مساء الخير انا أم لطفلين وأبوهم للأسف توفاه الله من سنة وانا من البداية كنت عايشة في بيت عائلة زوجي في نفس العمارة الخاصة بهم لكن أخته مصرة على معاملة الوصي علينا انا واولادي لدرجة بتخليها تتدخل في كل كبيرة وصغيرة واحيانا بتقولي لا ما تروحيش لوالدتك الأولاد مش معقولة يفضلوا من بيت لبيت ، وطبعا عاملة البواب ناضورجي علشان تشوف مين اللي بيزورني من أهلي أو أصحابي وأول ما حد يجيلي تنزل تضايف نفسها بالعافية من غير عزومة وما تسيبنيش أتكلم حتى مع الضيوف براحتي ومن كتر المواقف دي الناس بطلوا يزوروني حتى والدتي بقت تضايق وتقول لي لما احب أشوفك ياريت انتي اللي تيجي ، المشكلة أنها عاملالي انا واولادي قرف طول الوقت وانا ممكن جداً أسيب بيت عيليتهم المقرف ده واروح أعيش مع أمي في بيت والدي ما هوة بيت عائلتي برضه لكن حاسة باحراج من فتح الموضوع خصوصا ان أهل جوزي اتعودوا يشوفوا الأولاد كل يوم لكن تدخل أخته خانقني جداً .. أمي نفسها بتقول لي ليه يا بنتي اللي عاملاه في نفسك ده انتي من حقك تعيشي معايا انا أولى بيكي منهم ومحتاجة رعايتك .. انا والدي متوفي برضه وأخواتي متجوزين وقاعدين في بيوتهم يعني البيت فاضي على أمي .. مش عارفة اعمل إيه حاسة بتسلط رهيب من أهل زوجي وده مع الوقت هيعمل مشاكل أكبر خصوصا كمان أني لاحظت ان أخت جوزي بتقوي أولادي علية من ورايا وخايفة مع الوقت ينساقوا ورا كلام الست العجيبة دي لأنهم في سن ما يحكموش على الأمور قوي !! أرجوكم تنصحوني لأني فعلا تعبانة وعلى وشك الانفجار فيها وانا مش بتاعة مشاكل .... شكرا جزيلا م . ي فضفضة محررة الصفحة .. نيفين حجازي بدون تردد .. لك كل الحق ان تعيشي وأولادك في بيت والدتك .. على الأقل هي أمك .. وتعيش وحيدة بدون رعاية مباشرة .. وانا مع رأي والدتك في أنها أولى بك وبرعايتك خاصة وأنك تعيشين ضغوط ليس لها معنى من أخت زوجك رحمه الله ، الأمر لا يستدعي الشعور بالحرج .. و عندما يشعرون أهل زوجك بالشوق لرؤية أولادك يأتون في وجود والدتك لزيارتهم مما سيضطر وجود والدتك الجميع من الحفاظ على الآداب العامة فسيجلسون بأدب لنهاية الزيارة .. أرجو ان تأخذي القرار فلا داعٍ من التردد .. حفظك الله وأولادك . [email protected]
