جوزي إستُشهد قبل ما يسامحني

السلام عليكم ورحمة الله وبركاته .. كنت زوجة لأحد شهداء الثورة .. ومشكلتي اتسببت لية في مرارة رهيبة بسبب اني كنت دائمة الشجار والخلاف مع زوجي رحمه الله وقبل شهادته بأيام حصل بينا مشكل كبيرة
كنت بتهمة انه على علاقة بواحدة تانية والموضوع كبر جدا لدرجة انه اضطر ياخد هدومه ويروح يقعد عند والدته وقبل ساعات من إستشهاده إكتشفت براءته عن طريق الصدفة فجريت على بيت والدته عشان أصالحه واطلب منه يسامحني قالتلي أمه ده في الميدان , ولسة الكلام داير بنا والتلفزيون شغال لقيت النشرة جايبة لقطة على اللي سقطوا شهداء ولقيته واحد منهم جالي انا وامه حالة هيستيرية من البكاء لغاية ما امه أغمى عليها ومفيش حد قاعد معانا , استنجدت بالجيران يودوني الميدان واصريت على ده وودوني فعلا والحمد لله لحقت اشوفه , بس بعد ما اطمنت على ان واحد من الجيران جاب دكتور لأمه ومراته اتبرعت بالجلوس معاها عقبال ما ارجعلها بقيت مش عارفة ألاقيها منين ولا منين واول ما عيني وقعت على جوزي فضلت اصرخ واقوله سامحني ارجوك .. انت برئ من اتهامي .. اوعى تروح من غير ما تسامحني وكلام من النوع دة .. المهم جوزي راح عند ربه مع الشهداء وفضللي الحسرة والحيرة .. مش عارفة أكفر عن ذنبي إزاي ومش ضامنة مكانتي عند جوزي كانت ايه وهل استشهد وهوة غضبان علية ؟ اسئلة كتير هموت من قسوتها مش قادرة اعيش بيها .. طول الوقت بصلي لله وادعي يمكن يقبل مني بس لو ربنا قبل الدعوة هيسامحني في حق ما اغضبت جوزي ؟ قولولي اعمل ايه انا بنام بناري كل يوم . جزاكم الله كل خير .
فضفضة
صديقتي .. عليك بالصدقة بنية أن يسامحك الله , و إستغفري كثيرا وقومي برعاية والدته لوجه الله و كوني لها سندا لعله يحسب في ميزان حسناتك ويكون تكفيرا عن ذنبك في حق زوجك والله عليم بما في الصدور ,هو الغفور الرحيم .
نيفين حجازي