للرجال .. احذروا أطباء النساء !

السلام عليكم أستاذة نيفين يؤسفني ابعتلك بالمشكلة دي لأننا اتواصلنا كتير في مشكلات سابقة لكن مش بالوجيعة دي .. مش هطول عليكي .. انا لية صديق طبيب أمراض نساء وهو صديق من سنين طويلة ، المهم .. في مرة مراتي تعبت ودخنا على دكاترة كتير جداً فمن باب العلم سالت صديقي على اعتبار انه في نفس التخصص اللي مراتي محتجاه وأنا من الأول مش من محبزين فكرة ان مراتي تروح لحد معرفة لكن لما فشلنا في إيجاد العلاج الصحيح سالت صديقي ده وقاللي لازم أشوفها عشان اقدر اشخص الحالة بالتحديد فرحت معاها فعلا وبعد الكشف طمنا وقال بسيطة ان شاء الله لكن المدام هتاخد الدوا وتتابع معايا عشان اطمن على ان حالتها بتحسن وهية اتحسنت فعلا لكن مع تكرار ذهاب مراتي طبعا بحكم شغلي والوقت ضيق قلتلها تروح هية معادها وتبقى تطمني ، وحصل كذا مرة وراحت لوحدها .. من يومين كدة لقيت مراتي متوترة جداً وفي حالة غريبة على غير عادتها وسالتها كذا مرة فيه ايه قالت ولا حاجة انا مضايقة من مشكلة عند أهلي ، لكن مش عارف ليه حسيت أنها مش صريحة فقررت اضغط عليها وسمعت بعد ما اتكلمت أبشع كلام اتاري البيه الدكتور صديقي وهوة بيكشف عليها مد أيده عليها بطريقة ملهاش علاقة بالكشف وقال لها كلام اسمحيلي مش هقدر اكتبه فسألت مراتي وانتي أتصرفتي أزاي ؟ قالتلي أنها قامت من على سرير الكشف الأول ولبست هدومها وسمعته اللي فيه القسمة والنصيب لكن انا ما اكتفتش بكدة بعد ما رحتله وعملتله فضيحة في عيادته قدام العيانين بتوعه رحت عملتله محضر في القسم ووكلت محامي يشوفلي الموضوع عشان قصة الشهود وقلة الأدب دي .. دلوقتي انا باعت المشكلة دي عشان كل زوجين يحذروا من الأمور دي ويفضل ان الزوج يفضي نفسه مهما كانت الموانع علشان يروح مع زوجته العيادة يا جماعة مش قادر اوصفلكم إحساسي بعد الموضوع ده قد ايه جارح ومقرف لو علية أروح ادبحه مرتين مرة عشان عمل كدة مع أهل بيتي ومرة لانه ما احترمش المعرفة .. عموما قدر الله وما شاء فعل والحمد لله لكن أرجوكم نصيحة مني بلاش زوجاتكم تروح لأطباء لوحدهم حرصا وتحسبا لأي خساسة .. وشكرا للجميع .
ا . ع
Fadfada@elfagr.org