عمرو شاهين يكتب " الصين حلوة "

على عكس المتعارف عليه .. صعب أوى الواحد يخرج من عزله هو اختارها بنفسه في حين انه من السهل يخرج من عزله مفروضة عليه .. ما علينا
النهارده سرحت خمسه كده من غير ما أنا أخد بالى من أنى سرحت .. سرحت في حدوته البلد دى وإيه اللي بيحصل .. اكتشفت إن اللي بيحصل دلوقتى هو نسخه ألوان من اللي كان بيحصل أيام ناصر والسادات ولقيت إن موقف الثوار دلوقتى وأصحاب القضايا المختلفين مع المجلس العسكري شبه أوى الناصريين والاشتراكيين والشيوعيين في عهد السادات .. معرفش ليه اخدنى سرحاني لمنظر اللواء الفنجرى وهو يؤدى التحية العسكرية لشهداء الثورة وقارنت بينه وبين السادات في أوائل أيام حكمه لما كان في احد اللقاءات الشعبية و أتهاجم بعاصفة من الهتاف ضده حالت بينه وبين إلقاء خطابه فما كان من هذا الداهية إلا انه طلب الوقوف دقيقه حداد على روح عبد الناصر و" كلفت " الناس بحركة ذكيه وقال كل اللي عايزه وبقى في كل خطبه يذكر دوما انه يسير على طريق عبد الناصر ... طبق الأصل مايفعله المجلس العسكري دلوقتى .. تحيه للشهداء وكل بيان الشعب العظيم والثورة اللذيذة والناس الحلوة وخد على نافوخك بيانات على قرارات ومحاكمات وتدليس وهلم جر .
كمان اللي بيحصل لأصحاب القضايا المختلفين مع المجلس العسكري .. دايما الحاكم بأمره يخرّج للقلة الثائرة الوحش الأصولي " التيار الديني " مستغل طيبه قلب الناس في الشارع وفطرتهم المتدينة – في فرق بين التدين و التعصب والتجارة بالدين – فيأكلوا الشارع في صفهم وتتحول الاغلبيه الصامتة والناس في الشارع من مع لضد .
زمان السادات أخد وقت على ما تحول الشارع من مع الناصريين و الاشتراكيين والشيوعيين لضدهم إنما دلوقتى الشارع أتغير بسرعة رهيبة تقريبا نفس السرعة اللي بتعمل بيها " اوردر من ماكدونالد – أسرع ديليفرى في مصر – " وده بسبب الأرضية اللي مهدها نظام سابق زرع روح الخلاف وليس الاختلاف وعدم القدرة على الفعل وعدم القدرة على التخيل وعلى فكره ده معكوس على كافه نواحي الحياة فن أدب دين سياسة اقتصاد رياضه إحنا أحسن شعب ينسخ صحيح " الصين حلوه " .
يعتقد كثير من الليبراليين أن احد ابرز الخصوم في الساحة الآن هو الأصوليين " التيار الديني " ويعتقد التيار الديني إن اخطر الخصوم عليهم الآن هم المختلفين عنهم .. بينما يعتقد التيار الرأسمالي أن اليسار قادم مره أخرى وهذا يهدد الوجود الرأسمالي على الساحة في حين أن اليسار يستعد لهرس الرأسماليين بعد الانتهاء من هيكله البيت اليساري كل ده في حين أن هناك قله ثائرة تعلم جيدا أن خصمها هو كيان واحد كيان يستغل ملابسه الميرى لسجن كل مختلف معه كيان بيتفرج علينا ومستني اللي يكسب فينا ويطلع هلكان من المعارك دى كلها ليفترسه بالشوكة والسونكى والله الموفق والمستعان .