خطيبتي مستلطخاني

نيفين حجازي

السلام عليكم ورحمة الله
انا خاطب بقالي اربع شهور وخطوبتي تمت بشكل تقليدي صالونات يعني .. المهم في اول الخطوبة لاحظت ان البنت مش مرحبة اوي فقلت يمكن مش متعودة علية أو مكسوفة لكن بعد ما خرجنا كذا مرة اكتشفت واحنا قاعدين في مكان واجي اسيبها و ادخل الحمام .. وأنا راجع الاقيها بتتكلم في الموبايل وأول ما اقرب تنهي المكالمة .. لقيتها بتعمل كدة كذا مرة وبصراحة انا شكيت وقلقت لان الحركة باينة جدا ، سألتها مرتين عن الحكاية دي تقولي مفيش حاجة دي صدفة .. بعد الموقف ده قصدت اعملها كمين فخرجنا واخترت مكان الجلوس بحيث اول ما أجي أقوم أبقى في اتجاه يصعب انها تشوفني منه وحصل فعلا .. لكن المرة دي قصدت أغيب عليها شوية باي حجة ووقفت من بعيد أراقبها لقيتها عملت مكالمة فعلا بس المرة دي فضلت تتلفت حواليها فانا قلت يمكن بتشوفني جاي ولا لا .. لكن للأسف الموضوع طلع كالاتي .. لقيت الست هانم فجأة وهية قاعدة جالها شاب أتكلم معاها وهية عمالة تبص حواليها بهيستيريا والشاب مش عايز يمشي وأكنه من طريقة حركاته انها مش صدفة أو واحد بيسال على حاجة لا ده واحد يعرفها .. المهم جيت اروحلهم بسرعة كان هوة مشي ما لحقتهوش .. طبعا واجهتها بالموضوع فقالت أيوة أيوة ده كان خطيبي بس محصلش نصيب .. انا قلتلها طيب ولما هوة كدة بيكلمك ليه هوة مش عارف انك قاعدة مع خطيبك فوقعت في الكلام وقالت ايه .. اصله كان قاعد في المكان هنا صدفة ولما شافني حب يسلم فانا قلتلها .. يعني كان شايف انك قاعدة معايا وبرغم كدة استغل فرصة عدم وجودي وجه كلمك وبصراحة رحت مهزاها وشاتمها مع اني عمري ما بشتم لكن طلعت عن شعوري لأني حسيت انها مستلطخاني .. المهم روحتها بيتها بعد ما الخروجة باظت وقال ايه هية دلوقتي اللي مقموصة مني وطالبة تفسخ الخطوبة وأنا بصراحة ابتديت تحبها شوية بس الموقف ده محسسني انها لسة على علاقة بيه وحاسس انه كان جاي وراها مخصوص ويمكن هية دي التلفونات اللي كانت بتعلمها معاه اول ما أقوم .. ده أكيد .. انا دلوقتي مش عارف افسخ الخطوبة ولا اضغط على نفسي علشان امشي الموضوع ولا ايه خصوصا انا سألتها كذا مرة انتي لسة تعرفيه تقولي لا دي مجرد صدفة بس انا قلبي حاسس بغير كدة .. ارجو الحل سريعا لأني متوتر وقلقان ومتغاظ جدا .
ف . ب
[email protected]