إعلام الإسرائيليات

بعد سنتين وشويه من التفرغ التام للإعلام بكافة اشكاله ؛ والسوشيال ميديا بكافة رموزها ، ورايحه فين رايحه الفيس بوك
وجايه منين جايه من الفيس بوك ، ومن توك شو لتوك شو ، ومن لميس، لمحمود ،لتامر، لمعتز ،لمني ،لفوده ، لعمرو ، لعماد ،لخيري للبني عسل ماخليتش .. حتي عكاشه كنت بشوفه واصوم تلات ايام بعدها .
علي الفيس بوك بقي عريفت ناس كتير .. مثقفين علي حفظين مش فاهمين ، إخوان علي مسلمين علي ملحدين ، شباب واعيين
علي شباب واعديين ، شباب معرضيين وعلي طول معترضيين ، وناس لها اهداف (ساميه) وناس داخله تعاكسها !
بإختصار يعني عرفت كوكتيل من البشر لا بأس به لكن به الكثير من البأس ..
سمعت وشوفت ، ناقشت وتناقشت ، أتهمت وأتٌهِمت ، بليكت وأتبليكت لكن في النهايه الحمد لله ..
(فهمت) ............. ومافهمتش !
** فهمت ان احنا لازم نتعامل مع الإعلام والسوشيال ميديا كما أُمرنا ان نتعامل مع الإسرائيليات (لا نصدقها ولا نكذبها)
**فهمت ان في الإعلام والسوشيال ميديا واجبات ومجاملات وكسر عين ومحسوبيات ، وابسط اشكالها علي الفيس بوك
لما حد يعملك (لايك) أو (كومنت) لطيف علي بوست من بتاعك ، تلاقي نفسك (مضطر) ترد له اللايك بعشرة أمثالها حتي
لو ماكنتش بتقرأ مشاركاته أصلاً !
** فهمت ان علي كثرت البرامج في الفضائيات ، والجرائد علي الأرصفه ، ووسائل التواصل ف الحواسيب والموبايلات
مازلنا لا نستطيع الوصول الي الحقائق كامله ، ومازال بئر الدوله العميقه يبتلع فضائها الواسع !
** فهمت ان ( العقل) هو الحاجه الوحيده اللي ممكن يخليك تهضم الإعلام بسلطاته ببابا غنوجه وتستفيد من فيتاميناته
وتطرد فضلاته .. ويجب ان يكون شعارك ( استفت عقلك وان افتوك ) وافتوك هنا من (الفتوي) أو من(الفتي) أو من (الفتّه)
كله جائز !
وأخيراً ....
**فهمت احنا ليه بندمن شاشات الفضائيات وشاشات العالم الإفتراضي رغم ما فيها ومن فيها ، لكن
اللي ماقدرتش افهمه ولا أجاوب عليه (القرد لو مات ، القرداتي هيشتغل إيه ) ؟!!