صفحات فيس بوك الثورية : شكرا 6 ابريل

توجهت بعض الصفحات على موقع التواصل الاجتماعى فيس بوك بالشكر الى حركة 6 إبريل بسبب ما قامت به خلال الثورة المصرية .
وقالت ذات الصفحات : "لو حسيت بالندم أنك مشاركتش فى الثورة من أولها او انك خفت تمشى فى المظاهرة ليضيع عمرك بطلقة طايشة أو خرطوشة تصفى عينك يبقى لازم ترضى ضميرك وتقول شكرا شباب 6 أبريل" .
"لو تأملت مرة بعقلك كل اللى جرا , ولقيت نفسك أداة إعلامية مصغرة , وبتشتغل لحساب ناس كل همهم السيطرة بتشوه فى الثوار وبتنقل الاشاعات لعقول تانية متخدرة من غير تفكير ولا بحث عن دليل تقول ده عميل وعكاشة معاه الدليل , أرجوك أرضى ضميرك وأقول آسف شباب 6 أبريل.
" لو سبيتهم وشتمتهم يوم عشان سمعت كلام بيردده حزلقوم قالك عملاء وممولين , فكر طيب لحساب مين حاربوا نظام فاسد لعين وطالبوا بالكرامة لناس لسة مش فاهمين, وقفوا بكل ثبات وإتحملوا الإهانات وإترحموا على اللى منهم مات واللى عايشين قالوا برده مكملين وبعد ده كله يطلع المرددين يقلولك عملاء وممولين , ياريت لو أنت أمين ترضى ضميرك وتقول سامحونى شباب 6 ابريل" .
"لو ملكش فى كل اللى فات وفى الثورة شاركت من البدايات ومش ناقل للإشاعات"وبتسأل عن دليل لأى إتهامات وعارف ان العميل هو اللى كل كلامه إفتراءات ,يبقى مش ناقصك غير حاجة واحدة بس , ترفع معنوياتهم وتدخل تقولهم شكرا شباب 6 أبريل.
" إحنا شباب نفتخر بيكم وعملنا صفحة نشكركم فيها , هنوضح وجهه نظركم ومع بعض ثورتنا نحميها , لا عكاشة ولا فلول ولا أى عميل هيقدر يشوهكم من غير دليل , ودايما هندافع عنكم وهنفضل نقول ربنا يقويكم يارب على طول .... "شكرا 6 أبريل"