكل تفاصيلها وبتمنى في 2016 بطولة تانية بقى إن شاء الله.