مواصفات الرئيس الجديد على تويتر..ألا يكون من المنوفية أو يعرف حد منها .. ونمضيه على كمبيالات عشان نضمن يسيب الحكم

حدد نشطاء على تويتر ملامح الرئيس القادم الذي يريدونه.. فقد دار نقاشا واسعا واضحا الإصرار على أن يكون مخالفا لمبارك في كل شيء فكتبوا بسخرية عن صفاته..

لا يكون من المنوفية او يعرف اى حد من المنوفية
لا يكون حريصا كل الحرص
نفسيته مابتحزش من ما يلاقيه من أبناء وطنه
ثبت طبيا انه لن ينجب بنات
يبقى بيغير على مراته جدا وميوريناش وشها السمح
زملكاوي
عنده حساسية من ميدان مصطفى محمود
مايروحشي شرم الشيخ
صور مراته ماتنزلشي ع الكتب
ما يبدأش خطبه بأيها الأخوة المواطنون
ما يكونشي عنده أي ضربة لا أولى ولا ثانية ولا ثالثة
مايكونشي ابنه مفجر ثورة التحديث والشباب
لا يكون قام بثورة ولا حارب ولا طلع في ضربة جوية
لو عبارة غرقت يقلع وينط يجيب الناس م الميه
وبدا واضحا ان هناك رغبة أكيده في إلا يكون متعاليا على الناس او منتميا لطبقة أخرى
يكون فودافون ومشترك في حكاوي فرندز .. ورقمي من ضمن التلات أرقام
يكون متعلم في مدارس حكومية عشان يعرف اد ايه الشعب أصيب بالغباء
بيشرب شاي العروسة
بيتعالج في التأمين الصحي وبيقف في الطابور كمان
يكون عنده أكونت على تويتر عشان أما اتخنق منه اعمله بلوك
مراته تكون حوله، أيوه حوله عشان نعرف نعايره، ما احنا شعب منفسن
يقعد على القهوة ويخسر ويحاسب على المشاريب
وبدا واضحا بين إصرار المدونون ان تكون شرعيته نابعه من الثورة و ليس من دوره الوطني..
مش فى كل خطاب يطلع فيه يقول انا عملت وعملت..!! لازم يحيى الثورة كل يوم الصبح لحد ما فترته تنتهى
و ما يخليش أي مسئول يبداء كلامة ب بناء علي توجيهات السيد الرئيس
مايكونشي ماسوني ولا لابس حظاظة
اللي يصفق له وينافقه يعتقله
ميقعدشي في القصر الجمهوري ياخد شقة إيجار جديد
اللي يصفق له وينافقه يعتقله
لازم يكون مطلق اللحية وحافف الشارب وبيصلي ال 5 صلوات في الجامع غير صلاة السنة عشان نتأكد انه مسلم
عايزه يربى دقنه وينزل يصلى فى الجامع و الامن الوطنى يقفشه
عايزين رئيس شيخ مش رئيس شرم
كل الشعب يبقى عنده الملف بتاعه هو ومرتضى منصور
لازم يقول لنا مين اللي كان واقف ورا عمر سليمان
وأصر المدونون على تويتر على إيجاد ضمانات كي يترك السلطة و حددوا مجموعة من الضمانات الساخرة مثل..
ميغيرشي كل حاجة ف البلد على اسمه
مايقعدشي علي كرسي الحكم يفضل واقف جنبه احنا لسه هانشيل ونخلع
نمضيه على كمبيالات ونخليها معانا لحد ما يسيب الحكم
يكون بيكره صفوت الشريف مش زي التلاتة اللي فاتوا
مايكونشي عمره ساق طياره وميكونشي اسمه شفيق
مايكونشي بيلبس بلوفر ولا بدلة متخيطة باسمه