إسعاد يونس تكتب: إدينى حد كبير أكلمه "2"

■ كنت أفتح ملف المقالات لأجهز لمقالى الجديد.. واصطدمت بهذا المقال الذى كتبته يوم الثالث من نوفمبر عام 2009، تأملته طويلا وأنا أسأل نفسى «وهل تغير شىء؟؟»..
■ آلو.. مساء الخير.. لو سمحت.. أفندم؟.. مانا قلت مساء الخير.. طيب وعليكم السلام ورحمة الله وبركاته.. ما تزعلش يا سيدى.. ماهو كله سلام يا أستاذ.. لو سمحت تحولنى على السيد المسؤول عن النظافة فى الحى.. عندى شكوى بخصوص تلال القمامة اللى قافلة الحتة عندنا.. يا فندم إحنا ماعدناش شايفين بعض من ارتفاعها.. القصير فينا بيضيع جواها وبنقعد ننادى عليه عشان نروحه.. بيبقى تايه جوه القمامة وعمال يزعق وامه تنده عليه م الناحية التانية.. بننزل بكلوبات النور فى الضلمة عشان ننقذه قبل السلعوة والفيران والقطط والسحالى ما تاكله.. أفندم؟.. إحنا ساكنين فى المقابر.. سيادتك بتتكلم جد واللا دى خفافة من سعادتك.. ميتين إزاى سعادتك؟.. يعنى أنا بكلمك من عالم الأرواح؟.. يابنى أنا حى أرزق.. بس عايش فى المقابر.. إنت مش م البلد دى واللا إيه؟.. إحنا اتناشر مليون سكان مقابر.. الزبالة بقى سدت مداخل المقابر دى.. الميتين كانوا أسعد حالا قبل ما نيجى إحنا وزبالتنا نسكن فوقيهم.. ماحنا لميناها يا باشا بالجهود الذاتية بس نوديها فين؟.. إدينى المسؤول الله يكرمك..
■ آلو.. مين؟.. تنقية المياه.. هو فيه كده عندنا؟.. والله يابنى ما بستعبط.. بسأل هو السؤال حرم.. آلو.. يا عم رد عليا.. مين؟.. الصرف الصحى؟.. أنا ما طلبتكوش.. أنا عايز.. نعم؟.. إنتوا محطات تنقية المياه واللا هيئة الصرف الصحى؟.. والله؟.. عملتوا جمعية لقلة الموارد واشتركتوا فى تليفون واحد؟.. يا سلام.. ومقر واحد كمان؟.. لأ خطة واعية لترشيد المصروفات.. بس إوعى يكون الشغل بيدخل على بعضه.. يعنى مثلا تنقوا المياه وتقوموا مزروطينها فى نفس الوقت.. بتريق إيه يابا هو سر؟.. داحنا بنشرب وبناكل حاجات مليطة كلها.. طب مش ممكن تدونا خريطة نمشى وراها؟.. يعنى أنهى خرطوم اللى بيدى مية متنقية، وأنهى خرطوم فيه زروطة.. أهه الواحد يعرف يمد بوزه على أنهى بزبوز.. طب ياعم الله يسامحك.. ممكن بقى ترجعنى للأخ اللى كان حايحولنى على السيد المسؤول عن..... آلو..
■ سلاموا عليكوا.. لو سمحت أنا.. مين؟.. هيئة السكك الحديدية؟.. لا يا باشا.. متشكرين قوى.. ما بركبهاش.. أنا بركب أأمن وسيلة مواصلات.. أنا عندى حمار شاب كده وعفى وكله عضل.. لأ مش بتاع سعد الصغير.. أهه ده بركبه بقى حتى لو رايح حلايب.. إنشالله أقعد سنة بلاد تشيلنى وبلاد تحطنى ولا إنيش أركب المدعوقة السكك الحديدية بتاعتكوا دى.. وآجى بقى عند العياط والحمار يحود لوحده.. ياسلااااااام.. يعنى الوزير لما استقال اتصلح حالها؟.. تصدق وتآمن بالله؟.. أنا غلبان ومقطوع وضاربنى السلك لكن بعرف أقرا.. مش امك يعنى إيه؟.. آه مش أمى.. أيوه يا سيدى بقرا وبكتب وتقدر تقول عليا ملحوس شوية ثقافة.. يعنى بقرا فى الجرايد إن اللجنة العليا لإدارة الأزمات اجتمعت مرة واحدة من سنة 1959.. يعنى من خمسين سنة.. وعندكوا أجهزة بملايين مابتعرفوش تستخدموها وو.. بص.. يا تقفل السكة يا تحولنى عاللى جابنى ليك م الأول.. ده إيه الغلب ده؟..
