عايزني خدامه لعياله !

السلام عليكم ،
مشكلتي أني مطلقة وبقالي حوالي 3 سنين عايشة مع أهلي وكعادة كل الأهل بيزنوا على ارتباطي مرة تانية ، وكل ما حد يتقدم الموضوع كان بيبوظ لظروف كتير ومع الوقت أهلي ابتدوا يضغطوا علية اكتر نفسهم يشوفوني في بيتي وطبعا كنا بنتخانق كتير بسبب الموضوع ده ومن قرفي رضيت مؤقتا براجل كان متزوج وله بنت وولدين ، قلت لنفسي إيه المشكلة أنا أحاول أطول في مرحلة الخطوبة على قد ما اقدر عشان اكتشفه اكتر لكن المصيبة ان الراجل ده كل كلامه معايا توصية على أولاده وتوصية على همة بيحبوا إيه ويكرهوا إيه حتى الأكل بيقول لي على البنت أنها نباتية والأولاد أكلهم عادي .. وهكذا .. من الآخر الراجل ده عايز خدامه لعياله ده ولا مرة واحدة كلمني عن نفسه ولا عن علاقتنا ولا المستقبل المهبب ده هنعيشه ازاي .. لا وايه بيتشرط ويقوللي لما والدة الأولاد تيجي تزورهم روحي انتي لأهلك عشان يبقوا الأولاد حاسين بحرية مع والدتهم .. طبعا أنا سمعت كدة كنت هتشل فيها .. ده غير كمان انه عايزني اسيب الشغل نهائيا بلا رجعة عشان أفضى لأولاده وعلى فكرة أنا من جوازي الأول مكنش عندي أولاد ولما جيت أساله يا ترى هنجيب أولاد بعد قد إيه من الجواز ؟ حسيت من كلامه انه بيتهرب وساب الكلام عايم اللي هوة إيه .. ربنا يسهل ان شاء الله ما تقاطعيش بس ، المهم ده باختصار اللي بيدور بيني وبينه ومشكلتي دلوقتي لو فتحت موضوع فسخ الارتباط ده أهلي هيقلبوا الدنيا على دماغي لأني رفضت قبله كتير لتشابه الأسباب وأسوأ منها كمان ، اعمل إيه وياريت الحل بأسرع وقت لأني عيشتي سودة من كل الأطراف وعلى فكرة أنا في اول الثلاثين يعني اعتقد أني لسة صغيرة معرفتش أهلي مستعجلين على إيه ! على الهم ؟ أسفة أني طولت وشكرا جزيلا .
س. ف
فضفضة
محررة الصفحة .. نيفين حجازي
صديقتي العزيزة .. عذرا .. أنصحك بان تتحملي ضغوط العائلة برفضك لهذا الرجل افضل بكثير من ان تدفعين ثمن قبولك له الباقي من عمرك ، ربما لم يتفق معي البعض في هذا الرأي لكني أرى في وصفك لهذا الرجل استحالة في ان يكون لك زوجا .. راجعي نفسك فالأمر لا يحتمل سوء التقدير .
Fadfada@elfagrorg