مش عارف أعيش طبيعي

صباح الخير أستاذة نيفين
انا بقيت في حالة سيئة جدا من كتر الضغوط اللي بتمر بيها مصر الأيام دي وبجد بقيت فاقد السيطرة على أعصابي وردود افعالي .. تقريبا مش بنام اكتر من اربع او خمس ساعات في اليوم من كتر التفكير حاسس بسحابة سووووودة مغيمة على الدنيا كلها لا قادر افكر في شغل ولا عارف أحل مشاكلي الخاصة ولا بقيت مهتم باسرتي بالكامل وبصراحة إحنا كلنا بقينا النموذج ده .. بقى عندي إحساس بالحزن والخوف من بكرة غير عادي بقيت أخاف انام أحسن أقوم تاني يوم على خبر وحش وأكن لو ما نمتش ده هيوقف الزمن .. انا أصلا من الأول مش طايق نفسي من ساعة الثورة الاولى لدلوقتي يعني انا بقالي سنتين في الهم ده لا عارف أعيش طبيعي ولا طايل ارجع زي الأول مش ممكن اللي بيحصل ده بلدنا خربت والناس كلها إخوان على غير إخوان بقى فيهم كمية من الغل غريبة انا بقيت مستغرب الشعب اللي عشت عمري كله معاه مش عارف أتصرف مع نفسي أزاي لو حد من القراء عنده وصفة على الأقل اخرج برة الدايرة شوية وارجع اقدر امشي أموري وأشوف حالي لأني بجد وصلت لمرحلة اعتقد أنها قريب جدا هتقلب حالة نفسية متعثرة .. انا بارجو أصدقاء فضفضة بنصيحتي باي حاجة أي حاجة بس اطلع شوية من الي انا فيه وشكرا للجميع وآسف طولت عليكم ..
محمد هاني

[email protected]