إقرأ دعوة "حسبي الله" عملت إيه

السلام عليكم أولا .. انا قريت القصة بتاعة الأخ اللي هيموت ويتجوز رقاصة بعنوان "رقاصة وبترقص " وبصراحة لقيت إنه من واجبي أكتبله ويارب يقرأ رسالتي دي قبل فوات الأوان .. عشان أنا سبقته بنفس التصرف بس هوة لسة في المرحلة الأولى وممكن يلحق نفسه .
انا عندي دلوقتي 58 سنة ومن حوالي 20 أو 21 سنة إتعرفت على ست أرملة لكن ماكنتش رقاصة كانت مضيفة طيران وإتعرفنا على بعض أثناء سفري خارج البلاد ..
المهم مش هطول عليكو .. الست دي برغم شكلها الخارجي المحترم وأسلوبها كمان إلا إني بعد ما خربت بيتي بسببها وأهملت أولادي وطلقت زوجة أقسم بالله لا يمكن تعويضها ولو بالصدفة طلعت خسيسة بمعنى الكلمة .. معرفش عقلي كان مغيب ولا ايه ساعتها لكن الواحد كان معمي فعلا ..
الخلاصة .. أكبر دليل على إن مراتي كانت ست أصيلة إنها ما إعترضتش على طلاقي ليها لكن قالت جملة واحدة بس ( حسبي الله ونعم الوكيل ) أنا عشت بما يرضي الله معاك وانت رديت علية وعلى أولادك بما لا يرضي الله ونهت كلامها ب اللهم إضرب الظالمين بالظالمين ..
بصراحة أنا ساعتها جسمي قشعر لكن برضه كنت معمي من غسيل الدماغ اللي الهانم التانية كانت عاملاهولي .. المهم إتجوزت الست المضيفة دي وإبتدت دعوة مراتي تشتغل .. من أول أسبوع وانا الخراب ماسبنيش لحظة ابتدى بإنهيار كامل ماديا مرورا بخسارتي لأعز أصدقاء عمري وبعض أقاربي وغضب أهلي ثم إنتهى الأمر على أني مصاب الآن بمرض جلدي عجيب محدش من المئة دكتور اللي رحتلهم العيادة عارفين ده ايه بالظبط .. طبعا الهانم الزوجة التانية من قبل ما امر بالظروف المرضية دي وانا شايف ايام سودة من أول ما أكتشف بالصدفة ان الهانم بتخونني مع طوب الأرض لغاية الخساسة بقى بكل أنواعها بمعنى خساسة في كل مايخطر ببالك أو لا يخطر .. طبعا لما جالي المرض الغريب ده قالتلي بكل وقاحة احنا نتطلق افضل عشان انا مليش في وجع القلب ده .. انا سمعت الكلمة دي وافتكرت آخر حاجة قالتهالي أم أولادي .. الصراحة ولا جالي عين ارد عليها من كتر القهر .. مش منها لأ .. القهر على أولادي ومراتي الست بنت الأصول .. حسيت بذل لا يمكن وصفه بكلام حسيت بإني انا الخسيس من البداية وان مراتي التانية باللي قالته كان اقل حاجة القدر يرد بيها علية .. وفعلا القدر ما استناش , لقيت مراتي وأولادي داخلين علية البيت في بيت والدتي بعد ما عرفو بمرضي من والدتي أصل همة علاقتهم فضلت مستمرة حتى بعد الطلاق .. المهم .. لقي الولاد وامهم داخلين بكل إحترام بيسألوا ويسلموا علية وبعد ما قعدت مع الأولاد شوية طلبت امهم يسبونا لوحدنا وكان الحوار كالآتي .. ألف سلامه عليك .. أنا قلت أجيب الأولاد يسلموا عليك مهما حصل عشان انا حابة انهم دايما يكونوا بارين بأبوهم زي مالازم يكونوا بارين بية , انا خايفة على قلب ولادي يعرف القسوة عشان كدة كان لازم يزوروك . وسكتت للحظات .. أقسم بالله حسيت اني عايز اولع في نفسي ودخلت في هيستيريا بكاء غير عادي ووطيت على إيدها أبوسها عشان تسامحني ..
والغريب إنها قالتلي سامحتك وسابتني ومشيت وجاتلي ومعاها الولاد في يوم تاني ودي كانت الدهشة الأكبر بالنسبالي .. لقيتها جاية ومعاها علبة عسل أبيض كبيرة وطلبت مني تدهنلي جسمي مكان الإصابة وفعلا سمعت كلامها وسبحان الله العظيم إن إبتدى جلدي يروق بنسبة كبيرة عن الأول على الأقل بقيت قادر أنام وفضلت الست بنت الأصول أم أولادي تجيلي كل يوم عشان تعمل اللي حكتلكو عليه ولغاية يومنا هذا هية لسة بتجيلي وكل مرة تدهن جسمي بالعسل تفضل ترقيني وتقرألي قرآن لعل وعسى الله يشفيني . دي حكايتي بإختصار . الصراحة انا كل مصيبتي في إحساسي بالذنب تجاهها وتجاه أولادي وبتهيألي مهما عملت مش هقدر أوفيها حقها من الشكر دي واحدة ربنا عزها بالكرامة والحكمة والطيبة وطهارة القلب . في النهاية أرجو إن كلامي يكونله تأثيره الإيجابي على صاحب المشكلة اللي كان سبب في انه يخليني اكتب وابعت الكلام ده وارجو من الله ان تكون قصتي عبرة لمن لا يعتبر أو لا يتقي الله في نفسه أو أهل بيته . إدعولي بالرحمة والمغفرة وإدعوا للست أم اولادي جزاكم الله خيرا.
أحمد
فضفضة
أقسم بالله العظيم قلبي وجعني .. لا أجد كلام سوى .. اللهم لا تزغ قلوبنا بعد إذ هديتنا .. اللهم نسألك رضاك والجنة ونعوذ بك من غضبك والنار. اللهم آمين.