التأتأة عند الأطفال

لو سمحت كنت عايزة اسأل عن طفل عنده -- خمس سنين -- بدأ من فترة يتهته وياخد فترة عقبال ما يخرج الكلام اللي عايز يوصله وبدأ انو يتضايق ويتعصب عشان اللي قدامه مش بيفهموه والحكاية دي لسة جديدة ..هل هو محتاج جلسات تخاطب ؟؟
فضفضة
التأتأة في هذا العمر طبيعية جدا خاصة للأطفال الأذكياء والحساسة جدا ، وعلشان نتأكد إن الموضوع مش محتاج علاج لازم نتأكد من ثلاث أمور هامة :
1- مفيش حركات مصاحبة غير طبيعية زي حركات للعين أو للإيد أو تعرق زائد عن الحد الطبيعى.
2- إن معدل تكرارها مش كتير ، يعنى مش في كل جملة بيقولها.
3- انه لما يقف ويتكلم تاني من جديد بتختفى التأتأة عنده ويرجع يتكلم من جديد.
والأغاني مفيهاش تأتأة لانها شيء محفوظ ومفيهاش تفكير فالبتالي متظهرش فيها التأتأة.
عشان نخفف من التأتأة لغاية ماتنتهى المرحلة دي من النمو .. هنعمل الآتي :
1- هنوهم الطفل إن المشكلة عندنا في السمع بمعنى .. لما نحب نخليه يقف عن الكلام نقوله ايه بتقول ايه ؟ أنا مش سامعك ، فيتوقف الطفل ويفكر ويتكلم من جديد باسلوب افضل ، ,اياكم والكلام عنه أو عن التأتأة اللى عنده قدامه أو قدام أي حد ، ولو حد من العيلة اتكلم عنه قدامه اوقفوه فورا لانه مش لازم يحس بالمشكلة ، لأنه لو حس بيها هتكبر وهتطور للأسوأ .
2- لا يوجد ضرورة للذهاب بالطفل إلى متخصص تخاطب لأنه التصرف ده هيخلي الطفل يعرف إن عنده حاجة غلط ويبتدي ينتبه ليها ، ولو مكنش الاخصائي حساس فى معاملة ابننا هتتكون مشكلة اكبر ، اللي بيزورا اخصائي التخاطب بيقولوا انهم فى الجلسة مش بيكون فيه تأتأة بس بره بترجع تاني ، وبيضطروا يغيروا اخصائي التخاطب ، فمعلش اصبري شهرين على الطريقة اللى بقولك عليها ولو مرحتش او زادت ساعتها بس لازم يروح الطفل لمتخصص تخاطب .
3- وعودي طفلك يوم بعد يوم قراءة قصة وقومي بتمثيلها معه بشكل جديد وغيري من نغمات صوتك ، ثم عوديه على أسلوب كلامك في الوقت العادي بالشكل ده.
4- حاولي تحفيظ ابنك ايات من القرآن والأغاني ده هيحافظ على مرونة أعضاء النطق لغاية مايعدي المرحلة .. لكن دي مش طريقة للتخلص من التأتأة ، إنما طريقة علشان يتكلم بدون تأتأة لأطول فترة ممكنة.
أحمد جسرها أخصائي تخاطب