■ آلو.. نعم.. إنتوا حاتتسلوا عليا؟.. مستشفى الحميات بالعباسية إزاى يعنى؟.. طب ممكن بقى مادام جيت فى سكتى تقوللى إزاى عندنا أنفلونزا الخنازير وما عندناش خنازير؟.. طب لما هى الخنازير مش سبب مباشر دبحتوها كلها ليه؟.. يعنى عاجبك الزبالة اللى إحنا فيها دى؟.. ما كات بتاكلها.. كات بتاكلها ياخويا ألطم يقولوا الراجل اتهطل.. أنا ما طلبتكش.. إنت اللى طالبنى إزاى؟.. عايز إيه؟.. عايز سراير وأمصال وأجهزة معامل للكشف عن الأنفونزا ومحاليل وسرنجات وشاش وقطن وترمومترات؟.. يا نهار غبار.. اطلع يابنى م السكة حرقت دمى.. وإنت مين إنت راخر؟.. آلو.. آلو..
■ مين سعادتك؟.. قناة مين الفضائية؟.. يا حبيبى أنا عايز المسؤول عن النظافة فى الحى.. مانا عارف إن النظافة م الإيمان.. أنا مش طالب أتعرف عليها أنا طالب أتخلص م الزبالة.. سيادتك الشيخ مين؟.. لأ إنت مش شيخ ولا داعية.. أنا عارفك كويس.. يا راجل دانت خريج معهد الساليزيان دونبوسكو قسم سباكة.. إنت حاتسرح بيا؟.. بتوزع فتاوى فى التليفون ليه؟.. بتعمل ماركيتينج للفيديوكول؟؟..إطلع م الخط الله يسهلك.. يا أستاذ ياللى حاتحولنى عالمسؤول.. إنت دخلتنى على موقف السوبرجيت واللا إيه؟.. آلووو..
■ ياخبر إسود.. ده مش تليفون.. دى مش خطوط داخلة على بعض.. دى سويقة.. نعم يا أستاذ؟.. أنا مش وزارة التربية والتعليم.. مدرسة ابنك ما فيهاش كابينيهات؟.. كلم مصلحة المجارى.. وأنا مالى المدرس بينط من فوق السور واللا من تحته؟.. ما يمكن يا أخى بيعوض سنين الحرمان من الفلتان الاجتماعى أيام ما كان فيه تعليم.. يا أستاذ حالك من حالنا جميعا.. مانا ابنى معاه خمسة وأربعين عيل فى الفصل.. وبادفعله تلاتة جنيه فى الأسبوع عشان الفراش يديله كرسيه.. باقى العيال قاطعين وقوف..
■ إنت يا أستاذ يا بتاع المحظورة إنت بتزعق ليه.. أنا مش فاهم محظورة إزاى يا خويا وهما بقوا نص البلد.. يا أستاذ اطلع م الخط.. عندك برلمان تزعق فيه زى مانت عايز.. هو إنتوا وراكوا حاجة غير الزعيق فى البرلمان.. الحمد لله التليفون غير موصل للجزم.. إنا لله وإنا إليه راجعون.. الفاتحة يا خوانا على شهيدة طابور العيش اللى ابنها بيعيط ده.. وإنت مين إنت راخر؟.. منظم وقفات احتجاجية ومتعهد طبع يفط.. بتألف الشعار بكام؟.. يا راجل.. دانا لسه راجع من وقفة احتجاجية للموافقة على تسيير التكاتك عالدائرى.. وقف علينا الشعار بتمانية جنيه.. الأخ اللى بيبيع تذاكر السوق السودا بتاعة ماتش الجزاير من دلوقتى.. اقفل السكة التليفون متراقب.. إنتوا يا عيال ياللى بتقولوا كلام قبيح فى التليفون.. أطفال شوارع ومعاهم موبايلات إزاى ياخويا؟.. وإيه اللى دخلهم عالخط؟؟.. يمكن خطوط التنصت على الشعب فتحت كلها مرة واحدة.. إنت يا جدع إنت ياللى بتبيع أراضى الدولة عينى عينك كده فى التليفون.. يخرب بيتك وبيت أبوك.. وإنت ياد إنت وهو.. بلاش فى التليفون.. بتاخدوا الرشوة فى أماكن العمل وبتدبوها فى كاميرات المراقبة وعينكم باكسة.. حبك تتخانقوا ع القسمة عبر الهاتف..
■ لالالا.. دى البلد حا تضيع يا ولاد.. أنا مش عايز مسؤول النظافة.. إنت يا أستاذ ياللى كنت حاتحولنى.. مش عايز المسؤول الأكتع ده.. ولا أى أكتع تانى..
■ إدينى حد كبير أكلمه.. إدينى حد كبير أكلمه.. إدينى حد كبير أكلمه..
نقلا عن المصري اليوم