السلام عليكم أنا عندي مشكلة، أنا مرتبطة بواحد وبحبه جدا، وهو كمان بيحبني جدا جدا، بس هو من قبل ما اتعرف عليه كنت دايما باشوف عينه حمرا، وصاحباتي كانوا بيقولوا كده يبقى شارب حاجة.. ولما اتعرفت عليه قال لي إنه عنده حساسية في عينه من الجو، وفعلا دايما ييجي الصبح الكلية عينه حمرا جدا، ولو جبت سيرة أي عين قدامه عينه بتدمّع.. بس أنا مش عارفة ليه اليومين اللي فاتوا بقيت دايما باسأله أنت بتشرب حشيش ولا لا؟ مش عارفة ليه باسأله كده، بيقعد يحلف لي ويقسم إنه مش بيشرب حاجة، بس عينه تحتها اسود وحمرا، هي مش دايما حمرا.. وهو بياخد قطرة من زمان.. بس مش عارفة ليه باسأله كده. هو بيصلي ودايما يزعل مني لو أنا مش صليت، ويعرف ربنا وبيعاملنى أحسن معاملة وعمره ما طلب مني حاجة مش كويسة.. بس بقى بيزعل مني من كتر ما باسأله السؤال ده.. وأنا مش عارفة أعمل إيه، أنا مصدقاه بس خايفة عليه وعايزة أتأكد ومش عارفة أعمل إيه علشان أتأكد.. هو بيقعد يقول لى فيه حد بيصلي ويبقى بيشرب حشيش؟ مع إنه كمان عارف كل حاجة عن الحشيش والحاجات دي كلها وبيحكي لي الولاد بيعملوا إيه وبيشربوا إزاي وبيقول لي يعنى أنا لو باشرب هاجي أحكي لك إزاي.. أنا مش عارفة أعمل إيه، وكمان كنت سمعت دكتور في التليفزيون بيقول الأعراض إنه دايما بيبقى عايز ينام، وعلاقته بأسرته بتبدأ تقلّ ومايبقاش معاهم في كل مكان، هو بصراحة دايما مع عيلته.. بس بينام كتير وعلشان بيبقى تعبان من الشغل.. هو مش شرط يعني كل اللي الدكتور قال عليه ولقيته فيه يبقى معنى كده إنه بيشرب حشيش.. ممكن تساعدوني؟ أنا مش عايزة أظلمه؛ لأنه بجد مش بيعمل أي حاجة معايا تبين إنه بيشرب، هو بس عينه اللي عاملالي المشكلة.. ساعدوني. Kan nifsy ad7ak لو عايز تفضفض لنا دوس هنا